އާރަށް މައްސަލަ: އައު ހެކިތައް ހުށަހަޅަންޖެހުނީ ދިފާއީ ހެކިން ދޮގު ހަދާފައިވާތީ: ދައުލަތް

ވ.އާރަށް މައްސަލަ ކުރިއަށް ދަނިކޮށް ދައުލަތުގެ ފަރާތުން އައު ހެކިތަކެއް ހުށަހަޅާފައިވަނީ، ދިފާއުން ހުށަހެޅި ހެކިވެރިން ދޮގު ހަދައި، އެ ފަރާތްތައް ދެއްކެވި ވާހަކަ ތަކުގައި ސުވާލު އުފެދޭ ކަންކަން ހުރުމުން ކަމަށް ދައުލަތުން ބުނެފިއެވެ.

ވ އާރަށް މައްސަލާގައި ކުރީގެ ރައީސް އަބްދުالله ޔާމީންގެ މައްޗަށް  ރިޝްވަތު ހިފުމާއި މަނީ ލޯންޑަރިންގެ ތުހުމަތު ސާބިތުވެފައިވާ ކަމަށް ކަނޑައަޅައި 2022 ވަނަ އަހަރު އިއްވި 11 އަހަރުގެ ޖަލު ހުކުމް ބާތިލުކޮށް މައްސަލަ އަލުން ބަލަން ހައިކޯޓުން އަންގާފައުވާއިރު، ހައިކޯޓުގެ ނިންމުމުގައި މައިގަނޑު 3 ކަމެއް އަންގާފައިވެއެވެ.

އެއީ؛

1) ޝަރީއަތުގެ ކުރީގެ ހުށަހެޅުންތަކަށް އަލުން ފުރުސަތުދީ އެކަމަށް ގޮތް ނިންމުން

2) ދައުލަތުގެ އައު ހެކިތައް އެއްފަރާތް ކުރުން

3) ދަށު ކޯޓުގެ ރިޕޯޓުގެ 68 ވަނަ ނުކުތާގައި ނެރެފައިވާ ދޭހަ އެއްފަރާތްކޮށް، އަލުން ކްރިމިނަލް ކޯޓުން މައްސަލައިގެ ގޮތެއް ކަނޑައެޅުން

ހައިކޯޓުގެ ހުކުމުގައި ދައުލަތުގެ އައު ހެކިތައް އެއް ފަރާތް ކުރުމަށް އަންގާފައިވާ އެންގުން ބާތިލް ކިރަން ދައުލަތުން ވަނީ ސްޕްރީމް ކޯޓުގައި އިސްތިއުނާފު ކޮށްފައެވެ.

އެ މައްސަލައިގެ އަޑުއެހުމެއް މިއަދު ސްޕްރީމް ކޯޓުގައި ވަނީ ކުރިއަށް ގެންގޮސްފައެވެ.

އެ އަޑު އެހުމުގައި ވާހަކަ ދައްކަވަމުން ދައުލަތުގެ ވަކީލް ވިދާޅުވީ، ޝަރީއަތް ކުރިއަށް ދަނިކޮށް އައު ހެކިތަކެއް ހުށަހެޅުމަކީ އަލަށް ކުރާ ”އީޖާދީ ކަމެއް ނޫން“ ކަމަށެވެ. އަދި އައު ހެކި ތަކެއް ހުށަހަޅަން ޖެހުނު ސަބަބުތަކުގެ ތަފްސިލްވެސް ވަކީލު ވަކީ ހާމަކޮށްދެއްވާފައެވެ.

އައު ހެކިތައް ހުށަހެޅި މައިގަނޑު ސަބަބަކީ ދިފާޢީ ހެކިން ދެއްކި ވާހަކަތަކުގައި ސުވާލު އުފެދޭ ދޮގު ވާހަކަތަކެއް ހުރިކަމަށް ފާހަގަވެގެން ބެލި ބެލުމުން އެކަމާ ގުޅޭ ހެކިތަކެއް އަޅުގަނޑުމެންނަށް ފާޅުވީ

ދައުލަތް

އޭގެ ތަފްސީލަށް ވަޑައިގަންނަވަމުން ދައުލަތުގެ ވަކީލް ވިދާޅުވީ، މައްސަލައިގެ ތަހްގީގުގައި ރައީސް ޔާމީނާއި ޔޫސުފް ނަޢީމް ހާޒިރުކޮށް އެ މައްސަލައާއި ގުޅޭ މާއުލޫމާތު ފޯރު ކޮށްދީ، ކުރެވޭ ތުހުމަތު ތަކާއި ގާނޫނުގެ ދަށުން ދިފާޢަށް ލިބިދޭ ހައްގުތައްވެސް ކިޔައިދެވުނު ކަމަށެވެ. އެގޮތުން، ހަނު ހުރުމުގެ ހައްގުތަކެއް ވާ ކަމަށް ބުނެދެވުނު ކަމަށާ އެހެން ނަމަވެސް ތަހުގީގުގައި ތިމާއާ އެއްކޮޅަށް ހާމަކުރެވެން ހުރި ވާހަކައެއް ހުރި ނަމަ ހާމަ ކުރެވޭނެ ކަމަށް ކިޔައިދީފައިވާ ކަމަށް ވިދާޅުވިއެވެ. އެއާއެކު ރައީސް ޔާމީނާއި ޔޫސުފް ނައީމްވެސް ހަނު ހުރުމުގެ ހައްގު ބޭނުން ކުރެއްވިކަން ވަކީލް ފާހަގަކުރެއްވިއެވެ.

އެހެން ނަމަވެސް އެއް މިލިއަން ޑޮލަރުގެ ވާހަކަ މި ދައްކަނީ. އަދި މި އެއް މިލިއަން ޑޮލަރަކީ ކޮން ފައިސާއެއްތޯ ތަހުގީގުގައި މި ސުވާލު ކުރަނީ. ތިމާއާ އެއްކޮޅަށް ބޭނުން ކިރެވޭނެ މައުލޫމާތެއް ހުރިއްޔާ ހާމަ ކުރާށޭ… ހަނު ހުންނެވުމަށްފަހުގައި ޝަރީއަތަށް ވަޑައިގެން ވިދާޅުވީ، އެ އެއްމިލިއަން ޑޮލަރަކީ ޑޮލަރު މާރު ކުރުމަށް ދިން އެއް މިލިއަން ޑޮލަރޭ. ހަގީގަތަކީ ޖިނާޢި އިޖުރާއަތުގެ  47 ވަނަ މާއްދާގެ ބ ގެ ބޭނުމަށް މި މައުލޫމާތު ތަހުގީގު މަރުހަލާގައި ހާމަކުރަން ޖެހޭނެ އޭ. އެއީ ތިމާއާ ދެކޮޅަށް ބޭނުން ނުކުރެވޭނެ މައުލޫމާަތަށް ވާތީ.

ދައުލަތް

ޑޮލަރު މާރު ކުރުން ދިފާއުގެ ގޮތުގައި ހާމަކުރައްވައި، އެކަން ސާބިތު ކުރެއްވުމަށް ރައީސް ޔާމީންގެ ފަރާތްޕުޅުން ޝަރީއަތުގެ މަރުހަލާގައި ހެކި ތަކެއް ހާމަކުރެއްވި ކަމަށާ، އެ ހެކިތައް ހާމަ ކުރެވުނު ހިސާބުންވެސް އެ ހެކިންނާމެދު ޝައްކުގެ ނަޒަރުން ބެލުމުގެ ފުރުސަތު ގާނޫނުން ހުޅުވައިދޭ ކަމަށް ދައުލަތުން ވިދާޅުވިއެވެ.

އަދި އެ ހުށަހެޅުއްވި ހެކިންގެ ހެކިބަހުގައުވެސް ހަމަނުޖެހޭ ކަންކަން ހުރިކަން ފާހަގަވެގެން ދިޔަ ކަމަށާ އެކަމުގެ ސަބަބުން ޝަރީއަތަށް އައު ހެކިތަކެއް ހުށަހެޅުމުގެ ފުރުސަތެއް ހުޅުވިގެންދާ ކަމަށް ދައުލަތުން ވިދާޅުވިއެވެ.