އެމްޑީޕީ ވެރިކަމުގައި ކަންކަން ރަނގަޅު ކަމުން ޒުވާނުން ވިސްނާނެ މާބޮޑު ކަމެއް އޭރަކު ނެތް: ރޮޒައިނާ

އެމްޑީޕީ ވެރިކަމުގައި ކަންކަން ރަނގަޅު ކަމުން ޒުވާނުން ވިސްނާނެ މާބޮޑު ކަމެއް އޭރު ނެތް ކަމަށް ކުރީގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.

ރޭ ބޭއްވި އެމްޑީޕީ ހަރުގެ ޖަލްސާގައި ވާހަކަދައްކަވަމުން ރޮޒައިނާ ވަނީ ކުރީގެ ރައީސް އިބްރާހީމް މުޙައްމަދު ޞާލިޙަށާއި އެމަނިކުފާނުގެ ސަރުކާރަށް ވަރަށް ބޮޑަށް ތައުރީފް ކުރައްވާފައެވެ.

އެގޮތުން ވިދާޅުވީ، ރައީސް ޞާލިޙް ކުރައްވަމުންދިޔަ ހެޔޮ ވެރިކަމުގެ ސަބަބުން އެމަނިކުފާނަށް ދެވަނަ ދައުރެއް ދެއްވަން ތަކުރާރުކޮށް ވިދާޅުވަމުން ދިޔަ ކަމަށާ، ނަމަވެސް އެގޮތަށް އެކަން ނުކުރުމުން ރާއްޖެ ފަހަތަށް ދާތަން މިހާރު ފެންނަމުންދާ ކަމަށެވެ. އަދި އެފަދައިން ކަންކަން ވަމުންދާއިރުވެސް ޒުވާނުން އެކަންކަމާމެދު ޒުވާނުން ވިސްނާތަން ނުފެންނަ ކަމަށް ރޮޒައިނާ ވިދާޅުވިއެވެ.

ޒުވާނުން އެކަންކަމާ މާބޮޑަށް ވިސްނާތަނެއް ނުފެނޭ. ފަހަރުގައި ނުވިސްނާ އެ ތިބެނީ، މިދިޔަ ފަސްއަހަރު، އެމްޑީޕީ ވެރިކަމުގެ ފަސް އަހަރުގެ ވެރިކަމުގައި ކަންކަން ދިޔަލެއް ރަނގަޅުކަމުން ކަމަށްވެސް ވެދާނެ. މާ ބޮޑު ވިސްނާނެ ކަމެއް އޭރަކު ނެތް. ހިލޭ ޑިގްރީއަށް ކިޔެވޭ. ހުރިހާ ކުދިންނަށް ހަމަހަމައަށް ފުރުސަތު ހުރި. ނޫސްވެރިންނަށް މިނިވަންކަން އޮތް. މިނިވަން މުވައްސަސާތައް މިނިވަން. ޖުޑިޝަރީ މިނިވަންކަމާއެކު މަސައްކަތް ކުރި. ޕީޕީއެމް މީހުންނަށްވެސް ބޭނުން ޚިޔާލެއް ފާޅުކުރެވުނު. އެހެންވީމާ އޭރު ސުކޫލު ނިންމާފައި އައި ކުދިން އައީ އުފާވެރި މާހައުލަކަށް.

ރޮޒައިނާ އާދަމް

ކަންމިހެން ހުރި ނަމަވެސް، މިހާރު ފެންނަމުންދަނީ ބިރުވެރި ރާއްޖެ އެއް ކަމަށާ، އުފާވެރިކަން މި ރާއްޖެއިން ނުފެންނަ ކަމަށް ރޮޒައިނާ ވިދާޅުވިއެވެ. އެހެންކަމުން ޒުވާނުންވެސް އެކަންކަމާމެދު ވިސްނާލަން ޖެހޭ ކަމަށް އޭނާ ވިދާޅުވިއެވެ.

މީގެ އިތުރުން ރޮޒައިނާ ވިދާޅުވީ، ޒުވާނުން ލޯޔަރުކަން ކިޔަވަނީ މުސްތަގުބަލުގައު ފަނޑިޔާރަކަށް ވުމުގެ އުއްމީދުގައި ކަމަށާ، ނަމަވެސް، މިހާރު ފެންނަމުންދަނީ އެ ހައްގު އަންހެން ކުދިންގެ ކިބައިން ނިގުޅައިގަންނަން މަސައްކަތް ކުރަމުންދާ ތަން ކަމަށެވެ. އަދި އެގިތަށް ކަންކަން ކޮށްގެން ނުވާނެ ކަމަށާ ޒުވާން އަންހެން ކުދިންވެސް އެކަމާމެދު ވިސްނާަލަންޖެހޭ ކަމަށް ވިދާޅުވުއެވެ.