ރަނުގެ ފުރުސަތެއް: ފުރަތަމަ ހިފުޒް ސެންޓަރު ބިނާކުރުމުގައި ބައިވެރިވެލައްވާ

ކީރިތި ގުރުއާން ހިތުދަަސްކޮށް ދިނުމަށް ހާއްސަކޮށްގެން ގާއިމު ކުރެވޭ ފުރަތަމަ ހިފުޒް ސެންޓަރު ބިނާކުރުމުގައި އެހީތެރެވޭން ބޭނުންވާ މީހުންނަށް އެ ފުރުސަތު ހުޅުވާލައިފި އެވެ.

ހިފުޒް ސެންޓަރު ބިނާކުރުމަށް ހަމަޖެހިފައި ވަނީ ތައުލީމަށް މަޝްހޫރު ފާދިއްޕޮޅު ނައިފަރުގަ އެވެ. އެ މަސައްކަތް ކުރިއަށް ގެންދަނީ މިވަގުތު ހާފިޒުން އުފެއްދުމުގެ މަސައްކަތް އެންމެ ފުޅާ ދާއިރާއެއްގައި ކުރަމުން ގެންދާ ނައިފަރު, ހުވަނދުމާގެ އައްޝައިހް / ހާފިޒް އަހްމަދު ނާޒިލްގެ ޤުރުއާން ކިލާހުންނެވެ.

ޝެއިހް ނާޒިމް މިއަދު "ވޮއިސް" އަށް ވިދާޅުވި ގޮތުގައި ހިފުޒް ސެންޓަރެއް ބިނާކުރުމުގެ މައިގަނޑު މަގުސަދަކީ ނައިފަރުގައި މިހާރު ފަށާފައިވާ ޕްރަގްރާމް މުޅި ރާއްޖެއަށް ފުޅާކުރުމެވެ. އެ މަަސައްކަތަށް އެހީތެރިކަން ހޯދުމަށް ތަނަވަސް ކަމުގެ އަހުލުވެރީންނާއި ބޮޑެތި ކުންފުނިތަކުގައި އެދުނެވެ. ނަމަވެސް މާބޮޑު ތަރުހީބެއް ނުލިބުކަން ފާހަގަ ކުރެއްވި އެވެ.

ނަމަވެސް މި ސެންޓަރު އިމާރާތް ކުރާނެ ތަކެތި ދޭނެ ފަރާތެއް މިހާރު ހަމަޖެހިފައިވާ ކަމަށް ޝެއިހް ވިދާޅުވި އެވެ.

އެހެން ކަމުން އެހެނިހެން މަސައްކަތްތަކަށް އެހީތެރިވެ ދިނުމުގެ ފުރުސަތު އާންމުކޮށް ވަނީ ހުޅުވާލާފަ އެވެ.

ޝެއިހް ވަނީ މި ބަރަކާތްތެރި މަސައްކަތުގައި ކިތަންމެ ކުޑަ މިންވަރެއް ހޭދަކޮށްގެން ވެސް ބައިވެރިވުމަށް އެދިވަޑައިގެންފަ އެވެ.

ނާޒިލްގެ ޤުރުއާން ކިލާހުން ދަނީ މިވަގުތު ރާއްޖޭގައި ހިންގޭ އެންމެ ކާމިޔާބު ހިފްޒު ޕްރަގްރާމް ހިންގަމުންނެވެ. ކުރު މުއްދަތެއްގެ ތެރޭގައި ނައިފަރުގެ ހަތަރު ދަރިވަރަކު ވަނީ ގުރުއާން ހިތުން ދަސްކޮށް ހާފިޒު ކަމުގެ ސަނަދު ހާސިލު ކޮށްފަ އެވެ.

އަދި މި އަހަރު ނިމުމުގެ ކުރީން އިތުުރު 8 ދަރިވަރަކު ގުރުއާން ހިތުން ދަސްކޮށް ހާފިޒު ކަމުގެ ސަނަދު ހާސިލު ކުރާނެ އެވެ.

ޝެއިހް ވިދާޅުވި ގޮތުގައި މިވަގުތު އެ މަސައްކަތް ކުރަމުން ދަނީ ޖާގައިގެ ގޮތުން ދަތި އަދި ހާލަތު ވެސް ދަށް އިމާރާތެއްގަ އެވެ.

އެހެން ކަމުން ހިފުޒް ސެންޓަރު ބިނާކުރުމުގެ މަސައްކަތް ކާމިޔާބުވުމުން ހާފިޒުން އުފެއްދުމުގެ މަސައްކަތް ބޮޑުތަނުން ފުޅާ ކުރެވޭނެ އެވެ.

"ރަމަޟާން މަހު ކުރެވޭނެ އެންމެ މާތް ހޭދައަކީ ކީރިތި ގުރުއާނަށްޓަކައި ކުރެވޭ ހޭދަ. މި ކާމިޔާބު ހިފުޒު ޕްރަގްރާމް ހުއްޓުމެއްނެތި ކުރިއަށް ގެންދިއުމަށާއި މާތްﷲގެ ވާގިފުޅަށް ފަހު ތަޖުރިބާއާއެކު ކީރިތި ގުރުއާން ހިތުދަސް އެތައް ހާފިޒުންނެއް އުފެއްދުމުގެ މަތިވެރި މަގުސަދު ގައި ބިނާކުރެވޭ ހިފުޒު ސެންޓަރު ބިނާކުރުމަށް ދީލަތި އެހީވެލައްވާ," ޝެއިހް ނާޒިލްގެ ފަރާތުން އާންމު ކޮށްފައިވާ ޕޯސްޓެއްގައި ވެ އެވެ.