ސްކޮޑްރާ މެޗު ދޫކޮށްލުމުން ކުރެންދޫ މެޗުން މޮޅުވިކަމަށް ނިންމައިފި

ވިލިމާލޭގައި މިހާރު ކުރިއަށްދާ "އޮބިއަން ޓީއެފްޓީ 11 ވަނަ ރަމަޟާން ފުޓްސަލް ޗެލެންޖު 2024" ގައި ހޮނިހިރު ދުވަހުގެރޭ ކުޅުމަށް ތާވަލުކުރެވިފައި އޮތް ގުރޫޕް އޭގެ ސްކޮޑްރާ އާއި ކުރެންދޫގެ މެޗު ސްކޮޑްރާ އިން ދޫކޮށްލުމުން 2-0 ގެ ނަތީޖާއަކުން ކުރެއްދޫ މެޗުން މޮޅުވިކަމަށް ނިންމައިފި އެވެ.

މުބާރާތުގައި ސްކޮޑްރާ އިން ކުޅުނު ފުރަތަމަ މެޗުގައި ޓީއެންޓީ އަތުން 9-0 ގެ ތަފާތުބޮޑު ނަތީޖާއަކުން އެޓީމު ބަލިވިއިރު، ދެވަނަ މެޗުގައި އާރުޑީއެލް އެސްސީ އަތުން އެޓީމު ބަލިވީ 5-2 ގެ ނަތީޖާއަކުންނެވެ. އަދި ކުރެންދޫ އިން ކުޅުނު ފުރަތަމަ މެޗުގައި 4-3 ގެ ނަތީޖާއަކުން އާރުޑީއެލް އެސްސީ އަތުން އެޓީމު ބަލިވިއިރު، ދެވަނަ މެޗުގައި ޓީއެންޓީ އަތުން އެޓީމު ބަލިވީ ވާދަވެރި ކުޅުމަކަށްފަހު 2-1 ގެ ނަތީޖާއަކުންނެވެ.

މިނަތީޖާއާއެކު ތިން މެޗުން ކުރެންދޫއަށް ތިން ޕޮއިންޓް ލިބިފައިވާއިރު އެޓީމުން މުބާރާތް ނިންމާލީ ގުރޫޕްގެ ދެވަނައިގައި އޮވެއެވެ. އަދި ކުޅުނު ތިން މެޗުން ވެސް ބަލިވެ ސްކޮޑްރާ އިން މުބާރާތް ނިންމާލީ ޕޮއިންޓެއް ނުލިބި ގުރޫޕްގެ ފުލުގައި އޮވެއެވެ.

މިގުރޫޕުން ދެވަނަ ބުރުގެ ޖާގަ ހޯދީ ޓީއެންޓީ އަދި އާރުޑީއެލް އެސްސީ އެވެ. އަދި ގުރޫޕް އޭގެ ފަހު މެޗުގައި މިރޭ މިދެޓީމު ވާދަކުރާއިރު މެޗުން މޮޅުވާ ޓީމަކަށް ގުރޫޕްގެ އެއްވަނަ ލިބިގެންދާނެއެވެ. އަދި މިމެޗު އެއްވަރުވެއްޖެނަމަ ލަނޑުގެ ތަފާތުން ގްރޫޕްގެ އެއްވަނަ ލިބޭނީ ޓީއެންޓީ އަށެވެ.

ޗެންޕިއަން ޓީމަށް 50,000 އަދި ރަނަރަޕް ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު 32 ޓީމަކުން ބައިވެރިވެފައިވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 32 ޓީމު 8 ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ދެވަނަ ބުރަށް ހޮވޭގޮތަށެވެ.

މިމުބާރާތުގެ މެއިން ސްޕޮންސަރ އަކީ އޮބިއަން އެވެ. އަދި މުބާރާތުގެ މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.