އެމްޑީޕީއިން އެންޓި ކެމްޕެއިން ކުރާ ކަމަށް ބުނެ ޕީއެންސީން މައްސަލަ އީސީ އަށް ހުށަހަޅަނީ

އިދިކޮޅު އެމްޑީޕީއިން ކުރިއަށް އޮތް މަޖިލިސް އިންތިހާބަށް އެންޓި ކެމްޕެއިން ކުރާ ކަމަށް ބުނެ ވެރިކަން ކުރާ މައި ޕާޓީ ޕީއެންސީން އެ މައްސަލަ އީސީ އަށް ހުށައެޅުމަށް ނިންމައިފިއެވެ.

މިކަން ހާމަކޮށްފައިމިވަނީ ޕީއެންސީން މިއަދު ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ މަޖިލިސް ކެމްޕެއިންގެ ތަރުޖަމާނު ހީނާ ވަލީދެވެ. މިގޮތުން ހީނާ ވިދާޅުވީ އެމްޑީޕީން ދޮގު ވާހަކަތައް ފަތުރައިގެން އެންޓި ކެމްޕޭން ކުރުމަކީ ވަރަށް ދެރަ ކަމެއް ކަމަށެވެ.

އެމްޑީޕީން ކުރަމުންދާ އެންޓި ކެމްޕޭން ގެ ތެރޭގައި، ފައިސާ ދީގެން އެމްޑީޕީން ޓްވިޓާ އަދި ފޭސްބުކް ފަދަ ސޯޝަލް މީޑިއާ ޕްލެޓް ފޯމްތަކުގައި ޕީއެންސީއާ ދެކޮޅަށް ދޮގު ޚަބަރުތައް ފަތުރާ ކަމަށް ވިދާޅުވެ ހީނާ ވަނީ މި މައްސަލަ އީސީއަށް ހުށަހެޅުމަށް ނިންމާފައިވާ ކަމަށް ވިދާޅުވެފައެވެ.

"މިއީ ސީދާ އިންތިޚާބުތަކާއި ބެހޭ ގާނޫނާ ވެސް ކަނޑައެޅިގެން ޚިލާފު ކަމެއް. އަޅުގަނޑުމެން މިގޮތަށް އެ ބޭފުޅުން ކުރަމުންދާ އެންޓި ކެމްޕޭން މައްސަލަތައް އިލެކްޝަން ކޮމިޝަނަށް ހުށަހަޅާ ވާހަކަ ދަންނަވަން."

ހީނާ ވިދާޅުވިއެވެ.

މީގެ އިތުރުންވެސް ހީނާ ވިދާޅުވީ، ނިމިދިޔަ އެމްޑީޕީގެ ފަސް އަހަރަކީ ހިޔާލު ފާޅު ކުރުމާއި އެއްވެ އުޅުމަށް އެންމެ ދަތިކުރި ދުވަސްތައް ކަމަށާއި، އޭގެ ތެރޭގައި ގާނުނާއި ގަވާއިދާ ޚިލާފަށް އެއްވެސް ކަހަލަ އިންޒާރެއް ދިނުމެއް ނެތި ފުލުހުން އައިސް  މުޒާހަރާގެ ބައިވެރިން ހައްޔަރު ކުރުމާއި ޕެޕަރ ސްޕޭ ޖެހުން ފަދަ ކަންކަން ހިމެނޭ ކަމަށާއި މިފަދަ ކަންކަން ކެނޑިނޭޅި ކަމާ ބެހޭ ފަރާތްތަކަށް ހުށަހަޅަމުން ދިޔަ ކަމަށެވެ.

ހީނާ ވިދާޅުވީ، މިދިޔަ ފަސް އަހަރު ތެރޭގައި އިދިކޮޅު ފަރާތްތަކުގެ ހަރަކާތްތަކަށް ފުރުސަތު ނުދޭ ތަން ފެނިގެން ދިޔަ ކަމަށާއި، މިއާއި ޚިލާފަށް މި ސަރުކާރުން ސިޔާސީ ވެރިންނަށް ބިރު ދައްކައި ހައްޔަރު ނުކުރާނެ ކަމަށާއި، އެއީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ޕޮލިސީއެއް ނޫން ކަމަށެވެ.