ނޫސްވެރިންގެ ދިފާޢުގައި ފެށި މަސައްކަތް ޕާކުކޮށްފައި ނުބާއްވަން؛ ފޯކަސް ކުރަނީ ފަހަރަކު ކަމަކަށް: އެމްޑީޕީ

ނޫސްވެރިންގެ ހައްގުގައި އެމްޑީޕީން ފެށި މަސައްކަތް ޕާކު ކޮށްފައި ނުބާއްވާ ކަމަށާ، ނަމަވެސް އެމްޑީޕީން މަސައްކަތް ކުރަނީ ފަހަރަކު ކަމަކަށް 'ފޯކަސް' ކުރަން ކަމަށް އެޕާޓީން ބުނެފިއެވެ.

ދާދިފަހުން އަދަދު ނޫހުގެ ނޫސްވެރިން ޖަލަށް ލުމާއި ގުޅިގެން އެމްޑީޕީން މަގުމަތީ ހަރަކާތްތަކެއް ފެށިއެވެ. އަދި އެމްޑީޕީގެ ދެ ރައީސުންނާއި ކުރީގެ ރައީސް ޔާމީން ގުޅިގެން މަސައްކަތް ކުރެއްވުމަށް ނިންމަވައި ތިން ރައީސުންގެ މަންދޫބުން ހިމެނޭ ކޮމިޓީއެއްވެސް އުފެއްދިއެވެ.

ނަމަވެސް ނޫސްވެރިންގެ ހައްގުގައި އަޑު އުފުލުމުގެ ކަންކަން ފަނޑުވެފައިވާއިރު، ތިން ރައީސުންގެ ކޮމިޓީން ނޫސްވެރިންގެ ހައްގުގައި ކުރާ ކަންކަމާ ބެހޭ ތަފްސީލްވެސް ހާމަކޮށްފައެއް ނުވެއެވެ. އެމްޑީޕީގެ ޗެއާޕާސަން އިންތިޚާބުގެ ކެންޕެއިނާއެކު އެކަން 'މަޑުޖެހިފައިވާ' ކަމަށް ބައެއް ފަރާތްތަކުން ބުނަމުންދަނިކޮށް މިރޭ އެޕާޓީން ތައްޔާރުވަމުންދަނީ 'ޖޮބް ބުރާސްފަތި' ނަމުގައި ރައްޔިތުންގެ ވަޒީފާގެ ހައްގުގައި ކުރާ މުޒާހަރާ އަކަށެވެ.

މި މުޒާހަރާއާ ގުޅޭ މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުޤޫބް އަބްދުالله ވިދާޅުވީ، ނޫސްވެރިންގެ ދިފާޢުގައި އެންމެ ބޮޑަށް މަސައްކަތްކުރާ ޕާޓީއަކީ އެމްޑީޕީ ކަމަށެވެ. އަދި އެމްޑީޕީ އުފެދިގެން އައީ ނޫސްވެރިކަމުގެ ތެރެއިން ކަމަށެވެ.

އެހެންވީމާ ނޫސްވެރިންގެ ދިފާއުކުރަންޖެހޭ ކަންކަން ނުކޮށް އެމްޑީޕީއެއް މަޑަކުން ނޯންނާނެ.

ޔައުޤޫބް

ޔައުޤޫބް ވިދާޅުވީ، ރާއްޖޭގެ ކޮންމެ ދާއިރާއަކަށް ބެލިޔަސް ފެންނަނީ ބޮޑެތި އިހުމާލުތައް ކަމަށާ، އަދި ހުރިހާ ކަމެއް މަސްހުނިކޮށްގެން ކުރާ ނަމަ، 'ފޯކަސް' ގެއްލޭ ކަމަށެވެ.

އެހެންވީމާ ގައުމީ މަޖިލީހުން ނިންމީ ފަހަރަކު ކަމަކަށް ދާން. އަޅުގަނޑުމެންގެ ޗެއާ، ރައީސް ނަޝީދުވެސް އެ ނުކުންނައިރު ނުކުންނަ ކަމެއް ހަމަސީދާ އެއަށް ފޯކަސް ކޮށްގެން އެކަން ކުރަން. އެގޮތުގެ މަތީން ފުރަތަމަ މި ފެށީ ވަޒީފާ

ޔައުޤޫބް

ވަޒީފާގެ ހައްގުގައި އަޑުއުފުލަން ނުކުންނަން ނިންމީ އެމްޑީޕީ ޗެއާޕާސަން އިންތިޚާބުގެ ތެރެއިން ބައެއް ފަރާތްތަކުގެ ވަޒީފާ ގެއްލުމުން ކަމަށާ، މިހާރުވެސް ގެއްލެމުންދާތީ ކަމަށް ޔައުގޫބް ވިދާޅުވިއެވެ. އަދި ނޫސްވެރިންގެ ދިފާޢުގައި ކުރަންޖެހޭ ކަންކަން ޕާކުކޮށްފައި ނުބާއްވާ ކަމަށްވެސް ވިދާޅުވިއެވެ.

މިއާއެކު ޔައުގޫބް ވިދާަޅުވީ ގައުމީ މަޖިލީހުން ނިންމީ ސިލްސިލާކޮށް މަގުމަތީ ހަރަކާތްތައް ބާއްވަން ކަމަށާ، ފަހަރަކު ކަމަކަށް ފޯކަސް ކޮށްގެން މުޒާހަރާ ކުރާނެކަމަށެވެ.