ނޭޕާލް ފްލަޑުން ބިރުވެރި މަންޒަރެއް؛ ސަލާމަތްވާން ދުވެދުވެ ތިއްބާ އައި ކިސަޑުފެންގަނޑާއެކު މީހުންތައް ޣަރަގު

ނޭޕާލާއި ޓިބެޓް ގުޅޭ ބޯޑަރު ސަރަހައްދަށް އައި ކުއްލި ފެންބޮޑުވުމަކާއި ބޮޑު މަޑްސްލައިޑެއްގެ ސަބަބުން ނޭޕާލްގެ ނުވަކޮޓްގައި ހުރި ބްރިޖެއް އެއްކޮށް ފުނޑުފުނޑުވެ، މީހުންތަކެއް ޣަރަގުވެގެން ދިޔަ ބިރުވެރި މަންޒަރު ފެންނަ ވީޑިއޯއެއް އާންމުވެއްޖެއެވެ. މި ހާދިސާގައި މިހާތަނަށް 160 އަށް ވުރެ ގިނަ މީހުން މަރުވެ، އެތައް ސަތޭކަ ބަޔަކު ވަނީ ގެއްލިފައެވެ.

އާންމުވެފައިވާ ވީޑިއޯ ފުޓޭޖުން ފެންނަނީ، ކުއްލިއަކަށް އައި ބާރުގަދަ ކިސަޑު ފެންގަނޑުން ސަލާމަތްވުމަށް މީހުން ހަޅޭއްލަވަމުން ދުވާ މަންޒަރާއި، ކާރުތަކަށް އަރައިގެން އެ ސަރަހައްދު ދޫކޮށް ދާން މަސައްކަތް ކުރަމުންދިޔަ މަންޒަރެވެ.

ނަމަވެސް، ހިނދުކޮޅެއްގެ ތެރޭގައި ބިޔަ ފެންގަނޑު އަރައިގަނެ، ބްރިޖުމަތިން ދުއްވަމުން ދިޔަ ބަސްތަކާއި އެހެނިހެން އުޅަނދުތައް ވެއްޓި، މީހުންތަކާއެކު ފެނުގެ އަޑިއަށް ދިޔަ މަންޒަރު ފެނިގެންދެއެވެ. އޭގެ ފަހުން މުޅި ސަރަހައްދު ކިސަޑު ފެންގަނޑުގެ ތެރެއަށް ޣަރަގުވެ، އެއްވެސް މަންޒަރެއް ސާފުނުވާ މިންވަރަށް ފެންގަނޑު ބޯވެގެންދިޔައެވެ.

ނޭޕާލްގެ ފުލުހުން ބުދަ ދުވަހުގެ ރޭ ހާމަކުރި ގޮތުގައި މިހާތަނަށް 157 މީހެއްގެ ހަށިގަނޑު ވަނީ ފެނިފައެވެ. އަދި ޓިބެޓް ފަޅިން 3 މީހަކު މަރުވެފައިވާއިރު، 265 މީހުން ވަނީ ގެއްލިފައެވެ. ގެއްލުނު މީހުންގެ ތެރޭގައި އެކި ޤައުމުތަކަށް ނިސްބަތްވާ 341 ބޭރުގެ ފަތުރުވެރިންނާއި، ނޭޕާލްގެ 28 ފުލުހުންނާއި، ހައިޑްރޯޕަވާ ޕްރޮޖެކްޓެއްގައި މަސައްކަތްކުރަމުންދިޔަ ދެކުނު ކޮރެއާގެ 8 މީހަކު ވެސް ހިމެނެއެވެ.

މި ކާރިސާއާ ގުޅިގެން ނޭޕާލްގެ ބޮޑުވަޒީރު ބަލެންދްރަ ޝާހު ވަނީ މި ދަނޑިވަޅުގައި މުޅި ޤައުމު އެކަތިގަނޑަކަށް ވެ، ކެތްތެރިކަން އިސްކުރުމަށް ގޮވާލައްވާފައެވެ. އަދި ހާލުގައި ޖެހިފައިވާ މީހުން ސަލާމަތްކުރުމާއި، ކާބޯތަކެއްޗާއި ބޯހިޔާވަހިކަން ފޯރުކޮށްދިނުމުގެ ފުރިހަމަ ޒިންމާ ސަރުކާރުން ނަގާނެ ކަމަށް ވިދާޅުވިއެވެ. މީގެ އިތުރުން ސަލާމަތީ މަސައްކަތްތަކުގައި އެހީތެރިވުމަށް އިންޑިއާ އަދި ޗައިނާގެ ކިބައިން ވެސް ވަނީ އެދިފައެވެ.

މި ހާދިސާގައި އެތައް އަވަށެއް އެއްކޮށް ސުންނާފަތިވެ، ސްކޫލްތަކާއި މަގުތަކާއި ހައިޑްރޯޕަވާ ޕްލާންޓްތަކަށް ބޮޑެތި ގެއްލުންތަކެއް ލިބިފައިވެއެވެ. ތިމާވެށީގެ މާހިރުން ލަފާކުރާ ގޮތުގައި މި ކުއްލި ފެންބޮޑުވުން މެދުވެރިވީ ގްލޭޝިއާއެއް ކަނޑައިގެން ގޮސް، ކޯރު ބަންދުވުމަށްފަހު އެއްފަހަރާ ފެންގަނޑު ދޫވުމުގެ ސަބަބުންނެވެ. ޗައިނާގެ ރައީސް ޝީ ޖިންޕިންގް ވެސް ވަނީ ގެއްލިފައިވާ މީހުން ހޯދުމަށް ކުރެވެން ހުރި ހުރިހާ މަސައްކަތެއް ކުރުމަށް އަންގަވާފައެވެ.