ރައްޔިތުންނާ ހިސާބަށްދާން ބިރުގަންނަ ނަމަ، އެ ސިޔާސީ ކަންކަމަށް ކުފޫ ހަމަނުވަނީ: ހަލީލް

ޑިމޮކްރެޓިކް ވެއްޓެއްގައި ރައްޔިތުންގެ ރުހުން ލިބިގެން ނިންމަންޖެހޭ ކަންކަމުގައި ރައްޔިތުންނާ ހިސާބަށްދާން ބިރުގަންނަ ނަމަ އޭގެން ދައްކުވައިދެނީ ސިޔާސީ ކަންކަމަށް ކުފޫ ހަމަނުވުންކަމަށް ހާރިޖީ ވަޒީރު ޑރ.އަބްދުﷲ ހަލީލް ވިދާޅުވެއްޖެއެވެ.

ކޮންގްރެސް ޕާޓީން މިރޭ ހުޅުމާލެ މެދު ދާއިރާގެ ކެމްޕެއިން ޖަގަހަ ހުޅުވުމުގެ ހަފްލާގައި ވާހަކަދައްކަވަމުން ހާރިޖީ ވަޒީރު ވަނީ، ދެ އިންތިހާބު އެއްދުވަހެއްގައި ބޭއްވުމަށް ރައްޔިތުންގެ ހިޔާލު ހޯދުމަށް ނަގާވޯޓަށް އިދިކޮޅު އެމްޑީޕީން ދެކޮޅު ހަދަމުންދާތީވެ އެކަމާ ގުޅޭގޮތުން ބައެއް ކަންކަން ފާހަގަކުރައްވާފައެވެ. ވަޒީރު ހަލީލް ވިދާޅުވީ، ކުރަން މިއުޅޭ ކަމަކީ ދެ އިންތިހާބު އެއްދުވަހެއްގައި ބޭއްވުމާ ގުޅޭގޮތުން ރައްޔިތުންގެ ހިޔާލު ހުރިގޮތެއް ބެލުންކަމަށާއި، މިކަމުންވެސް އެނގެނީ ސަރުކާރުގެ ނުވަތަ މަޖިލީހުގެ މެމްބަރުންގެ އޮތް އިހުލާސްތެރިކަން ކަމަށެވެ. އެހެންކަމުން މިކަމުގައި ކަންބޮޑުވާންޖެހޭ ކަމެއް ނެތްކަމަށް ވަޒީރު ވަނީ ފާހަގަކުރައްވާފައެވެ.

ހާރިޖީ ވަޒީރު ވިދާޅުވީ، މިކަމަކީ ރައްޔިތުންނާ ހަމަޔަށް ނުގޮސްވެސް ޤާނޫނު އަސާސީއަށް އިސްލާހު ގެނެސްގެން ނިންމޭގޮތަށް އޮތް ކަމެއް ކަމަށެވެ.

މި ތިއްބެވި މެންބަރުންނާ އެކު ގާނޫނު އަސާސީއަށް ބަދަލު ގެނެސްގެން ރައްޔިތުންނާ ހިސާބަށް ނުގޮސްވެސް މިކަން ނިންމެން އެބައޮތް. އެކަމަކު ތެދުވެރިވީމަ، ރައްޔިތުންނާ އިހްލާސްތެރިވީމަ ރައްޔިތުން ކައިރިއަށް ގޮސް މި އަހަނީ ރައްޔިތުން ބޭނުންވަނީ ކޮންގޮތެއްތޯއޭ

ހާރިޖީ ވަޒީރު ޑރ.އަބްދުﷲ ހަލީލް.. ފޮޓޯ: ޕީއެންސީ

ވަޒީރު ވިދާޅުވީ މިބާވަތުގެ ކަންކަމުގައި ރައްޔިތުން ކައިރިއަށް ދާތީ ބިރުގަންނަން ޖެހޭނެ ސަބަބެއް ނެތްކަމަށާއި، ރައްޔިތުންނާ ހިސާބަށް ދިއުމަށް މިގޮތަށް ބިރުގަންނަ ކަމަށްވަންޏާ އޭގެ މާނައަކީ ސިޔާސީ ކަންކަމަށް ކުފޫ ހަމަ ނުވަނީކަމަށެވެ.

އަދުގެ ސަރުކާރުން ކަންކަން ކުރަނީ ދިވެހި ވަންތަ ދިވެހިރާއްޖެއެއް ބިނާކުރަންކަން ފާހަގަކުރައްވަމުން ވަޒީރު ވިދާޅުވީ، މި ސަރުކާރަށް ނިސްބަތްވާ ވަޒީރަކު، މެންބަރަކު، މި ރާއްޖެ ބަދުނާމު ކުރުމަށްޓަކާ މަސައްކަތެއް ނުކުރާނެކަމަށެވެ.

ސަރުކާރުގައި ތިއްބެވީ އެއަށްވުރެ މާ ގައުމީ ވަންތަ ބައެއްކަން ފާހަގަކުރައްވަމުން ވަޒީރު ވިދާޅުވީ، ރާއްޖެއިން ބޭރަށް ކުރާ ދަތުރުތަކުގައި އިދިކޮޅު ފަރާތްތަކުން ރާއްޖެ ބޮއިކޮށްކުރުމަށް ކޮށްފައި ހުންނަ މަސައްކަތްތައް ވަރަށްބޮޑަށް ފާހަގަކުރެވޭ ކަމަށެވެ. އެގޮތުން އެފަރާތްތަކުގެ އެކަންކަން ފާހަގަކުރެވުމުން އެބައިމީހުންނަކީ ދިވެހި ލޭހިނގާ ދިވެހި ރައްޔިތުންބާއޭ ސުވާލު ކުރެވޭކަމަށް ވަޒީރު ފާހަގަކުރެއްވިއެވެ.

ބައެއް ބޭފުޅުން ވިދާޅުވެފަ އެބައޮތް ތިމަންނަމެންނާ ހިސާބަށް އައިސަ އެބައޮތޭ ރާއްޖެއަށް ޓޫރިސްޓުން ތި ގައުމަށް ފޮނުވުން ހުއްޓާލަދޭށޭ.ކިހާ ނުބައި ވާހަކައެއްތޯ މިދައްކަނީ؟ އަޅުގަނޑު މިދައްކަނީ އަޅުގަނޑުމެން ގޭގަ މިތިއްބެވި އަޅުގަނޑުމެންގެ މައިންނާ ދަރިންނަށް އާމްދަނީގެ ގޮތުގަ ލިބޭ ފައިސާކޮޅު ހުއްޓުވާލަދޭ ވާހަކައޭ ބޭރުގެ ގައުމުތަކަށް ގޮސްފަ މިދައްކަނީ.

ހާރިޖީ ވަޒީރު ޑރ.އަބްދުﷲ ހަލީލް

ވަޒީރު ވިދާޅުވީ އަދުގެ ސަރުކާރުގެ ހާރިޖީ ސިޔާސަތާއެކު ބައިނަލްއަޤްވާމީ ދުނިޔެއާ ރާއްޖެއާ ދެމެދު އޮތް ގުޅުން ވަރުގަދަވެގެން ހިނގައްޖެކަމަށެވެ.

ސްރާއީލް ފިޔަވައި ދިވެހިރާއްޖެއާ ގާތުން މަސައްކަތްކަތް ކުރާ ހަމަ ކޮންމެ ޤައުމަކާއެކު ރާއްޖެއިން ގާތްގުޅުން ބާއްވާނޭކަން ފާހަގަކުރައްވަމުން ވަޒީރު ވަނީ، ވިސްނުން ތަފާތުވި ނަމަވެސް މި ގައުމު ދެކެވާ ލޯބި އަޅުގަނޑުމެން ކަފުން ކޮށްގެން ނުވާނެކަމަށެވެ.

މިރޭ ބޭއްވި މި ހަފްލާގައި ވަނީ ހުޅުމާލެ މެދު ދާއިރާގެ ކެމްޕެއިން ޖަގަހަ ހުޅުވާފައެވެ. މި ޖަގަހަ ހުޅުވައިދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދެވެ.