ނުކުޅެދުންތެރިކަން ހުންނަ މީހުންނަށް ސަރުކާރާއި ސަރުކާރު ކުންފުނިތަކުން ވަޒީފާ ދިނުމަށް އުސޫލަށް ބަދަލެއް
ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުޞަތުތައް ފަހިކޮށްދިނުމަށްޓަކައި އެކުލަވައިލާފައިވާ "ނުކުޅެދުންތެރިކަން ހުންނަ ފަރާތްތަކަށް ވަޒީފާ ހަމަޖެއްސުމުގެ އާންމު މިންގަނޑު" އަށް މުހިންމު އިސްލާހުތަކެއް ގެނެސްފިއެވެ.
ސަރުކާރުން އިއްޔެ އާންމުކުރި މި އިސްލާހުތަކުގެ ތެރޭގައި، އެ މިންގަނޑަށް އަމަލުކުރަންޖެހޭ ދާއިރާތައް ވަނީ ސާފުކޮށްދީފައެވެ.
އެގޮތުން، މި މިންގަނޑު ހިނގާ ފަރާތްތަކުގެ ތެރޭގައި ދައުލަތުގެ އިދާރާތަކުގެ އިތުރުން ވަޒީފާ ދޭ އަމިއްލަ ފަރާތްތައް ވެސް ހިމެނެއެވެ.
އަލަށް ގެނެވުނު އިސްލާހުގައިވާ ގޮތުން، ސިވިލް ސަރވިސްގެ އިދާރާތަކުގައި ނުކުޅެދުންތެރިކަން ހުންނަ ފަރާތްތަކަށް ޚާއްޞަކުރާނެ މަޤާމުތަކެއް ކަނަޑައަޅާއިރު އެ ކަނޑައަޅާނީ ސިވިލް ސަރވިސް ކޮމިޝަނުންނެވެ.
އަދި ސަރުކާރު ހިއްސާވާ ކުންފުނިތަކުގައި މިފަދަ ފަރާތްތަކަށް ޚާއްޞަކުރެވޭ މަޤާމުތަކެއް ކަނޑައަޅަންޖެހޭއިރު އެ ކަނޑައަޅާނީ އެ ކުންފުންޏެއްގެ ބޯޑުން ނުވަތަ އެ ކުންފުންޏަކުން ކަނޑައަޅާ އުސޫލެއްގެ މަތީންނެވެ.
މީގެ އިތުރުން، އެފަދަ ފަރާތްތަކަށް ވަޒީފާއަށް އިޢުލާނުކުރުމުގައި ނުކުޅެދުންތެރިކަން ހުންނަ މީހުންގެ ޙައްޤުގައި މަސައްކަތްކުރާ ޖަމުޢިއްޔާތަކާއި ޖަމާޢަތްތަކަށް ވަޒީފާގެ އިޢުލާނުތައް ހިއްސާކުރަންޖެހޭނެއެވެ.
އަދި ނުކުޅެދުންތެރިކަން ހުންނަ ފަރާތްތަކުގެ މެދުގައި އެ އިޢުލާނުތައް ފުޅާދާއިރާއެއްގައި އާންމުކުރުމަށް، ވަޒީފާ ދޭ ފަރާތްތަކާއި ކަމާބެހޭ މިނިސްޓްރީން ގުޅިގެން މަސައްކަތް ކުރަންވާނެ ކަމަށް މި އިސްލާހުގައި ބަޔާންކޮށްފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
