ހެއްކާއެކު ދިޔާނާ ހާމަކޮށްދެއްވީ އެމްޑީޕީގެ ދެ ރައީސުންވެސް ދެ އިންތިޚާބު އެއްކޮށް ބޭއްވުމަށް އާނއެކޭ ވިދާޅުވިކަން

ރައްޔިތުންގެ މަޖިލީހުގެ އިންތިޚާބާއި، ރިޔާސީ އިންތިޚާބު އެއް ދުވަހެއްގައި ބޭއްވުމަށް ކުރީގެ ރައީސް މުޙައްމަދު ނަޝީދު އާއި އިބްރާހީމް މުޙައްމަދު ޞާލިޙް ވެސް ތާއީދު ކުރެއްވި ކަމަށް ކުރީގެ ބަންޑާރަ ނާއިބު ދިޔާނާ ސަޢީދު ވިދާޅުވެއްޖެއެވެ.

ދިޔާނާ އެކްސްގައި ކުރެއްވި ޕޯސްޓެއްގައި ވަނީ، ދެ އިންތިޚާބު އެއް ދުވަހެއްގައި ބޭއްވުމަށް ތާއީދު ކުރައްވައި ރައީސް ނަޝީދު ކުރެއްވި އެކްސް ޕޯސްޓާއި، ތިން އިންތިޚާބު އެއްދުވަހެއްގައި ބޭއްވުމަށް ތާއީދު ކުރައްވައި ރައީސް ޞާލިޙް ވާހަކަދެއްކެވިކަން ހާމަވާ ޚަބަރުގެ ފޮޓޯއެއް ހިއްސާ ކުރައްވާފައެވެ.

އެގޮތުން ރައީސް ނަޝީދު މި އަހަރުގެ ޖަނަވަރީ މަހުގެ 4 ވަނަ ދުވަހު އެކްސްގައި ކުރެއްވި ޕޯސްޓުގައި އެމަނިކުފާނު ވަނީ ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމަކީ ރަނގަޅު ގޮތް ކަމަށް އެމަނިކުފާނު ދެކެވަޑައިގަންނަވާ ކަމަށް ވިދާޅުވެފައެވެ.

އަދި 2020 ވަނަ އަހަރުގެ ކައުންސިލް އިންތިޚާބުގެ ކެންޕެއިންގެ ތެރެއިން، ޖަނަވަރީ މަހުގެ 14 ވަނަ ދުވަހުގެ ރޭ ހދ. ނޮޅިވަރަމްގެ ރައްޔިތުންނާއި ބައްދަލުކުރައްވާ ވާހަކަފުޅުދައްކަވަމުން ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބުގެ އިތުރުން ލޯކަލް ކައުންސިލް އިންތިހާބު އެކީގައި ބާއްވަން ފެނިވަޑައިގަންނަވާކަމަށް ރައީސް ޞާލިޙް ވިދާޅުވިކަން އޭނާ ފާހަގަކުރެއްވިއެވެ.

އެރަށުގައި ވާހަކަދައްކަވަމުން ރައީސް ސޯލިހް ވިދާޅުވީ އޭރު އޮތް އެމަނިކުފާނުގެ ސަރުކާރުން ބައެއް ކަންތައްތައް ކުރިއަށް ގެންދިއުމަށް ލަސްވެފައި ހުރެދާނެ ކަމަށާއި އޭގެ އެންމެ ބޮޑު އެއް ސަބަބަކީ އިންތިހާބުތައް ވަކިވަކިން އޮތުން ކަމަށެވެ. އަދި އެ ތިން އިންތިހާބު އެއް ދުވަހެއްގައި, އެއްވަގުތެއްގައި ބޭއްވުމުގެ މަސައްކަތްކޮށް، ހުރިހާ އިންތިހާބެއް އެކީގައި ބޭއްވިއްޖެނަމަ ޤައުމުގެ ތަރައްޤީއަށް އިތުރު ހަލުވިކަމެއް ލިބިގެންދާނެކަމަށް އެމަނިކުފާނު ވިދާޅުވިއެވެ.

އޭރު ރައީސް ޞާލިޙް އެފަދައިން ވިދާޅުވި ނަމަވެސް މިހާރު އެމަނިކުފާނާއި އެމްޑީޕީވެސް އަންނަނީ ދެ އިންތިޚާބު އެއްދުވަހެއްގައި ބޭއްވުމާ ދެކޮޅަށް ވާހަކަދައްކަވަމުންނެވެ. އަދި އެކަމަށް ނޫނެކޭ ބުނުމަށްވެސް އަންނަނީ ގޮވާލައްވަމުންނެވެ.