މަޖިލީހުން ފާސްކުރި ބަޖެޓުގައި ހިނގަ ހިނގާ ހުންނަ މަޝްރޫއު ނިންމުމާ ގާތަށް ވެސް ފައިސާ ހިމަނާފައި ނެތް: ރައީސް

މި އަހަރަށް ލަފާކޮށް، ރައްޔިތުންގެ މަޖިލިހުގެ މެޖޯރިޓީ އޮންނަ އެމްޑީޕީން ފާސްކޮށްފައި އޮތް ބަޖެޓުގައި ހިނގަ ހިނގާ ހުންނަ މަޝްރޫއުތަކަށް އެކަށީގެންވާ މިންވަރަށް ބަޖެޓުގައި ހިމަނާފައި ނުވާ ކަމަށް ވިދާޅުވެ، ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އުތުރުގެ ބައެއް ރަށްތަކަށް ރައީސް ޑރ. މުހައްމަދު މުޢިއްޒު ކުރައްވަމުންދާ ރަސްމީ ދަތުރުފުޅުގައި ދިއްދޫ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން އެމަނިކުފާނު ވަނީ، އިންތިގާލީ މަރުހަލާގައި ބަޖެޓުގައި އައު ސަރުކާރުން ހިމަނަން ބޭނުން ކަންކަން ހިމެނުމަށް ލިބުނީ ވަރަށް ކުޑަ ދުވަސްކޮޅެއް ކަން ފާހަގަކުރައްވާފައެވެ.

އަދި ބަޖެޓްގައި މި ސަރުކާރުން ހިމަނަން ފޮނުއްވި ކަންކަން، "އެމްޑީޕީ މެޖޯރިޓީ އޮންނަ މާލިއްޔަތު ކޮމިޓީން ފާސްކުރީ އެބޭފުޅުން ބޭނުން ގޮތެއް" ހަދާލާފައި ކަމަށް ރައީސް ވިދާޅުވިއެވެ.

"މީގެކުރިން ހިނގަ ހިނގާ ހުންނަ މަޝްރޫއު، ސޮއިކޮށްފައި ހުންނަ މަޝްރޫއުތަކަށް އަބަދުވެސް ބަޖެޓުގައި ހިމަނާނެ އެ މަޝްރޫއު ނިންމޭ ވަރަށް ފައިސާ. މި ފަހަރު އެބޭފުޅުން ފާސްކޮށްފައި އަޅުގަނޑުމެންނަށް ދިން ބަޖެޓުގައި އެކަން އޮތީ އެހެނެއް ނޫން. ހިނގަ ހިނގާ ހުންނަ މަޝްރޫއު ނިންމުމާ ގާތަށް ވެސް ނެތް ފައިސާ ހިމަނާފައި."

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މިއާއެކު ރައީސް ޑރ. މުއިއްޒު ވިދާޅުވީ އާއްމު ގޮތެއްގައި އަލަށް ފަށާ މަޝްރޫއުތަކަށް ގިނަ ފަހަރު ހުންނާނީ ކިރިޔަ ކިރިޔާ މަޝްރޫއުތައް ފެށޭ ވަރަށް ފައިސާ ހިމަނައިފައި ކަމަށާ، އެހެން ނަމަވެސް ހިނގަ ހިނގާ ހުރި މަޝްރޫޢުއެއް ނަމަ، އެކަމެއް ނިންމޭވަރަށް ފައިސާ ހިމަނާފައި ހުންނާނެ ކަމަށެވެ.

"އެކަމަކު، ހިނގަ ހިނގާ މަޝްރޫއު ނިމޭ ވަރަށް، ކުރީ އަހަރު ފެށިފައި ހުރި މަޝްރޫއެއް ވިއްޔާ، މި އަހަރު މަޝްރޫއު ނިންމޭ ވަރަށް އެ ފައިސާ މީގެކުރީގައި ހިމަނާ. ނަމަވެސް އެމްޑީޕީގެ ސުޕަ މެޖޯރިޓީ އޮވެގެން އަޅުގަނޑުމެންގެ އެއްވެސް ބާރެއް ނުހިނގާ ރައްޔިތުންގެ މަޖިލިހުގެ ތެރެއިން ބަޖެޓު ހަދާފައި މިއޮތީ މި ދެންނެވީ މި ރަށުގައި އާއި ދެން ހުރި ރަށްރަށުގައި %15 ވަރަކަށް ޕަސަންޓު ވެސް ފައިސާ ނުދެވޭ ވަރަށް. ދެން ކިހިނެއްތޯ ހަދާނީ އަޅުގަނޑުމެން. މަޝްރޫޢު ފެށިފައި މިހާރު މި މަޑުޖެހެނީ. ފައިސާއެއް ނެތް. ދެން އަނެއްކާ އަންނަ އަހަރަށް މަޑު ކުރަންވީތޯ؟ އެހެން ހަދާފައި މިއޮތީ. މިއީ އަލަށް ރާއްޖޭގެ ބަޖެޓް ހެދުމުގެ ތާރީޚްގައި ކުރި ކަމެއް"

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

އެހެންކަމުން، މަޖިލީހުގެ ތެރެއިން ކަންކަން ކުރަމުން އަންނަ ގޮތް ރައްޔިތުންނަށް އެނގެން އެމާނިކުފާނު ބޭނުންފުޅު ވާކަމަށާ، ރައްޔިތުން ހޮވާފައިވާ ސަރުކާރަށް މަޖިލީހުގެ ތެރެއިން ކުރަމުންދާ ދަތިތައް ރައްޔިތުންނަށް އެނގެން ބޭނުންވާ ކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ، ކައުންސިލް ތަކާއި ބައްދަލު ކުރުމުން، މަޝްރޫޢުތައް ލަހުން ހިނގާ ވާހަކަ އާއި މަޑުޖެހިފައި އޮންނަ ވާހަކަ ކައުންސިލް ތަކުން ފާހަގަކުރަނީ ބަޖެޓްގެ އެ ދަތި ކަމާއި އެކު، ހަގީގަތުގައި ވެސް އެހެން އެކަން ވެފައި އޮތުމުން ކަމަށެވެ.

"މިސާލަކަށް މި ރަށުގެ މަގު ހެދުމުގެ މަޝްރޫއު ވަރަށް ލަސްކޮށް ހިނގަނީ. އެހެން ރަށެއްގައި މިއޮތީ ބަނދަރެއްގެ މަސައްކަތް ފެށިފައި، ހުއްޓިފައި، ނުވަތަ ކިރިޔަ ކިރިޔާ ކުޑަކޮށް މި ހިނގަނީ. އެ ހިނގަނީ އެހާ ލަސްކޮށް ކީއްވެގެން؟ ބަޖެޓުގައި މި ދެންނެވިހެން އޮންނަނީ ކުޑަކުޑަ އަދަދެއް ހިމަނާފައި. މިއީ ފެށިފައި އޮތް މަޝްރޫއެކޭ އެކަމަކު. އެ މަޝްރޫއަށް އެހާ މަދުން ފައިސާ ހިމެނީމަ އަޅުގަނޑުމެންނަށް ބިލްތައް ރެއިޒްކޮށް ޕީއޯ ހަދައިގެން ނޫނީ އެ އޮންނަ އުސޫލުން ފައިސާ ދެވޭނެ ގޮތެއް ނޯވޭ. ކުޑަކުޑަ އަދަދެއްގެ ފައިސާ ދެވޭ ނަމަ، މަޝްރޫއު ހިނގާނީ ކޮންޓްރެކްޓާސް ވެސް ލަހުން ނޫންތޯ؟ އެއީ ހަމަ ވިޔަފާރިއަށް އެމީހުން މަސައްކަތް ކުރާނީ."

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މިއާއެކު ރައީސް ވަނީ އެ ތާށި ކަމާއިއެކުވެސް މަޝްރޫއުތައް މަޑުނުޖެހި ކުރިއަށް ގެންދެވޭނެ މަގުތައް ހޯދުމުގެ މަސައްކަތް ކުރަމުން އަންނަ ކަމަށެވެ.

އަދި ކުރިއަށް ރައްޔިތުންގެ މަޖިލިހުގެ އިންތިހާބު ބޯމަތީގައި އޮތް އިރު، އެފަދަ ކަން ކަނަޖީ ރައްޔިތުން ވިސްނަންޖެހޭ ކަންކަން ކަމަށާ ސަރުކާރާއި ރައްޔިތުންގެ ވިސްނުމާ އެއްގޮތަށް މަސައްކަތް ކުރާނެ ބަޔަކު މަޖިލިހަށް ހޮވަން ޖެހޭ ކަމަށް ރައީސް ވިދާޅުވި އެވެ.