ނިއުޔޯކުގެ ނަރުހުންގެ ހަޅުތާލުތަކާއި ގުޅިގެން ހޮސްޕިޓަލްތަކުގެ ޚިދުމަތްތަކަށް ބުރޫއަރައިފި

ނިއުޔޯކް ސިޓީގެ މައި ހޮސްޕިޓަލްތަކުގައި މަސައްކަތްކުރާ ގާތްގަނޑަކަށް 15,000 އެއްހާ ނަރުހުން މިދިޔަ ހޯމަ ދުވަހު މަސައްކަތް ހުއްޓާލައި، އެ ސިޓީގެ ތާރީޚުގައިވެސް ހިންގާ އެންމެ ބޮޑު ނަރުހުންގެ ހަޅުތާލު ފަށާފިއެވެ.

މި ދުވަސްވަރަކީ ފިނި މޫސުންކަމުން އިންތިހާއަށް ބަލިމަޑުމަޑުކަން އެގައުމުގައި ފެތުރެމުންދާ ދުވަސްވަރެއްގައި މިފަދަ ކަމަކާއި ކުރިމަތިވުމުން އެތައް ބައެއްގެ ކަންބޮޑުވުން ވަނީ އުފެދިފައެވެ. އަގި މި ދުވަސްވަރު ބަލިމީހުންނަށް ދޭ ފަރުވާގެ ފެންވަރާ މެދު ވެސް ވަނީ ކަންބޮޑުވުން އުފެދިފައެވެ.

ނިއުޔޯކް ސްޓޭޓް ނާސަސް އެސޯސިއޭޝަން(އެންވައިއެސްއެންއޭ) ތަމްސީލުކުރާ މި ނަރުހުންނަކީ މައުންޓް ސިނާއީ، މޮންޓެފިއޯ މެޑިކަލް ސެންޓަރ އަދި ނިއުޔޯކް-ޕްރެސްބިޓީރިއަން ފަދަ މައި މަރުކަޒުތަކުގައި މަސައްކަތްކުރާ މުވައްޒަފުންނެވެ. މި ހަޅުތާލު ފަށާފައިވަނީ ހޮސްޕިޓަލްތަކުގެ މެނޭޖްމަންޓާއި ޔޫނިއަނާ ދެމެދު އާ އެއްބަސްވުމަކަށް އައުމަށް މަސްތަކެއް ވަންދެން ކުރި މަޝްވަރާތައް ނާކާމިޔާބުވުމާ ގުޅިގެންނެވެ.

ނަރުހުން ބުނާ ގޮތުގައި މި ހަޅުތާލުގެ މައިގަނޑު ސަބަބަކީ ހޮސްޕިޓަލްތަކުގައި ދާއިމީކޮށް ނަރުހުން މަދުވުމުގެ މައްސަލައާއި، އެކަށީގެންވާ ވަރަށްވުރެ ގިނަ ބަލިމީހުން ބަލަން ޖެހުމުގެ ސަބަބުން މަސައްކަތުގެ މާހައުލު ނުރައްކާތެރިވެ، ބަލިމީހުންގެ ރައްކާތެރިކަމަށް ބުރޫއަރަމުންދިއުމެވެ. އެ ޔޫނިއަންގެ ލީޑަރުން ހާމަކުރި ގޮތުގައި، ގިނަ ނަރުހުންނަށް އެމީހުންގެ ގާބިލިއްޔަތަށްވުރެ ގިނަ ބަލިމީހުން ބަލަން މަޖުބޫރުވުމުގެ ސަބަބުން، ނަފްސާނީ ގޮތުންނާއި ޖިސްމާނީ ގޮތުން ވަރުބަލިވެ، ފަރުވާ ދިނުމުގައި ގޯސްތައް ހެދުމުގެ ފުރުސަތު ބޮޑުވެ، ޚިދުމަތުގެ ފެންވަރު ދަނީ ދަށްވަމުންނެވެ.

ނަރުހުން މަދުވުމުގެ މައްސަލައިގެ އިތުރުން، މަސައްކަތުގެ މާހައުލުގެ ރައްކާތެރިކަން ކަށަވަރުކޮށްދިނުމަށާއި، ސިއްހީ އިންޝުއަރެންސްގެ ޚިދުމަތްތައް ރަނގަޅުކުރުމުގެ އިތުރުން، ނިއުޔޯކްގެ ދިރިއުޅުމުގެ ޚަރަދުތަކާ އެކަށީގެންވާ ވަރަށް އުޖޫރަ ބޮޑުކުރުމަށް ވެސް ނަރުހުން ދަނީ ގޮވާލަމުނެވެ. އަދި ޚިދުމަތުގެ ފެންވަރު ރަނގަޅުވުމެއް ނެތި، ނަރުހުންނަށް ކުރިމަތިވާ ފިއްތުންތައް އިތުރުވާ ގޮތަށް ޓެކްނޮލޮޖީއާއި މެނޭޖްމަންޓްގެ އުސޫލުތައް ބޭނުންކުރަމުންދާ ދިއުމާ މެދު ވެސް ޔޫނިއަނުން ވަނީ ކަންބޮޑުވުން ފާޅުކޮށްފައެވެ.

ނަމަވެސް، ހޮސްޕިޓަލްތަކުގެ އިސްވެރިން ބުނަމުންދަނީ މިހާރު ވެފައިވާ އައު އެއްބަސްވުންތަކުގެ މުއްދަތުގައި ވެސް ބިލިއަނުން ޑޮލަރު ޚަރަދުވާނެތީ، އެޔޫނިއަނުން ހުށަހަޅާފައިވާ ކަންކަމަކީ މާލީ ގޮތުން ބަލާއިރު ދެމެހެއްޓެނިވި ކަންކަން ނޫން ކަމަށެވެ.

މި ހަޅުތާލު ފެށުމުގެ ކުރިން، ނިއުޔޯކްގެ ގަވަރުނަރު ކެތީ ހޯކުލް ވަނީ ކުއްލި ނުރައްކަލުގެ ހާލަތު އިޢުލާންކުރައްވާފައެވެ. މިއާއެކު، އެގައުމުގެ އެހެން ސްޓޭޓްތަކުން ވަގުތީ ނަރުހުން ގެނައުމުގެ ފުރުސަތު ހޮސްޕިޓަލްތަކަށް ލިބި، ޒަރޫރީ ޚިދުމަތްތައް މެދުނުކެނޑި ކުރިއަށް ގެންދިއުމަށް މަގުފަހިވެގެންގޮސްފައިވެއެވެ. ނަމަވެސް ހޮސްޕިޓަލްތަކާއި އެމަޖެންސީ ޑިޕާޓްމަންޓްތަކުގެ ޚިދުމަތްތައް ހުއްޓުމެއްނެތި ކުރިއަށްދިޔަޔަސް، މާ އަވަސް ނޫން އޮޕަރޭޝަންތަކާއި އެޕޮއިންޓްމަންޓްތައް ފަސްކުރަން ޖެހިދާނެ ކަމުގެ އިންޒާރު ކަމާބެހޭ ފަރާތްތަކުން ވަނީ ދީފައެވެ.

ސިއްޙީ ދާއިރާގެ އިދާރާތަކުން ވަނީ، މުވައްޒަފުން މަދުވުމުގެ ސަބަބުން ދަތިތަކާ ކުރިމަތިވި ނަމަވެސް، ކުއްލި ފަރުވާ ބޭނުންވާ ކަންކަމުގައި ލަސްނުކުރުމަށް އިލްތިމާސްކޮށްފައެވެ. މި ހަޅުތާލު މި ކުރިމަތިވީ އިންފްލުއެންޒާ ބަލިމަޑުކަން ވަރަށް ބޮޑަށް ފެތުރިފައިވާ ދަނޑިވަޅެއްގައި ކަމުން، މިއީ މިހާރުވެސް ބާރުބޮޑުވެފައިވާ ސިއްޙީ ނިޒާމަށް އިތުރަށް ބާރުބޮޑުވެގެންދާނެ ކަމެކެވެ.

މި ހަޅުތާލާއި ގުޅުވާ ނިއުޔޯކް ސިޓީގެ މޭޔަރ ޒޯހްރާން މަމްދާނީ ވަނީ ނަރުހުންނަށް ތާއީދުކުރައްވާކަން ހާމަކުރައްވައި، ހަޅުތާލުގެ ބައިވެރިންނާ ގުޅިވަޑައިގެންފައެވެ. އޭނާ ސިފަކުރެއްވި ގޮތުގައި މިއީ ރައްކާތެރި ސިއްޙީ ޚިދުމަތަކަށްޓަކައި އަދި މުވައްޒަފުންގެ ކަރާމާތް ހިމާޔަތްކުރުމަށް ކުރެވޭ މަސައްކަތެކެވެ.

މިކަމާ ގުޅޭގޮތުން އާންމުންގެ މެދުގައި ވަނީ ޚިޔާލު ތަފާތުވުންތަކެއް އުފެދިފައެވެ. ގިނަ ބަޔަކު ނަރުހުންގެ ހުށަހެޅުންތަކަށް ތާއީދުކުރާއިރު، ބައެއް ފަރާތްތަކުން ވަނީ ސިއްޙީ ޚިދުމަތްތަކަށް ބުރޫއަރައިފާނެތީ އެކަމުގެ ކަންބޮޑުވުން ފާޅުކޮށްފައެވެ.

މި ހަޅުތާލު ނިމުމަކަށް އަންނާނެ ވަކި ދުވަހެއް އަދި ކަނޑައެޅިފައެއް ނުވެއެވެ. މިކަމާއި ގުޅިގެން ޔޫނިއަނާއި ހޮސްޕިޓަލުގެ މަންދޫބުންނާ ދެމެދު މަޝްވަރާތައް މެދުނުކެނޑި ކުރިއަށް ދިޔަ ނަމަވެސް، މައްސަލައަށް ހައްލެއް ލިބިދާނެ ފަދަ ކުރިއެރުމެއް ލިބިފައިވާ ކަމުގެ ނިޝާނެއް އަދި އެއްވެސް ފަރާތަކުން ހާމަކޮށްފައެއް ނުވެއެވެ. ޔޫނިއަންގެ އިސްވެރިން ބަޔާންކުރާ ގޮތުގައި، މުވައްޒަފުންގެ އަދަދު އިތުރުކުރުމާއި މަސައްކަތުގެ މާހައުލުގެ ރައްކާތެރިކަން ކަށަވަރުކުރުމަށް އެދެވޭ ފިޔަވަޅުތަކެއް ނޭޅެނިސް ނަރުހުން ހަޅުތާލު ހުއްޓައެއް ނުލާނެއެވެ. އެހެންކަމުން، ހޮސްޕިޓަލުގެ އިސްވެރިން މަސައްކަތް ކުރަމުންދަނީ ދެފަރާތުން އެއްބަސްވެވޭ ފަދަ މެދު މިންގަނޑެއްގެ ހައްލަކަށް ވާސިލުވުމަށެވެ.

މި މަޝްވަރާތައް ކުރިއަށްދާއިރު، މި ހަޅުތާލުގެ ސަބަބުން އެމެރިކާގެ ސިއްހީ ދާއިރާގައި މުވައްޒަފުންގެ ދަތިކަމާއި، މަސައްކަތުގެ ބުރަކަމުގެ ސަބަބުން ކުރިމަތިވާ ވަރުބަލިކަމުގެ އިތުރުން، ހޮސްޕިޓަލްތަކުގެ މަސައްކަތްތެރިންނާއި މެނޭޖްމަންޓާ ދެމެދު އޮންނަ ގުޅުމުގެ ފެންވަރާއި މުސްތަގުބަލާ މެދު އެ ގައުމުގައި ކުރެވޭ ބަހުސްތައް ވަނި އިތުރުވެފައެވެ.