ޔަހޫދީން ހަމަލާދީ ޝަހީދުކޮށްލި ރީމްގެ ކާފައަށް ކާފަދަރިޔަކު ލިބިއްޖެ

ޔަހޫދީން ދިން ލާއިންސާނީ ހަމަލާގައި ޝަހީދުވި ތިން އަހަރުގެ ރީމްގެ ކާފަ، ޚާލިދު ނަބްހާން އަށް ކާފަދަރިޔަކު ލިބިއްޖެއެވެ.

ނަބްހާނުގެ ދަރިފުޅު ދިއާއަށް ލިބުނު އަންހެން ދަރިފުޅު ރުޖަދު އުފަންވެފައިވަނީ މިމަހުގެ 7 ވަނަ ދުވަހުއެވެ.

އެކަމުގެ އުފަލާއިއެކު، ނަބްހާން ވަނީ ތުއްތު ތުއްތު ރުޖަދު އުރާލައިގެން ހުރި ވީޑިއޯއެއް އޭނާގެ އިސްޓްރަގްރާމަށް ދޫކޮށްލާފައެވެ. މި ވީޑިއޯގައި ރުޖަދުގެ ކަންފަތްކައިރީގައި ނަބްހާން ބަންގި ގޮވައި، ތަލީގައި ކަނދުރު ޖައްސާތަންވެސް ފެނިގެންދެއެވެ.

ޣައްޒާގެ ދެކުނުގައި ހުންނަ ނުސައިރަތު ކޭމްޕަށް އަމާޒުކޮށް މިދިޔަ އަހަރުގެ ނޮވެމްބަރު މަހުގެ ތެރޭގައި ޔަހޫދީން ދިން ހަމަލާގައި ރީމް ޝަހީދުވިއިރު، ނަބްހާން ސިފަކުރި ގޮތުގައި ރީމް އަކީ އޭނާގެ ރޫހުގެ ދިރުމެވެ.

ރީމްގެ ފުރާނަނެތް ހަށިގަނޑު އުރާލައިގެން ހުރެ ވަދާއީ ސަލާމް ކުރަމުން ނަބްހާން ވަނީ އޭނާގެ ތުނބުޅިން ރީމްގެ މޫނުގައި ހުރި ލޭތައް ފޮހެ، ދެލޮލަށް ބޮސްދީހަދާފައެވެ.

ރީމް އާއިއެކު، ޔަހޫދީންގެ މިހަމަލާގައި ރީމްގެ 5 އަހަރުގެ ބޭބެ، ތާރިގު ވެސް ޝަހީދުވިއެވެ. އެމީހުން ނިދާފައި ތިއްބާ އެގެޔަށް ދިން ހަމަލާގައި ރީމްގެ މަންމަ ވެސް ވަނީ ވަރަށް ބޮޑަށް ޒަހަމްވެފައެވެ. ނަބްހާން ބުނި ގޮތުގައި އޭނާއާއި ވަކިވެގެން ދިޔަ ދެ ކާފަދަރިންނަކީ އޭނަގެ ފުރާނައިގެ ދިރުމެވެ.