ބަޖެޓުން އުނި ކުރި ނަމަވެސް، ގުރައިދޫ އެއާޕޯޓްގެ މަސައްކަތް މި އަހަރު ފަށާނަން: ރައީސް މުޢިއްޒު

ތ.ގުރައިދޫގެ އެއާޕޯޓްގެ މަސައްކަތް މި އަހަރު ފަށާނެ ކަމަށް ރައީސް ޑރ.މުއިއްޒު ވިދާޅުވެއްޖެއެވެ.

ތާ އަތޮޅުގެ ރަށްތަކަށް ރައީސް ޑރ.މުއިއްޒު ކުރައްވާ ދަތުރުފުޅުގެ ތެރެއިން މިއަދު ތ.ގުރައދޫ އަށް ވަޑައިގެން ދެއްކެވި ވާހަކަފުޅުގައި އެމަނިކުފާނު ވިދާޅުވީ ބަޖެޓުން އެ ރަށުގެ އެއާޕޯޓަށް ދީފައި ނެތް ނަމަވެސް ގާނޫނީ އިމުގެ ތެރެއިން މަސައްކަތް ކުރެވޭނެ ގޮތް ހޯދައިންގެން ތ.ގުރައިދޫ އެއާޕޯޓްގެ މަސައްކަތް ފައްޓަވާނެ ކަމަށެވެ.

"އަޅުގަނޑު ދަންނަވާލަން ބޭނުންވަނީ އަޅުގަނޑު ވަޢުދުވީ ގޮތަށް ބަޖެޓުން އެ ބޭފުޅުން އެއާޕޯޓު ހެދުމަށް ޖާގަދީފައި ނެތް ނަމަވެސް މި އަހަރު އެއާޕޯޓުގެ މަސައްކަތް ފަށާނަން. އަޅުގަނޑުމެންނަށް ޤާނޫނީ އިމުގެ ތެރެއިން ކަން ކުރެވޭނެ ގޮތް ހޯދޭނެ، ހޯދާނަން، އިރާދަކުރެއްވިއްޔާ މި އަހަރު މަސައްކަތް ފަށާނަން"

ރައީސް ޑރ.މުއިއްޒު ވިދާޅުވިއެވެ.

ރައީސް ޑރ.މުއިއްޒު ވަނީ އެ ރަށުގެ ރައްޔިތުން އެންމެ މުހިންމު ކަމެއްގެ ގޮތުގައި ފާހަގަކުރީ އެއާޕޯޓެއް ކަމަށާއި އެހެންކަމުން އެމަސައްކަތް ކޮށްދިނުމަށް ވައުދުވެވަޑައިގެން ފަދައިން ކޮށްދެއްވާނެ ކަމަށް ވިދާޅުވެފައެވެ.

މީގެ އިތުރުންވެސް ރައީސް ޑރ.މުއިއްޒު ވަނީ ހޮސްޕިޓަލު ތަކާއި މަގުހެދުން ފަދަ ބޭނުންވާ އެހެނިހެން ކަންކަން އެބަހުރި ކަމަށް ވިދާޅުވެފައެވެ. ނަމަވެސް ރާއްޖޭގެ އިގްތިޞާދީ ހާލަތު އޮތް ގޮތުން، އެކަންކަމުގެ ލިސްޓު، އެންމެ އިސްކަންދޭ ކަންކަން ކުރިއަށް ހިމެނޭގޮތަށް ކަމާބެހޭ ފަރާތްތަކުގެ މަޝްވަރާއާއެކު ތަރުތީބުކުރާނެ ކަމަށް އެމަނިކުފާނު ވިދާޅުވިއެވެ. އަދި އެއާޕޯޓުގެ އިތުރުންވެސް ރަށު ރައްޔިތުން އެދުނު ކަންކަން ވަޢުދުވެވަޑައިގެންނެވި ގޮތަށް ކޮށްދެއްވާނެ ކަމުގެ ޔަގީން ރައީސް ޑރ.މުއިއްޒު ވަނީ ދެއްވާފައެވެ.

ރައީސް ޑރ.މުއިއްޒު މިހާރު ތ.އަތޮޅަށް ކުރައްވަމުންގެންދަވާ 3 ދުވަހުގެ ދަތުރުގައި އެމަނިކުފާނުގެ އަރިހުގައި ސަރުކާރުގެ އިސްބޭފުޅުނެގް ޓީމެއް ވަނީ ބައިވެރިވެވަޑައިގެންފައެވެ.