އަލިފާނުގެ ހާދިސާތަކާގުޅޭ ހޭލުންތެރިކުރުމުގެ ސެޝަނެއް ރ. އަލިފުށީގައި ބާއްވައިފި

އަލިފާނުގެ ހާދިސާތަކާގުޅޭ ހޭލުންތެރިކުރުމުގެ ސެޝަނެއް ފުލުހުން އިސްނަގައިގެން ރ. އަލިފުށީގައި  ކުރިއަށް ގެންގޮސްފިއެވެ.

ރ. އަލިފުށި ޕޮލިސް ސްޓޭޝަނުން އިސްނަގައިގެން، ކުރިއަށް ގެންދިޔަ މި ސެޝަނަކީ އަލިފުށީގެ މުއައްސަސާތަކުގެ މުވައްޒަފުންނަށް އަމާޒުކޮށްގެން ބޭއްވި ސެޝަނެކެވެ. މި ސެޝަން ބޭއްވީ މި ޖުލައި މަހުގެ 13 ވަނަ ދުވަހުއެވެ.

މި ސެޝަނުގައި މައުލޫމާތު ދެއްވީ އެމް.އެން.ޑީ.އެފްގެ ސަރޖަންޓް ފަސްޓް ކްލާސް ޝާހީން މުޙައްމަދުއެވެ.

ފުލުހުން ހާމަ ކުރެއްވިގޮތުގައި ސެޝަނުގައި ގޭތެރޭގައި ހިނގާ އަލިފާނުގެ ހާދިސާތަކާއި، ކައްކާ ގޭސް ރައްކާތެރިކޮށް ބޭނުންކުރުމުގެ މުހިންމުކަމުގެ މައްޗަށް އަލިއަޅުވާލައި މައުލޫމާތު ދެވުނެވެ. މީގެ އިތުރުން، އަލިފާނުގެ ހާދިސާއެއް ހިނގުމުން އަމަލުކުރާނެގޮތާއި އެފަދަ ހާދިސާތަކުން ރައްކާތެރިވުމަށް އެޅިދާނެ ފިޔަވަޅުތަކާ ގުޅޭގޮތުންވެސް މައުލޫމާތު ދެވުނެވެ.

އަލިފާނުގެ ހާދިސާތަކުން ރައްޔިތުން ރައްކާތެރިކުރުމާއި، މިފަދަ ހާދިސާތައް ހިނގިޔަ ނުދިނުމަށް އަޅަންޖެހޭ ފިޔަވަޅުތަކާ ބެހޭ މައުލޫމާތު ފޯރުކޮށްދިނުމުގެ މަގުސަދުގައި ބޭއްވި މި ސެޝަނުގައި ރަށުގެ ހުރިހާ މުއައްސަސާއެއްގެ މުވައްޒަފުން ބައިވެރިވިކަން ފާހަގަކޮށްލެވެއެވެ.