ފިރިހެނަކު ބަނދެ، އޭނާގެ ބޯ ބާލައި އަނިޔާކުރި 4 މީހަކާއި ކުޑަ ކުއްޖެއް ހައްޔަރު ކޮށްފި

އައްޑޫ ސިޓީ ހިތަދޫގައި ފިރިހެނަކު ބަނދެ، އޭނާގެ ބޯ ބާލައި އަނިޔާކުރި ކަމަށް ތުހުމަތުކުރެވޭ 4 މީހަކާއި 15 އަހަރުގެ ކުޑަ ކުއްޖަކު ފުލުހުން ހައްޔަރުކޮށްފިއެވެ.

ފުލުހުން ބުނެފައިވާ ގޮތުގައި، މި ހާދިސާ ހިނގާފައިވަނީ 2025 ވަނަ އަހަރުގެ ފެބްރުއަރީ މަހުގެ 11 ވަނަ ދުވަހުގެ ދަންވަރު 1:35 ހާއިރު، ސ. ހިތަދޫ މައިލޯ ދަނޑު ސަރަހައްދުގައެވެ.

އެގޮތުން އެވަގުތު، އެ ސަރަހައްދު ފުލުހުން ޕެޓްރޯލް ކުރަމުން ދަނިކޮށް އެ ސަރަހައްދުގައި ތިބި ބަޔަކު ދުވެ ފިލަން މަސައްކަތް ކުރި މަންޒަރު ފެނިފައިވާ ކަމަށާ، އިތުރަށް ބެލިބެލުމުން އެ ސަރަހައްދުގައި ހުރި ޖޯއްޔެއްގައި 37 އަހަރުގެ ދިވެހި ފިރިހެނަކު ބަނދެ، ބޯލުން ބައެއް ބާލައި އަނިޔާކޮށްފައި ހުއްޓާ ފެނިފައިވާ ކަމަށް ބުންޏެވެ.

މި މައްސަލައިގެ ތުހުމަތުގައި ފުލުހުންގެ ބެލުމުގެ ދަށަށް ގެނެސްފައިވަނީ ވިޝަން ޑްރީމް / ސ. ހިތަދޫ، ސަމާހް ތައުފީޤް (20 އަހަރު) އާއި ގްރޭސް / ސ. ހިތަދޫ، މުހައްމަދު ޔައީޝް އަޒާދު (19 އަހަރު) އާއި ނޫތަރި / ސ. ހިތަދޫ، އަޝްރަފް މުހައްމަދު (22 އަހަރު) އާއި މެރީ ގާޑަން / ސ. ހިތަދޫ، އަލީ މާޒިން ހަސަން (20 އަހަރު) އަދި 15 އަހަރުގެ ކުއްޖެކެވެ.

މި މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ސަމާހް ތައުފީޤް އާއި އަޝްރަފް މުހައްމަދު 15 ދުވަހަށް، އަދި މުހައްމަދު ޔައީޝް އަޒާދު އާއި އަލީ މާޒިން ހަސަން 7 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ.

އަދި މި މައްސަލައިގައި ފުލުހުންގެ ބެލުމުގެ ދަށަށް ގެނައި 15 އަހަރުގެ ކުއްޖާ ކޯޓަށް ހާޒިރުނުކޮށް އާއިލާއާ ހަވާލުކޮށްފައިވާ ކަމަށްވެސް ބުނެފައިވެއެވެ.

ފުލުހުންގެ ބުނެފައިވާ ގޮތުން، މި މައްސަލަ ފުލުހުން ގެންދަނީ ތަހުގީގުކުރަމުންނެވެ.