އަދާލަތު ޕާޓީގެ އިންތިޚާބާމެދު ޝައްކު އުފެދޭ ގޮތަށް ވާހަކަ ނުދެއްކުމަށް އިކްރާމަށް އަންގައިފި

އަދާލަތު ޕާޓީގެ ރައީސް ހޮވުމަށް ބާއްވާ އިންތިހާބުގައި ވަގު ހަދައިގެން ނަތީޖާ ބަދަލުކުރަން މަސައްކަތް ކޮށްފާނެ ކަމުގެ ތުހުމަތާއެކު، އެކަން ދޮގުކޮށް އެ ޕާޓީގެ އިންތިޚާބު ކޮމިޓީގެ ސިޓީއެއް، ރައީސް ކަމަށް ކުރިމަތިލާފައިވާ އިކްރާމް އަބްދުއްސައްތާރަށް ފޮނުވައިފިއެވެ.

އިންތިޚާބުގައި ވަގު ހަދަން އުޅޭކަމަށް ތުހުމަތު ކުރައްވައި އަދާލަތު ޕާޓީގެ އިންތިހާބީ ކަންތައްތަކާއި ބެހޭ ކޮމެޓީގެ މުގައްރިރަށާއި އިލެކްޝަންސް ކޮމިޝަނަށް ވެސް އިކްރާމް ވަނީ ސިޓީ ފޮނުވާފަ އެވެ.

އެ ސިޓީގެ ޖަވާބުގައި އިންތިޚާބު ކޮމިޓީގެ ރައީސް ފޮނުއްވި ސިޓީގައި ބުނީ، އިންތިޚާބު ކޮމެޓީގެ ފަރާތުން، އިންތިޚާބުގެ ކަންކަން ކުރިއަށް ގެންދަނީ ޢަދާލަތު ޕާޓީގެ ދުސްތޫރާއި، އަދި އެތެރޭގެ އިންތިޚާބުތަކަށް ހެދިފައިވާ ގަވާއިދުތަކާއި އެއްގޮތްވާގޮތުގެ މަތިން ކަމަށެވެ.

”މިގޮތުން، މިވަގުތު ޢަދާލަތު ޕާޓީގެ އެތެރޭގެ އިންތިޚާބުތަކަށް ހެދިފައިވާ ގަވާއިދުން، މި އިންތިޚާބުގައި ވޯޓު ފޮށި ބެހެއްޓުމަށް ޖާގަ ނުދޭ ކަމުގައި ދަންނަވަމެވެ.“ އެ ސިޓީގައި ބުނެފައިވެއެވެ.

މިއާއެކު އެ ސިޓީގައި ބުނީ، ޕާޓީގެ 4 ވަނަ ދައުރަށް އިންތިޚާބު ކުރަންޖެހޭ ފަރާތްތައް އިންތިޚާބު ކުރުމުގެ މަސައްކަތްތައް ކުރިއަށް ގެންދަނީ އިންތިޚާބު ކޮމެޓީގެ ބެލުމުގެ ދަށުން ކަމަށާ، އިންތިޚާބު ކޮމެޓީގެ ފަރާތުން، އިންތިޚާބުގެ ކަންކަން އިންތިޒާމުކުރަމުން ގެންދާނީ އިންތިޚާބުގެ މިނިވަންކަމާއި، އަދި އިންތިޚާބުގެ ދެ ފުށްފެންނަކަން ކަށަވަރުވާނެ ގޮތުގެ މަތިން ކަމަށެވެ.

”މިހެންކަމުން ޕާޓީގެ މެންބަރުންގެ މެދުގައި އިންތިޚާބާއި މެދު ޝައްކު އުފެދޭނެގޮތަށް ވާހަކަ ނުދެއްކުމަށް އިންތިޚާބު ކޮމެޓީގެ ފަރާތުން އިލްތިމާސް ކުރަމެވެ.“ އިންތިޚާބު ކޮމިޓީގެ ސިޓީގައި ބުނެފައިވެއެވެ.

މި އިންތިހާބުގައި އިކްރާމްއާ ވާދަކުރަނީ މިހާރު ވެސް އަދާލަތުގެ ނާއިބު ރައީސެއްގެ ގޮތުގައި ހުންނެވި ޝައިހް މުޙައްމަދު ޝިފާން އެެވެ. އޭނާގެ ރަނިންމޭޓަކީ ޝައިހް އަބްދުالله ރަޝީދު އެވެ.