އެމްޑީޕީގެ ރިޔާސީ ޕްރައިމަރީގައި ޝަމްހީދު ވާދަކުރައްވަނީ

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކުރިއަށް އޮތް ރިޔާސީ ޕްރައިމަރީގައި ވާދަކުރައްވާނެކަން، ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު އިޢުލާނުކުރައްވައިފިއެވެ.

ޑރ. ޝަމްހީދު މިކަން ހާމަކުރެއްވީ "ޝަމްހީދާ އެކު" ޕޮޑްކާސްޓުގެ ފުރަތަމަ އެޕިސޯޑުގައެވެ.

ރާއްޖޭގެ މިހާރުގެ ހާލަތަށް އަލިއަޅުއްވާލައްވަމުން ޑރ. ޝަމްހީދު ވިދާޅުވީ،  ވޭތުވެދިޔަ އެކި ސަރުކާރުތަކުން މަސައްކަތްކޮށްފައި ވަނީ ވެރިކަމުގައި ތިބި ފަރާތްތަކާ ގާތް ވަކި ބަޔަކަށް ނާޖާއިޒު މަންފާތަކެއް ހޯދައިދިނުމަށް ކަމަށެވެ.

އަދި ރާއްޖޭގެ ޑިމޮކްރަސީއަށް 18 އަހަރު ފުރިގެން ދިޔައިރު، ދަޢުލަތުން 500 ބިލިއަން ރުފިޔާ ޚަރަދުކޮށް، 160 ބިލިއަން ރުފިޔާގެ ބޮޑު ދަރަންޏެއް ބޮލުގައި އެޅިފައިވީ ނަމަވެސް، ރައްޔިތުން އެދޭ އަސާސީ ޙައްޤުތައް ކަމުގައިވާ ބޯހިޔާވަހިކަމާއި އެކަށީގެންވާ ބޭސްފަރުވާ ފަދަ ޚިދުމަތްތައް އަދިވެސް ފުރިހަމައަށް ހާސިލުވެފައި ނުވާކަމަށް އޭނާ ފާހަގަކުރެއްވިއެވެ.

ޑރ. ޝަމްހީދު ވިދާޅުވީ، އޭނާގެ އަމާޒަކީ ރައްޔިތުންނަށް ދިމާވެފައިވާ ގޮންޖެހުންތަކާއި މައްސަލަތަކަށް ދާއިމީ ޙައްލެއް ހޯއްދަވައިދެއްވައި، ޢާންމު ރައްޔިތުމީހާގެ ޙައްޤުގައި އިޚްލާޞްތެރި ވެރިކަމެއް ކޮށްދެއްވުން ކަމަށެވެ.

ޝަމްހީދުގެ އިތުރުން، ކުރީގެ ރައީސް އިބްރާހީމް މުޙައްމަދު ޞާލިޙް އާއި، އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއިލް އާއި، އެ ޕާޓީގެ ކުރީގެ ރައީސް ޝާހިދުވެސް ޕްރައިމަރީގައި ވާދަކުރައްވާނެ ކަމަށް ވަނީ ވިދާޅުވެފައެވެ.