އިމްރާން ނިކުންނަވައިފި، ވިދާޅުވީ ދެން ހިމޭނަކުން ނުތިބެވޭނެ ކަމަށް
ދެން ހިމޭނަކުން ނުތިބެވޭނެ ކަމަށް ވިދާޅުވެ އަދާލަތު ޕާޓީގެ ރައީސް އިމްރާން އަބްދުﷲ, ސަރުކާރާ ދެކޮޅަށް ނިކުންނަވާނެ ކަން އިއުލާނު ކުރައްވައިފި އެވެ.
ބެންކޮކުގައި މި ވަގުތު ވިޔަފާރި ކުރައްވާ އިމްރާން މިހެން ވިދާޅުވީ އެކްސް ގައި ކުރެއްވި ޕޯސްޓެއްގަ އެވެ. ރައީސް އިބްރާހިމް މުހައްމަދު ސޯލިހްގެ ވެރިކަމުގައި ހޯމް މިނިސްޓަރު ކަން ކުރެއްވި އިމްރާން, ރައީސް މުއިއްޒުގެ ސަރުކާރާ ދެކޮޅަށް ނިކުންނަވާނެ ކަން ހާމަ ކުރެއްވީ ސުޕްރީމް ކޯޓްގެ ފަނޑިޔާރުންގެ އަދަދު ހަތަކުން ފަހަކަށް ބަދަލު ކުރަން ނިންމުމާއި ގުޅިގެންނެވެ. މިއީ ޝަރުއީ ނިޒާމަށް ނުފޫޒު ފޯރުވުމަށް ކުރައްވަން އުޅުއްވާ ކަމެއް ކަމަށް އިދިކޮޅު ޕާޓީތަކުން ދެކެ އެވެ.
އިމްރާންގެ ޕޯސްޓްގައި ވިދާޅުވީ ރައްޔިތުންނަށް ފައިދާއެއް, ހެޔޮ ކަމެއް ކޮށްދީ ދައުލަތުގެ ނިޒާމަށް ހެޔޮ ބަދަލެއް ގެނެސްދޭތޯ އެއްޗެއް ނުބުނެ ވަރަށް ކެތްކުރައްވައިފި ކަމަށެވެ.
އަދި ވިދާޅުވީ ރައްޔިތުންނަށް ބޮޑު ކަމެއް ނުކޮށްދެވޭތާ މުޅި ނިޒާމު ފުނޑަމުން ގޮސް ސުޕްރީމް ކޯޓުގައި އަތްލީމާ ދެން ހިމޭނަކުން ނުތިބެވޭނެ ކަމަށެވެ.
އިމްރާނަކީ ރައީސް ނަޝީދާއި ރައީސް ވަހީދާއި ރައީސް ޔާމީންގެ ސަރުކާރާއި ދެކޮޅަށް ވެސް ނިކުންނަވާ މަސައްކަތް ކުރެއްވި ބޭފުޅެކެވެ. ދެން ހިމޭނަކުން ނުތިބެވޭނެ ކަމަށް ވިދާޅުވެ އިމްރާން ވާހަކަ ދެއްކެވިއިރު އޭނާ ހޯމް މިނިސްޓަރު ކަމުގައި ހުންނެވި ރައީސް ސޯލިހްގެ ސަރުކާރުން މުޅި ސުޕްރީމް ކޯޓް އެކަށް ބަދަލުކުރި އެވެ. އަދި ހައިކޯޓާއި ކްރިމިނަލް ކޯޓްގެ އެތައް ފަނޑިޔާރުންނެއް ބަދަލުކުރި އެވެ.
އިމްރާން, ސިޔާސީ މަސައްކަތާ މިވަގުތު ދުރުގައި ހުންނެވީ ބެންކޮކުގައި ދިރިއުޅުއްވާތީ އެވެ. އެ ގައުމުގައި ހުންނެވީ ފަހުން ކައިވެެނި ބައްލަވައިގެން އަނބިކަނބަލުން އެ ގައުމުގައި ކިޔަވާ ވިދާޅުވާތީ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
