1447 ވަނަ އަހަރުގެ ޙައްޖު؛ މިނާގައި ދިވެހިންނަށް ޚާއްސަ ފާޚާނާތައް އިތުރުކޮށް ޙައްޖާޖީންނަށް ބޮޑެތި ލުއިތަކެއް

1447 ވަނަ އަހަރުގެ ބަރަކާތްތެރި ޙައްޖުގެ އަޅުކަމަށް ރާއްޖެއިން ދާ ޙައްޖާޖީންނަށް ލިބިދޭ ޚިދުމަތްތަކުގެ ފެންވަރު މަތިކުރުމަށްޓަކައި، މޯލްޑިވްސް ޙައްޖު ކޯޕަރޭޝަނުން ބޮޑެތި މަސައްކަތްތަކެއް ކުރަމުން ކަމަށް މޯލްޑިވްސް ޙައްޖު ކޯޕަރޭޝަނުން ބުނެފިއެވެ.

ޙައްޖު ކޯޕަރޭޝަންގެ ޑީއެމްޑީ ޢަލީ ޝަރީފް ވިދާޅުވި ގޮތުގައި މިފަހަރު އެންމެ ބޮޑު އިސްކަމެއް ދެނީ ޙައްޖާޖީން އެންމެ ގިނަ ވަގުތު ހޭދަކުރަންޖެހޭ މިނާގެ ޓެންޓުތަކުގެ އިންތިޒާމުތައް މިހާރަށްވުރެ ފުރިހަމަކޮށް، ޙައްޖާޖީންނަށް ބޭނުންވާ އަސާސީ ޚިދުމަތްތައް އެންމެ މަތީ ފަންތީގައި ފޯރުކޮށްދިނުމަށް ކަމަށެވެ. އެގޮތުން މިދިޔަ އަހަރުގެ ތަޖުރިބާއަށް ބަލައި، މި އަހަރުގެ އިންތިޒާމުތައް މީގެ ކުރިން ދުވަހަކުވެސް ނުވާހާ ފުރިހަމަވާނެ ކަމަށް އެ ކޯޕަރޭޝަނުން ބުނެއެވެ.

އޭގެ ތަފްސީލް ދެއްވަމުން ޝަރީފް ވިދާޅުވީ، މިނާގައި ދިވެހި ޙައްޖާޖީން ތިބޭ ސަރަޙައްދުގެ ފާޚާނާތަކަށް ބޮޑު ބަދަލެއް ގެނައުމުގެ މަސައްކަތް މިހާރު ފަށާފައިވާ ކަމަށެވެ. އެގޮތުން މިހާތަނަށް 60 އަށްވުރެ ގިނަ ފާޚާނާގެ މަސައްކަތް ނިމިފައިވާއިރު، މި ފާޚާނާތަކަކީ ހަމައެކަނި ދިވެހި ޙައްޖާޖީންނަށް ޚާއްޞަ ކުރެވިފައިވާ ތަންތަން ކަމަށް ވިދާޅުވިއެވެ.

ޝަރީފް ވިދާޅުވިގޮތުގައި އަންހެން އަދި ފިރިހެން ބޭފުޅުންނަށް ވަކިން ފާޚާނާ ބަރިތައް ހުންނައިރު، ވުޟޫ ކުރުމަށްޓަކައި ފާޚާނާތަކުގެ ތެރޭގައި ވަކި ޚާއްޞަ ސަރަޙައްދުތަކެއް ވަނީ ކަނޑައަޅާފައެވެ. މިއީ ފާޚާނާ ބޭނުންކުރުމުގައި ދިމާވާ ކިއޫތައް ކުޑަކޮށް، ޙައްޖާޖީންނަށް ފަސޭހަކޮށްދިނުމަށް އެޅި ފިޔަވަޅެއްކަން އޭނާ ފާހަގަކުރެއްވިއެވެ.

މޯލްޑިވްސް ޙައްޖު ކޯޕަރޭޝަނުން 1447 ވަނަ އަހަރުގެ ޙައްޖުގެ އަޅުކަމާއި ގުޅޭގޮތުން އެކްސްގައި ދިން މައުލޫމާތު

ޙައްޖާޖީންގެ އަރާމާއި ފަސޭހައަށްޓަކައި ޓެންޓުތަކުގެ އެތެރެއާއި ބޭރުގެ މާޙައުލަށް ވެސް ވަނީ މުހިންމު ބަދަލުތަކެއް ގެނެސްފައެވެ.

އެގޮތުން ޝަރީފް ވިދާޅުވީ، ޓެންޓުތަކުގެ ތެރޭގައި މިފަހަރު ބޭނުންކުރާ ސޯފާ ބެޑްތައް ފްލެޓް ބެޑްތަކަށް ބަދަލުކޮށް ނަމާދު ކުރެވޭނެ ގޮތް އިންތިޒާމު ކުރަން ނިންމައިފައިވާ ކަމަށެވެ. މީގެ އިތުރުން ޓެންޓުތަކުގެ ބޭރުގައި އިށީނދެލައިގެން ތިބެވޭނެ ބެންޗުތައް ބެހެއްޓުމާއި، އިރުގެ ދޯދިތަކުން ސަލާމަތްވުމަށްޓަކައި ބޭރުގައި ފުރާޅު އެޅުމުގެ މަސައްކަތް ވެސް ކުރަމުންދާ ކަމަށް ވިދާޅުވުއެވެ.

އަދި ޓެންޓުތައް ފިނިކުރުމަށްޓަކައި ޓެންޓުތަކުގެ އެތެރޭގައި އެންމެ ފަހުގެ އޭސީ ސިސްޓަމްތައް ވެސް މިހާރު ހަރުކުރަމުންކަންދާކަމަށްވެސް ވިދާޅުވިއެވެ.

ކެއިންބުއިމުގެ އިންތިޒާމުތަކަށް ބަލާއިރު، މިފަހަރު ޓެންޓުތަކާ ކައިރީގައި ކެއްކޭނެ ވަސީލަތްތަކާއެކު ބަދިގެއެއް ގާއިމުކުރުމުގެ މަސައްކަތް ކުރިއަށްދާއިރު، 24 ގަޑިއިރު ހިލޭ ބުއިންތައް ލިބޭނެ އިންތިޒާމު ވެސް ޓެންޓުތަކުގައި ހުންނާނެކަން އޭނާ ފާހަގަކުރެއްވިއެވެ.

މީގެ ކުރިން ޝަރީފް ވިދާޅުވި ގޮތުގައި، މި ސަރުކާރުގެ އަމާޒަކީ ކޮންމެ އަހަރަކު ވެސް ކުރީ އަހަރަށްވުރެ ޚިދުމަތްތައް ފުރިހަމަކުރުމެވެ. މިދިޔަ އަހަރު ހޮޓާތަކުގެ ފެންވަރު 4 ސްޓަރ އަށް ބަދަލުކޮށް، މިނާގައި ދިވެހިންނަށް ވަކި ޖާގައެއް ހޯދައިދިނުމުން ލިބުނު ކުރިއެރުމަށްފަހު، މި އަހަރުގެ އަމާޒަކީ ދިވެހި ޙައްޖާޖީންނަށް 'ލަގްޒަރީ' ފެންވަރެއްގެ ޚިދުމަތެއް މިނާގައި ފޯރުކޮށްދިނުމެވެ.

މި ހުރިހާ މަސައްކަތަކާއެކު 1447 ވަނަ އަހަރުގެ ޙައްޖު ދަތުރަކީ ރާއްޖޭގެ ތާރީޚުގައި ވެސް އެންމެ އިންތިޒާމުތައް ރަނގަޅު ދަތުރަށް ވެގެންދާނެކަމަށް ޝަރީފް ވިދާޅުވިއެވެ.