ހުރިހާ ސްކޫލެއް އޭސީކުރުމުގެ މަޝްރޫޢު ސެޕްޓެމްބަރު މަހަށް ނިންމާނަން: ރައީސް މުޢިއްޒު

ސްކޫލުތައް ފިނިކުރުމަށް ފަށާފައިވާ ”ކޫލް ސްކޫލް“ މަޝްރޫޢުގެ ދަށުން، އިޢާދަކުރަނިވި ހަކަތައިގެ ނިޒާމު ބޭނުންކޮށްގެން މިއަހަރުގެ ސެޕްޓެމްބަރު މަހުގެ ނިޔަލަށް ރާއްޖޭގެ ހުރިހާ ސްކޫލެއް އޭސީކުރާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރ އަތޮޅަށް ކުރައްވަމުންދާ ދަތުރުފުޅުގެ ތެރެއިން ރ.ހުޅުދުއްފާރު ރައްޔިތުންނާ ބައްދަލުކުރައްވާ ވާހަކަ ދައްކަވަމުން ރައީސް މުޢިއްޒު ވިދާޅުވީ، ހޫނުގަދަ ރަށްރަށުގައި ސްކޫލްތައް ފިނިކުރެވެންޖެހޭކަމަށާއި، އެކަމަށް މަޝްރޫޢެއް ފަށްޓަވާފައިވާ ކަމަށެވެ.

"ކްލާސްރޫމްތައް ރާއްޖޭގެ ހުރިހާ ކްލާސްރޫމްތަކެއް ފިނިކޮށްދިނުމަށް ފުރަތަމަ އަޅުގަނޑުމެން އިސްކަންދޭނީ މުޅި ސްކޫލްގެ ހުރިހާ ތަންތަނަށް ވުރެ ފުރަތަމަ ކިޔަވައިދޭން ބޭނުންކުރާ ކްލާސްރޫމް ފިނިކޮށްދޭން. އޭސީ ހަރުކުރުމާ އަދި އެއަށް ބޭނުންވާ ޕަވާ ރިނިއުބަލް އެނާޖީގެ ތެރެއިން ސޯލާ ޕަވާގެ ތެރެއިން ކޮށްދިނުން. އެ މަޝްރޫއު ކުރިއަށް ގެންދަން،"

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

އަދި އެ މަޝްރޫޢު ހިންގާނީ އިއާދަކުރަނިވި ހަކަތައިންކަމަށާ، މިއަހަރުތެރޭގައި ހުޅުދުއްފާރު ހިމެނޭހެން ރާއްޖޭގެ ހުރިހާ ރަށެއްގެ ސްކޫލްތައް އިއާދަކުރަނިވި ހަކަތަ ބޭނުންކޮށްގެން އޭސީ ކުރައްވާނެކަމަށެވެ.

"އެ މަޝްރޫއު މިހާރު ވެސް ފެށި، އެ ކަމަށް ބޭނުންވާ ކަންކަން ހަމަޖެހިގެން ގޮސް، ވަރަށް ރަނގަޅު ހިސާބަކަށް އޮތީ ގެންދެވިފައި. އެހެންވީމަ، މިއަހަރުގައި ދެން އޮތް ދުވަސްތަކުގައި އިރާދަކުރެއްވިއްޔާ މި ރަށާއި ރާއްޖޭގެ ހުރިހާ ރަށެއްގެ ހުރިހާ ސްކޫލެއްގެ ހުރިހާ ކްލާސްރޫމްތަކެއް އިރާދަކުރެއްވިއްޔާ އަޅުގަނޑުމެން އިއާދަކުރަނިވި ހަކަތައިގެ ބޭނުންކޮށްގެން އޭސީކޮށްދީ، ފިނިކޮށްދޭނަން…އަޅުގަނޑުމެން ބޮޑަށް މި އަމާޒުކުރަނީ ވެސް ވީހާ ވެސް އަވަހަކަށް، ސެޕްޓެމްބަރު މަހާ ހަމައަށް ދާން ވާއިރަށް ވެސް ނިންމާލެވޭތޯ. އެއީ ހައެއްކަ މަސްދުވަސް، އަށެއްކަ މަސްދުވަސް ބޭނުންވާނެ މުޅި ރާއްޖެ އެއްކޮށް ނިންމާލަން. އެގޮތަށް އެކަން ކުރިއަށްގެންދާ ވާހަކަ ދަންނަވާލަން."

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

މީގެ އިތުރުން ހުޅުދުއްފާރު ސްކޫލުގެ ޖާގައިގެ މައްސަލައަށްވެސް ހައްލު ބޭނުންވާކަމަށާ އަދި އެ ސްކޫލަށް ޖާގަ އިތުރުކުރުމަށް ފަށާފައިވާ މަޝްރޫޢު ކުރިއަށް ނުގޮސްއޮތުމުގެ ކަންބޮޑުވެލައްވާ ކަމަށެވެ. އެހެންކަމުން، އެރަށު ސްކޫލަށް 12 ކްލާސް ރޫމް އިތުރުކުރުމުގެ މަޝްރޫޢު ކޮންޓްރެކްޓަރަށް ކުރިއަށް ގެންދެވޭނެގޮތް ހަދައި އެ މައްސަލަ ހައްލުކޮށްދެއްވާނެކަމަށް ވިދާޅުވިއެވެ.

"އަޅުގަނޑު ގަބޫލުކުރާ ސިޔާސަތަކީ ޢިމާރާތެއްގެ އިތުރުން ޤައުމަށް ތަރައްޤީ ގެނެވޭނީ ޒުވާން ޖީލަށް ތައުލީމާއި ތަރުބިއްޔަތު ދީގެން. އެހެންކަމުން ސްކޫލަށް ވަސީލަތް ހޯދައިދިނުމަކީ ވަށައިޖެހޭ ތަރައްޤީ. ހިތްހަމަ ޖެހޭ މާހައުލެއް ޤާއިމްކުރުމަކީ އޭގެ އުފާވެރިކަން ލިބޭނެކަމެއް. އެހެންކަމުން ސްކޫލަކަށް ބޭނުންވާ އިންފްރާސްޓްރަކްޗާއާއި އެނޫންވެސް ވަސީލަތް ޤާއިމްކޮށް ތަޢުލީމީ ދާއިރާއަށް އަޅުގަނޑު ވަރަށް އިސްކަންދެން އިރާދަކުރެއްވިއްޔާ އެކަންކަންވާނެ". ރައީސުލްޖުމްހޫރިއްޔާ ވިދާޅުވިއެވެ.

ސަރުކާރުން ފަށާފައިވާ "ކޫލް ސްކޫލް" ޕްރޮޖެކްޓް ކުރިއަށް ގެންދަނީ ސަރުކާރާއި ކޮމިޔުނިޓީގެ އެހީތެރިކަމާއެކުގައެވެ. އެގޮތުން އެންމެ ފުރަތަމަ އޭސީ ކުރެވިގެން ދިޔައީ މާފުށީ ސްކޫލެވެ. މާފުށީ ކައުންސިލުން ވަނީ މި ޕްރޮޖެކްޓްގެ ފޭސް 1 ގައި ސްކޫލުގެ ހުރިހާ ކްލާސްރޫމްތަކާއި ހޯލް އޭސީ ކުރުމަށް އެހީތެރިކަން ދެއްވާފައެވެ. އަދި މި ޕްރޮޖެކްޓްގެ ފޭސް 2 ގައި ސްކޫލުގައި ސޯލަރ ޕެނަލް ހަރުކުރުމަށް ވަނީ ނިންމާފައެވެ. މީގެ ސަބަބުން ސްކޫލުގައި ބޭނުންކުރާ ކަރަންޓުގެ 30 އިންސައްތަ ސޯލަރ ހަކަތައަށް ބަދަލުވެ، ކަރަންޓަށް ދާ ޚަރަދު ކުޑަވެގެންދާނެއެވެ.