އިންޝުއަރެންސް ހޯދުމަށްޓަކައި ދޮގު މައުލޫމާތު ދީފިނަމަ، ފަސްމިލިއަން ރުފިޔާއިން ޖޫރިމަނާ ކުރެވޭގޮތަށް ގާނޫނެއް!

އިންޝުއަރެންސް ހޯދުމަށްޓަކައި ތެދުނޫން މައުލޫމާތު ދީފިނަމަ އެއްލައްކަ ރުފިޔާ އާއި ފަސް މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރެވޭ އިންޝުއަރެންސްގެ ބިލް ރައްޔިތުންގެ މަޖިލީހަށް ހުށަހަޅައިފި އެވެ.

ސަރުކާރުގެ ފަރާތުން މި ބިލް ހުށަހެޅުއްވީ މަހިބަދޫ ދާއިރާގެ މެންބަރު އަހުމަދު ތޯރިގު އެވެ.

މި ބިލު ހުށަހެޅުމުގެ ބޭނުމެއްގެ ގޮތުގައި ބުނެފައިވަނީ، ރާއްޖޭގައި ހަރުދަނާ އަދި ރައްކާތެރި ގޮތެއްގައި އިންޝުއަރެންސް ވުޔަފާރި ހިންގުމަށއޓަކައި އަމަލުކުރަންޖެހޭ އުސޫލުތައް ކަނޑައެޅުމުގެ ގޮތުން، އިންޝުއަރެންސް ކުންފުނިތަކާއި، އިންޝުއަރެންސް އިންޓަމީޑިއަރިންގެ ގެ ގޮތުގައި ހަރަކާތްތެރިވާ ފަރާތްތަކަށް ލައިސެންސް ދިނުމާ ގުޅޭ އުސޫލުތަކާއި، އެފަރާތްތައް ރެގިޔުލޭޓްކޮށް ސުޕަވައިޒް ކުރުމާ ގުޅޭ އުސޫލުތަކާއި، އެނޫންވެސް އިންޝުއަރެންސް ވިޔަފާރިއާ ގުޅޭ އުސޫލުތައް ކަނޑައެޅުމަށް ބޭނުންވާ ގާނޫނީ އޮނިގަނޑު އެކުލަވައިލުމެވެ.

މި ބިލު ހުށަހެޅުމުގެ މަގުސަދަކީ އިންޝުއަރެންސްގެ ދާއިރާގެ ފެންވަރު ހިފެހެއްޓުމަށްޓަކައި އިންޝުއަރެންސް ވިޔަފާރި ހިންގުމާއި އިންޝުއަރެންސްގެ ދާއިރާގައި ހަރަކާތްތެރިވާ ފަރާތްތަކުގެ ވިޔަފާރީގެ ހަރުދަނާ އަދި ރައްކާތެރި އުސޫލުތައް އެކަށައަޅައި އެ އުސޫލުތަކާ އެއްގޮތަށް ވިޔަފާރި ހިނގާތޯ ބެލުން ކަމަށް ބުނެފައިވެއެވެ.

މި ބިލުގައިވާގޮތުން، އިންޝުއަރެންސް ހޯދުމަށް ގަސްދުގައި ސީދާކޮށް ނުވަތަ ނުސީދާކޮށް ތެދުނޫން މައުލޫމާތެއް ދީގެން ހައްގުނޫން މަންފާއެއް ހޯދުމާއި އެފަދަ މަންފާއެއް ހޯދަން އުޅުން އަދި އެފަދަ މަންފާއެއް ހޯދައިދިނުމަށް އެހީތެރިވެދިނުމަކީ މަނާ ކަމެކެވެ.

އަދި އެފަދައިން ހައްގުނޫން މަންފާ ހޯދަން އުޅެފިނަމަ އެކަމުގެ ކުޑަބޮޑުމިނަށް ބަލައި އެއްލައްކަ ރުފިޔާ އާއި ފަސް މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރުމުގެ އިހުތިޔާރު މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީއަށް ލިބިގެންވެއެވެ.

މީގެ އިތުރުން، މި ބިލުގައި ވަނީ އިންޝުއަރެންސް ކުންފުނި ނުވަތަ ގުޅިފައިވާ ފަރާތަކުން ގާނޫނާ ޚިލާފުވެއްޖެނަމަ އަޅާނެ ފިޔަވަޅުތައް ވެސް ބަޔާންކޮށްފައެވެ.

އެގޮތުން، އެފަރާތުން ހިންގާ ހަރަކާތްތަކުގެ ތެރެއިން ވަކި ހަރަކާތެއް ހުއްޓާލުމަށް އެންގުމާއި،އިތުރަށް ވިޔަފާރި ކުރިއަށް ގެންދިޔުމަށް ވަކި ޝަރުތުތަކެއް ކަނޑައެޅުން ހިމެނެއެވެ.

އަދި ހިއްސާދާރުންނަށް ފައިދާ ބެހުން މަނާކުރުން ނުވަތަ ބަހާ މިންވަރު ހުދޫދުކުރުމާއި، ކަނޑައަޅާ އަދަދެއްގެ ފައިސާ ވަކި މުއްދަތަކަށް ޑިޕޮސިޓްކޮށް ބެހެއްޓުމަށް އެންގުމުގެ އިތުރުން، އެފަރާތުގެ ޑިރެކްޓަރުންގެ ބޯޑުގެ ޗެއާމަން ނުވަތަ ބޯޑުގެ އެހެން މެންބަރެއް، މަގާމުން ވަކިކުރުމަށް އެންގުންވެސް ހިމެނެއެވެ.

ހަމައެހެންމެ، ކުންފުނި އެއް މިލިއަން ރުފިޔާއަށްވުރެ ބޮޑު ނޫން އަދަދަކުން ޖޫރިމަނާކުރުމާއި، ވެފައިވާ ޚިލާފު ރަނގަޅު ވަންދެން ނުވަތަ އަމަލުކުރަންޖެހޭ ކަންކަމަށް އަމަލުކުރަންދެން ހިނގާ ކޮންމެ ދުވަހެއްގެ މައްޗަށް އެއްލައްކަ ރުފިޔާއަށްވުރެ އިތުރުނުވާ އަދަދަކުން ޖޫރިމަނާކުރުން ހިމަނާފައިވެއެވެ.

ހަމައެއާއެކު އިންޝުއަރެންސް ބިލުގައި ހިމެނޭ، މަނާ ކަމެއް ކުރުމުގެ ތުހުމަތުގައި އެ ފަރާތެއް ބަލާ ފާސްކުރުމަށް ހުރަސްއަޅައިފިނަމަ 75،000 ރުފިޔާއާއި 750،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ.

މި ބިލްގައި އިންޝުއަރެންސްގެ ވިޔަފާރި ބަހާފައިވަނީ ޖެނެރަލް އިންޝުއަރެންސް ވިޔަފާރި އަށާއި ލޯންގްޓާމް އިންޝުއަރެންސް ވިޔަފާރި އަށެވެ.

ޖެނެރަލް އިންޝުއަރެންސްގެ ވިޔަފާރީގެ ތެރޭޣައި ޖެނެރަލް ތަކާފުލް ވިޔަފާރި ހިމެނޭއިރު ލޯންގް ޓާމް އިންޝުއަރެންސް ވިޔަފާރީގެ ތެރޭގައި ފެމެލީ ތަކާފުލް ވިޔަފާރި ހިމެނެ އެވެ. ބިލްގައިވާ ގޮތުން ރާއްޖޭގައި އިންޝުއަރެންސްގެ ވިޔަފާރި ކުރެވޭނީ މޯލްޑިވްސް މަނިޓަރީ އޮތޯރިޓީން އިން ދޫކުރާ ލައިސަންސް ލިބިގެންނެވެ.