މީދޫ ބަނދަރު އަޕްގްރޭޑްކުރުމުގެ މަޝްރޫއުގެ ފޭސް 2 ފެށުމަށް އެއްބަސްވެއްޖެ

ދ. މީދޫ ބަނދަރު އަޕްގްރޭޑް ކުރުމުގެ މަޝްރޫއުގެ ފޭސް2 ގެ އެއްބަސްވުމުގައި ސޮއިކޮށްފިއެވެ.

މިކަމަށްޓަކައި ރޭ މީދޫގައި ބޭއްވި ހާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ބައިވެރިވެވަޑައިގެންފައެވެ. ސަރުކާރުން މި މަޝްރޫއު ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކުންފުނި (އެމްޓީސީސީ) އާއިއެވެ.

މީދޫ ބަނދަރު އަޕްގްރޭޑް ކުރުމުގެ އެއްބަސްވުމުގައި ކޮންސްޓްރަކްޝަން މިނިސްޓްރީގެ ފަރާތުން ސޮއިކުރައްވާފައިވަނީ މިނިސްޓަރ ޑރ. ޢަބްދުﷲ މުއްޠަލިބެވެ. އެމްޓީސީސީގެ ފަރާތުން މި އެއްބަސްވުމުގައި ސޮއިކޮށްފައިވަނީ އަޙްމަދު ސަޢުދީއެވެ.

މި މަޝްރޫއުގެ އަގަކީ 41.3 މިލިއަން ރުފިޔާއެެވެ. އެމްޓީސީސީއާއި މި މަޝްރޫއު ހަވާލުކޮށްފައިވަނީ 720 ދުވަސް ތެރޭގައި މަސައްކަތް ނިންމާ ގޮތަށެވެ.

މި މަޝްރޫއުގެ ދަށުން މީދޫ ބަނދަރުގައި 62 މީޓަރުގައި ބޭރުތޮށި ޖެހުމައި 254 މީޓަރުގެ ރިވެޓްމެންޓާއި 240 މީޓަރުގެ އެއްގަމުތޮށްޓާއިއެކު ސޭންޑްފިލް ބްރޭކްވޯޓަރ ޖެހުމަށް ހަމަޖެހިފައި ވެއެވެ. 316 މީޓަރުގެ ރިވެޓްމެންޓާއިއެކު ސޭންޑްފިލް ބްރޭލްވޯޓަރގެ މަސައްކަތާއި ދިގުމިނުގައި 18 މީޓަރ އަދި ފުޅާމިނުގައި 3 މީޓަރ ހުރި ވޯކްވޭ ބްރިޖަކާއި ދިގުމިނުގައި 182 މީޓަރގެ ދިގުމިނާއި 2 މީޓަރ ފުޅާމިން ހުރި ވޯކްވޭ ބްރިޖެއް އެޅުމަށް ހަމަޖެހިފައި ވެއެވެ.

މީގެ އިތުރަށްވެސް، މި މަޝްރޫއުގެ ދަށުން މީދޫ ޓީޖެޓީ ސަރަހައްދުގައި ޕޭވްމެންޓެއް އަޅައި، 16 ބަނދަރު ބައްތި ހަރުކުރުމަށްވެސް ހަމަޖެހިފައި ވެއެވެެ.