މައުމޫންގެ ސުވާލެއް: އާއަހަރުގެ މެސެޖަކީ ހެއްދެވި ނެހެއްދެވިޔަށް ގޮވުމަށް ލިބޭ ފުރުޞަތެއްބާ؟
ލިޔުންތެރިޔާ
އަހުމަދު ހަމީދު އާދަމް
އާ އަހަރުގެ މެސެޖަކީ އެއްބަޔަކު އަނެއް ބަޔަކަށް ހެއްދެވި ނެހެއްދެވިޔަށް ގޮވުމަށް ލިބޭ ފުރުސަތެއްތޯ ކުރީގެ ރައީސް މައުމޫން އަބްދުލްގައްޔޫމް ސުވާލު ކުރައްވައިފި އެވެ.
އެމަނިކުފާނު އެ ސުވާލު ކުރެއްވީ އެކްސްގައި މިރޭ ކުރެއްވި ޕޯސްޓެއްގަ އެވެ. އެ ޕޯސްޓްގައި ވަނީ އާ އަހަރުގެ މެސެޖަކީ އެއްބަޔަކު އަނެއް ބަޔަކަށް ހެއްދެވި ނެހެއްދެވިޔަށް ގޮވުމަށް ލިބޭ ފުރުސަތެއްތޯ ސުވާލު ކުރައްވާފަ އެވެ. އަދި ތަސައްރަފު ފުދޭ ބަޔަކަށް ވާން ނުޖެހޭތޯ ސުވާލު ކުރައްވާފައިވެ އެވެ.
މީގެ އިތުރުން އެކަކު އަނެކަކަށް ކަމާހިތާ ތަހުޒީބު ބަޔަކަށް ވާން ނުވޭތޯ ވެސް ސުވާލު ކުރެއްވި އެެވެ.
"އަޅުގަނޑުމެން ތަންކޮޅެއް ތަސައްރުފު ފުދޭކަށް ނުވޭބާ؟ ހަމަޖެހިލައިގެން އެކަކު އަނެކަކަށް ކަމޭހިތާ ތަހުޒީބު ބަޔަކަށް ވާކަށް ނުވޭބާ," ރައީސް މައުމޫންގެ ޕޯސްޓްގައި ވެ އެވެ.
ރައީސް މައުމޫން އެފަދަ ޕޯސްޓެއް ކުރެއްވި ސީދާ ސަބަބެއް ސާފެއް ނުވެ އެވެ.
ދިވެހި މުޖްތަމައުގެ ހާލަތު މިހާރު އޮތް ގޮތާމެދު ގިނަ ބަޔަކު ވަރަށް ކަންބޮޑުވެ އެވެ. ޚާއްސަކޮށް ބައެއް މީހުން އެއް ބަޔަކު އަނެއް ބަޔަކަށް މުޚާތަބު ކުރުމުގައި ގެންގުޅޭ ދެރަވަރު ބަސްމަގު ގިނަ ބަޔަކު ފާހަގަ ކުރެ އެވެ.
އަދި ތިމާ ނުރުހޭ ކޮންމެ މީހަކާ ދިމާކުރުމާއި ހިތަށް އެރިހާ ތުހުމަތެއް ކުރުމާއި އެ ނޫން އެފަދަ އެތައް ކަމެއް ވަނީ ހައްދުފަހަނައަޅާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
