ބާރަށުގައި، ބޮޑުތަކުރުފާނާއި ގުޅުންހުރި 400 އަށް ވުރެ ގިނަ އަހަރުވީ ތާރީޚީ ކާނި ގަހުގައި ބަޔަކު ރޯކޮށްލައިފި!

ތިލަދުންމަތީ ބާރަށުގައި ބޮޑުތަކުރުފާނާއި ގުޅުންހުރި 400 އަށް ވުރެ ގިނަ އަހަރުވީ ތާރީޚީ ކާނި ގަހުގައި ބަޔަކު ރޯކޮށްލައިފިއެވެ.

ރޭގެ ވަގުތެއްގައި ރޯކޮށްލި މި ގަހަކީ، އެރަށުގެ އީދުކުޅޭ މަގުގައި، ކަޅުއޮށްފުންމި އަލަށް ބަންނަވައިގެން ރިޔާ ފައްސަވަން ބޮޑުތަކުރުފާނު ޖެއްސެވި ކަމަށް ބުނާ ކާނި ކަޑައިން ހެދި ބޮޑުވެފައި ހުރި 400 އަހަރަށްވުރެ ގިނަ ދުވަސްވީ ބިޔަ ކާނިގަހެކެވެ.

ސޯޝަލް މީޑިއާގައި އާންމު ވަމުންދާ އެ ގަހުގެ ފޮޓޯތަކުން، ގަސް އެއްކޮށް އަނދާފައިވާ ތަން ފެނެއެވެ. ގަސް ރޯކޮށްލުމަށް މެދުވެރި ސަބަބެއް އަދި ރޯކޮށްލި ބައެއް މިހާތަނަށް އެނގިފައެއް ނުވެއެވެ.

މިކަމާއި ގުޅިގެން ސަރުކާރުގެ އިސްވެރީންނާއި އާއްމުންވެސް އަންނަނީ ކަންބޮޑުވުންފާޅު ކުރަމުންނެވެ. މިގޮތުން މިނިސްޓަރ އޮފް ލޯކަލް ގަވަމެންޓް އެންޑް ޕަބްލިކް ވޯކްސް އާދަމް ޝަރީފް އުމަރުވެސް ވަނީ މިއީ ވަރަށް ހިތާމަ ހުރި ކަމެއް ކަން ފާހަގަކުރައްވާ، ކަންބޮޑުވުން ފާޅުކުރައްވާފައެވެ. އަދި ރާއްޖޭގައި ހުރި މިފަދަ ތާރީހީ ތަކެއްޗަށް ގެއްލުންދޭ މައްސަލަ ތަހުގީގު ކުރުމަށްވެސް އެބޭފުޅާ ވަނީ ގޮވާލައްވާފައެވެ.

"މިއީ ވަރަށް ހިތާމަހުރި، އަޅުގަނޑު ކަންބޮޑުވާ ކަމެއް. ރާއްޖޭގައި ހުރި ތާރީހީ އަދި އާސާރީ މިފަދަ ތަކެއްޗަށް ގެއްލުންދޭ މައްސަލަ ޖިނާއީ މައްސަލައެއްގެ ގޮތުގައި ތަހުގީގު ކުރަންޖެހޭ،"

މިނިސްޓަރު ވިދާޅުވިއެވެ.

އޭގެ އިތުރުންވެސް، ދިވެހި ގައުމީ ދުވަހުގެ ބަތަލު، ބޮޑުތަކުރުފާނާއި އެތަކުރުފާނުގެ ގައުމީ ޖިހާދުގެ ހަނދާންތަކާއި ގުޅިފައިވާ ތަރިކައިގައި ރޯކޮށްލުމަކީ އަގު ނުކުރެވޭނެ ފަދަ ގެއްލުމެއް ކަމަށާއި، މިކަން ކުރި ބަޔަކަށް ހައްގު އަދަބު ދިނުމަށް ވެސް ގިނަ ބަޔަކު އަންނަނީ ގޮވާލަމުންނެވެ.

ދިވެހިންގެ ތާރީހާއި މިނިވަންކަމާއި އެންމެ ބޮޑަށް ގުޅިފައިވާ އެއްއޮޑި ކަމަށްވާ ކަޅުއޮށްފުންމިއަކީ، ޕޯޗުގީޒުންގެ ވަކިތަކުން ރާއްޖެ ސަލާމަތްކުރެއްވުމަށްޓަކައި އުތީމު މަހާރަދުންނާއި ހިއްވަރުގަދަ ހަނގުރާމަވެރިން ބޭނުންކުރެއްވި އޮޑިއެވެ.