ދައުލަތަށް ހަރަދުކުޑަ، ރައްޔިތުންނަށް ލުއިވާނީ ދެ އިންތިހާބު އެއްކޮށްލުމުން: ޣައްސާން

މިހާރު ހުރިހާ ގޮތަކުންވެސް ޤައުމަށް އެންމެ ފައިދާހުރި ގޮތަކީ ދެ އިންތިހާބު އެކުގައި ކުރިއަށްގެންދިއުންކަމަށް ޑިފެންސް މިނިސްޓަރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ކޮންގްރެސް ޕާޓީން މިއަދު ގަލޮޅު އުތުުރު ދާއިރާގައި ކުރިއަށްގެންދިޔަ ދޮރުން ދޮރަށް ކެމްޕެއިން ހަރަކާތުގައި ނޫސްވެރިންނާ ވާހަކަދައްކަވަމުން ޣައްސާން ވިދާޅުވީ ދައުލަތަށް ހަރަދުކުޑަ، އަދި ރައްޔިތުންނަށް އެންމެ ލުއިގޮތަކީވެސް ދެ އިންތިހާބު އެއްކޮށްލުންކަމަށެވެ.

ރައްޔިތުން މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލުމާ ގުޅޭގޮތުން އިދިކޮޅު ފަރާތްތަކުން ދައްކާ ވާހަކަތަކާ ގުޅޭގޮތުން މިނިސްޓަރު ވިދާޅުވީ، އެ ދެ އިންތިހާބު އެއްކޮށްލުމަކީ މީގެ ކުރިން އިދިކޮޅު ފަރާތްތަކުންވެސް ދައްކަމުްނދިޔަ ވާހަކަތައްކަމަށެވެ. އެހެންކަމުން ކުރިން އެގޮތަށް ވާހަކަތައް ދައްކަވާފައި މިހާރު ޕީއެންސީން އެކަންކުރަން އުޅުމުން އެކަމާ ދެކޮޅުވާންޖެހޭ ސަބަބެއް ނުވިސްނޭކަމަށް ޣައްސާނުގެ ވާހަކަފުޅުގައި ފާހަގަކުރެއްވިއެވެ.

ރައީސް އިބްރާހީމް މުޙައްމަދު ޞާލިޙުވެސް އޭރު ވިދާޅުވެފަ އޮތީ ހުރިހާ އިންތިޚާބެއް އެއްކޮށްލުމަކީ އެންމެ ފައިދާހުރި ގޮތްކަން. ދެން މިއަދު އޭގެ އިދިކޮޅަށް އެތިއްބެވީމަ، އެހެންވީމަ އަޅުގަނޑަށް އެހާ ބޮޑަކަށް ސާފެއް ނޫން އެބޭފުޅުންގެ އިޚުލާސްތެރިކަން މި ވަގުތު އެހުރި ގޮތެއް

ޑިފެންސް މިނިސްޓަރު މުޙައްމަދު ޣައްސާން މައުމޫން

ޣައްސާން ވިދާޅުވީ ރައްޔިތުންނަށް އެންމެ ލުއިވާނެ އަދި ޑިމޮކްރެޓިކް ހަމަތަކުގެ މަތިން ޤައުމު ހިންގޭނެ އެންމެ ރަނގަޅު ގޮތަކީވެސް އެއީކަމަށާއި، ދެ އިންތިހާބު އެއްކޮށްލުމަކީ ޕާޓީގެ ފަރާތުން ރައްޔިތުންނަށްޓަކައި ކުރަން ބޭނުންވާ ކަމެއްކަމަށެވެ.

ދެ އިންތިހާބު އެއްކުލަށް ސަރުކާރުން ގެންގުޅެމުންދާ ސިޔާސަތަށް އިދިކޮޅު އެމްޑީޕީން ފާޑުކިޔަމުންދާއިރު، އެޕާޓީން ވަނީ ދެ އިންތިހާބު އެއްކޮށްލުމާ ދެކޮޅަށް ހަރަކާތްތަކެއް ހިންގުމަށް ނިންމާފައެވެ. އެމްޑީޕީގެ ރައީސް ޢަބްދުﷲ ޝާހިދު ވިދާޅުވެފައިވަނީ، ސަރުކާރުން ދެ އިންތިހާބު އެއްކޮށްލަން އުޅެނީ ރައްޔިތުންނަށް އޮޅުވާލަން ކަމަށާއި، އެންމެބޮޑު ބޭނުމަކީ ރައްޔިތުން ބަސްބުނަން އޮތް މަގު ހަނިކުރުން ކަމަށެވެ.