އުނގޫފާރު ރީޖަނަލް ހޮސްޕިޓަލުގައި ކީމޯތެރަޕީ ފަށައިފި

ރ. އުނގޫފާރު ހޮސްޕިޓަލުގައި، ކެންސަރު ބަލިޖެހިފައިވާ މީހުންނަށް ޚާއްޞަ، ކީމޯ ތެރަޕީގެ ޚިދުމަތް ފަށައިފިއެވެ.

މިއީ، މާލެއިން ބޭރުން ރާއްޖޭގައި ކީމޯ ތެރަޕީގެ ޚިދުމަތް ފެށި 3 ވަނަ ހޮސްޕިޓަލެވެ. ރާއްޖޭގައި ފުރަތަމަ ކީމޯގެ ޚިދުމަތް ފެށީ، 2014 ވަނަ އަހަރު މާލޭގައެވެ. އެއަށްފަހު މާލެއިން ބޭރުން އެންމެ ފުރަތަމަ ކީމޯގެ ޚިދުމަތް ފެށީ 2020 ވަނަ އަހަރު ނައިފަރުގައި ޅ.އަތޮޅު ހޮސްޕިޓަލުގައެވެ. އޭގެފަހުން، 2023 ވަނަ އަހަރުގެ ތެރޭގައި ޑރ.ޢަބްދުއްސަމަދު މެމޯރިއަލް ހޮސްޕިޓަލާއި، ކުޅުދުއްފުށީ ރީޖަނަލް ހޮސްޕިޓަލުގައިވެސް ކީމޯ ދެވޭނެ އިންތިޒާމު ވަނީ ހަމަޖައްސަވާފައެވެ.

އުނގޫފާރު ރީޖަނަލް ހޮސްޕިޓަލުން މައުލޫމާތުދޭގޮތުގައި މި ޚިދުމަތް ފެށުމަށް ބޭނުންވާ 2 ނަރުހުން މިހާރު ވަނި ތަމްރީނުކޮށްފައެވެ. އަދި މިކަމަށްޓަކައި ޚާއްޞަ ކީމޯ ރޫމެއް ޤާއިމުކޮށް، އެއްފަހަރާ 2 މީހުންނަށް ކީމޯ ސެޝަންތައް ކުރިއަށް ގެންދެވޭނެ އިންތިޒާމުވެސް ވަނީ ހަމަޖައްސާފައެވެ.

ކީމޯތެރަޕީ ނެގުމަށް އެދޭ ފަރާތްތަކުން ރަޖިސްޓްރީ ކުރަން މިހާރު ވަނީ މި ހޮސްޕިޓަލުން ހުޅުވާލާފައެވެ. ކެންސަރުގެ އެކި ބާވަތްތަކަށް އަދި އެކި ބަލި މީހުންނަށް ކީމޯ ދިނުމުގެ ޓްރީޓްމަންޓް ޕްލޭން ތަފާތުވާނެތީ، ރާއްޖެއިން ބޭރުން ކީމޯގެ މުއްދަތުގައި ބޭނުންވާ ބޭސް ހޯދުމަށް ހޮސްޕިޓަލަށް އެކަށީގެންވާ ވަގުތު ބޭނުންވާނެތީ، އެ މައުލުމާތު ހިއްސާކޮށް، ހޮސްޕިޓަލަށް ގުޅައިގެން ކީމޯގެ ސެޝަނަށް ބޭނުންވާ ބޭސް ހޯދުމުގެ ކަންކަން ހަމަޖެއްސުމަށް އެހޮސްޕިޓަލުން އެދެއެވެ.

ތަފާސްހިސާބުން ދައްކާ ގޮތުގައި ރާއްޖެއިން އެންމެ ގިނަ މުހުން ބޭސްފަރުވާއަށް ބޭރަށް ދާން ޖެހޭ ދާއިމި އެންމެ ބޮޑު ބައްޔަކި ކެންސަރެވެ. ހުޅުމާލެ ހޮސްޕިޓަލުގެ ތަފާސްހިސާބަށް ބަލާއިރު، ރ.އަތޮޅަކީ ރާއްޖޭގައި 4 ވަނައަށް އެންމެ ގިނައިން ކެންސަރު ބަލި މީހުން ރަޖިސްޓަރކޮށްފައިވާ އަތޮޅެވެ. އެގޮތުން މިވަގުތުވެސް ރ.އަތޮޅުގައި މިވަގުތު ކެންސަރަށް ފަރުވާ ހޯދަމުންދާ 58 ބަލި މީހުން އެބަތިއްބެވެ.