މިސްކިތް އަޅަން ރަސްދޫން ބިމެއް ދޭން ކައުންސިލުން ބޮޑު އަގެއް ކިޔުން، ރައީސްގެ ކަންބޮޑުވުން
ލިޔުންތެރިޔާ
އަހުމަދު ހަމީދު އާދަމް
އއ. ރަސްދޫގައި މިސްކިތެއް ބިނާކުރުމަށް ބިމެއް ހަމަޖައްސައި ދިނުމަށް އެދުމުން ބޮޑު އަގަކަށް ބިން ދޭން ކައުންސިލުން ނިންމި ނިންމުމާއިމެދު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަންބޮޑުވުން ފާޅު ކުރައްވައިފި އެވެ.
އއ އަތޮޅުގެ ރަށްތަކަށް އިއްޔެ ފެއްޓެވި ދަތުރުފުޅުގައި ހަތް ވަނަ ރަށެއްގެ ގޮތުން ރައީސް ވަނީ ރަސްދޫއަށް ވަޑައިގެންފަ އެވެ. އެ ރަށު ކައުންސިލާއެކު ބޭއްވެވި ބައްދަލްވުމަށް ފަހު ރައީސް ވަނީ ރައްޔިތުންނާއި ބައްދަލު ކުރައްވާފަ އެވެ. އެ ޖަލްސާގައި ވާހަކަ ދައްކަވަމުން ރައީސް ވަނީ އެ ރަށުގައި ޒަމާނީ މިސްކިތެއް ބިނާކުރުމަކީ އެމަނިކުފާނުގެ ވައުދެއް ކަން ފާހަގަ ކުރައްވާފަ އެވެ.
އެ މަސައްކަތް ކުރުމަށް ބިމެއް ހަމަޖެއްސުމަށް ކައުންސިލްގައި އެދުމުން ބިމެއް ހަމަޖައްސައިދިނީ ވަރަށް ބޮޑު އަގަކަށް ކަމަށް ރައީސް ވިދާޅުވި އެވެ. އެކަމާއި ކަންބޮޑުވުން ފާޅުކުރައްވާ ރައީސް ވިދާޅުވީ ލާމަރުކަޒީ ނިޒާމަށް މިހާރު ގެނެސްފައިވާ ބަދަލާއެކު އެކަން އެގޮތަށް ނުކުރެވޭނެ ކަމަށެވެ.
ރައްޔިތުންގެ އަސާސީ ބޭނުންތަކަށް ކުރެވޭ މަަސައްކަތަކާއި ބިނާތަކަށް ދޫކުރާ ބިންތަކުން ކުލި ނެގުމާއި ބޮޑު އަގުގައި ދިނުން ފަދަ ކަންކަން ދެން ނުކުރެވޭނެ ކަމަށް ވިދާޅުވި އެވެ. ރައީސް ވިދާޅުވީ ހޮސްޕިޓަލާއި, މިސްކިތާއި ޕޮލިސް އިދާރާއާއި ފެނާއި ނަރުދަމާފަދަ ކަންކަން ކުރުމަށް ރަށްރަށުން ބިން ހަމަޖައްސާއިރު ކުލި ނެގުމާއި ބޮޑު އަގުގައި ބިން ދިނުމަކީ ބަލަައިގަނެވޭނެ ކަމެއް ނޫން ކަމަށެވެ.
އެހެން ކަމުން ކައުންސިލްގެ ނިންމުން ބަދަލުކޮށް އެ ބިން ނޫނީ އެހެން ބިމެއް ނަމަވެސް މިސްކިތް ބިނާކުރުމަށް ހަމަޖެއްސުމަށް އެދިވަޑައިގަތެވެ.
10,000 އަކަފޫޓް ބިމެއް ރަސްދޫ ކައުންސިލަށް
މިއަދުގެ ޖަލްސާގައި ރައީސް ވަނީ ރަސްދޫ އިން ފުލުހުންނަށް ދީފައިވާ ބޮޑު ބިމުން ބައެއް ކައުންސިލާއި ހަވާލު ކުރުމަށް ނިންމާފައިވާކަން އިއުލާނު ކުރައްވާފަ އެވެ. މިއީ މީގެ އެތައް އަހަރެއް ކުރީން ރަސްދޫ އިން ފުލުހުންނަށް ދީފައިވާ ބިމެކެވެ. އެއީ އެ ރަށުގައި ޕޮލިސް ސްޓޭޝަން ގާއިމުކުރުމަށް ދިން ބިމެކެވެ.
ރައީސް ވިދާޅުވީ އެ ބިމުން 10,000 އަކަފޫޓްގެ ބައެއް ކައުންސިލާއި ހަވާލު ކުރަން ނިންމާފައިވާ ކަމަށެވެ. އެއީ ވަރަށް މުހިންމު ސަރަހައްދަކުން ފުލުހުންނަށް ދޫކޮށްފައިވާ ބޮޑު ބިމެއްކަން ފާހަގަކޮށް ރައީސް ވިދާޅުވީ ކައުންސިލަށް އެ ބިން ހަވާލުކުރުމުން އާމްދަނީ ހޯދޭނެ ތަނަވަސް މަގެއް ފަހިވާނެ ކަމަށެވެ.
އެމަނިކުފާނުގެ ބޭނުންފުޅަކީ ކައުންސިލްތައް ބާރުވެރިކޮށް މާލީ ގޮތުން ފުރުސަތުތައް ފަހިކޮށް ދެއްވުން ކަމަށް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
