ފަތުރުވެރިކަމުގެ މަންޒިލެއްގެ ގޮތުގައި ރާއްޖޭ އިސްތިހާރުކުރަން ކެޓްރީނާ ނިކުންނަނީ

ފަތުރުވެރިކަމުގެ މަންޒިލެއްގެ ގޮތުގައި ރާއްޖެ އިސްތިހާރުކުރުމުގެ މަސައްކަތްކުރުމަށް ގްލޯބަލް އެމްބެސެޑަރެއްގެ ގޮތުގައި ބޮލީވުޑުގެ މަޝްހޫރު ފިލްމީ ތަރި ކަމަށްވާ ކެޓްރީނާ ކައިފް ހަމަޖައްސައިފިއެވެ.

މިކަމާ ގުޅޭގޮތުން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީން) ބުނީ ރާއްޖެ އިސްތިހާރުކުރުމުގެ އެމްބެސެޑަރަކަސް ކެޓްރީނާ ހަމަޖައްސާފައިވަނީ، ހޫނު މޫސުމާއި ގުޅުވައި ކުރިއަށް ގެންދާ ހާއްސަ ކެމްޕެއިނެއްގެ ދަށުންނެވެ. އެމްއެމްޕީއާރުސީން ދަނީ މަންޒިލެއްގެ ގޮތުގައި ރާއްޖޭގެ ފަތުރުވެރިކަން އިސްތިހާރުކުރުމަށް ބޮޑެތި ކެމްޕެއިންތަކެއް ހިންގަމުންނެވެ.

އެމްއެމްޕީއާރުސީން ބުނީ، ކެޓްރީނާ އާއެކު ކުރިއަށްގެންދިއުމަށް ނިންމި ކެމްޕެއިންގެ މައިގަނޑު މަސައްކަތަކަށް ވެގެންދާނީ ރާއްޖޭގެ ގުދުރަތީ ރީތިކަން ދައްކުވައިދީ އަދި ރާއްޖޭގެ ކަނޑުގެ ހިތްގައިމު މަންޒަރުތަށް ޕްރޮމޯޓް ކޮށްދިނުމުގެ އިތުރުން މަތީ ފަންތީގެ ފަތުރުވެރިކަން އިޝްތިހާރު ކުރުންކަމަށެވެ.

މިކަމާ ގުޅޭގޮތުން އެމްއެމްޕީއާރްސީގެ މެނޭޖިންގް ޑިރެކްޓަރ އިބްރާޙިމް ޝިއުރީ ވިދާޅުވެފައިވަނީ، ކެޓްރީނާއަކީ ބޮޑު ފޭން ބޭސްއެއް އޮންނަ ފޮލޯވަރުންނާ ގުޅުންއޮންނަ ސެލެބްރެޓީއެއްކަމަށާއި، ރާއްޖެ އިތުރަށް ޕްރޮމޯޓްކުރުމަށް ކެޓްރީނާއަކީ އެންމެ ރަނގަޅު އެއް ފަންނާނުކަމަށެވެ.

ކެޓްރީނާ ބުނެފައިވަނީ، ރާއްޖެ ފަދަ ޓޫރިޒަމްގެ އެންމެ މަޤްބޫލު މަންޒިލެއްގެ އެމްބެސެޑަރުކަން ލިބުމަކީ ފަހްރެއްކަމަށާއި، ރާއްޖެ ޕްރޮމޯޓްކުރުމަށް ތައްޔާރަށްހުރި ކަމަށެވެ.

ކުރިއަށްމިއޮތް ހޫނު މޫސުމާ ދިމާކޮށް  އިނގިރޭސިވިލާތް، ރަޝިޔާ، އިޓަލީ، ސްޕެއިން، ޕޯލެންޑް އަދި އިންޑިއާ ފަދަ ޤައުމުތަކުގައި މި ރާއްޖެ އިސްތިހާރުކުރުމުގެ ކެމްޕެއިންތައް ކުރިއަށްގެންދިއުމަށް އެމްއެމްޕީއާުސީން ވަނީ ނިންމާފައެވެ. ކެޓްރީނާ ކައިފަކީ ޔޫރަޕްގެ އިތުރުން އެމެރިކާގެ ޤައުމުތަކުގެ މެދުގައިވެސް ވަރަށް މަޤްބޫލުކަން ލިބިފައިވާ ފަންނާނެކެވެ.