ވިޔަފާރީގެ ފުރުޞަތުތައް އޮތީ ރަށްރަށުގައި ކަމަށް ނަޝީދު ވިދާޅުވެއްޖެ

އެމްޑީޕީގެ ފަސްވަނަ ކޮންގްރެސްގައި ބޭއްވި "ރަށްވެހި ތަރައްޤީ" އިންވެސްޓްމަންޓް ފޯރަމް ހުޅުއްވައިދެއްވަމުން އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު ރާއްޖެއަށް ބޭނުންވާ ތަރައްޤީ މާލޭގައި ތިބެގެން ނުގެނެވޭނެ ކަމަށް ވިދާޅުވެ، ވިޔަފާރީގެ އެންމެ ބޮޑެތި ފުރުޞަތުތައް ފަހިވެފައި ހުރީ ރަށްރަށުގައި ކަމަށް ވިދާޅުވެއްޖެއެވެ.

އެ މަނިކުފާނުގެ ވާހަކަފުޅުގައި ވިދާޅުވީ މިއަހަރު 118 ރަށަކަށް ވަޑައިގެންނެވިއިރު ހަވާދު ހެދުމާއި ތައްޔާރީ ކާނާ އުފެއްދުމާއި ކޭކު ފިހުން ފަދަ ކޮންމެވެސް ކުދި މަސައްކަތެއް ނުހިނގާ އެންމެ ރަށެއް ވެސް ނެތް ކަމަށެވެ.

އެ މަސައްކަތްތައް މިހާރަށް ވުރެ ފުޅާކުރަންޖެހޭ ކަމަށް ވެސް އެ މަނިކުފާނު ވިދާޅުވިއެވެ.

އިންވެސްޓްމަންޓް ފޯރަމްގެ އެމްޑީޕީގެ ޕްރޮޖެކްޓް ޑިޕާޓްމަންޓުގެ އަމާޒަކީ ރަށްރަށުގައި ހިނގާ އާމްދަނީ ލިބޭ މަސައްކަތްތައް އެ މަސައްކަތްތައް ވިޔަފާރިއަކަށް ބަދަލުވެގެން ވިޔަފާރީގެ އުސޫލުން ނަފާލިބިގެން ފައިދާ ލިބިގެން ހިންގޭނެ ގޮތްތަކެއް ކައުންސިލުތަކަށް ހޯދައިދިނުން.

އެ މަނިކުފާނު ވިދާޅުވިއެވެ.

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަން މި ވާހަކަފުޅު ދެއްކެވީ އެ ޕާޓީގެ ފަސްވަނަ ކޮންގްރެސްގެ ތެރެއިން ކުރިއަށް ގެންދިޔަ އިންވެސްޓްމަންޓް ފޯރަމް ފެށުމުގެ ރަސްމިއްޔާތުގައެވެ.

މި ފޯރަމަކީ ކައުންސިލްތަކުން ތަރައްޤީގެ ގޮތުގައި ރާވާފައި ހުރި މަޝްރޫޢުތަކަށް ފައިސާ ހޯދުމުގެ މަގު ފަހިކޮށްދިނުމުގެ ބޭނުމުގައި ބާއްވާ ހަރަކާތެކެވެ. ހުށަހަޅާ 76 ޕްރޮޕޯސަލްގެ ތެރެއިން 40 ޕްރޮޕޯސަލެއްގައި ބޭނުންވާ އިންވެސްޓްމެންޓްގެ ޢަދަދު ބަޔާންކޮށްފައިވާއިރު އެ ހުށަހެޅުންތަކުގެ ޖުމުލަ އަގު 306 މިލިއަން ޑޮލަރަށް އަރައެވެ.

ސިޓީ ކައުންސިލްތަކުގެ އިތުރުން 27 ރަށު ކައުންސިލަކުން މި ފޯރަމަށް ޕްރޮޕޯސަލް ހުށަހަޅައިފައިވެއެވެ.