މަޖިލީހުގެ ރައީސް އާއި ނައިބު ރައީސްގެ އިތުބާރު ނެތް މައްސަލަ ނަގައިފި

މިވަގުތަށް ކުރިއަށް ގެންދަން ބޭނުންނުވާކަމަށް ބުނެ، މަޖިލީހުގެ ރައީސް މުހައްމަދު އަސްލަމާއި ނައިބު ރައީސް އަހުމަދު ސަލީމްގެ އިތުބާރު ނެތް ކަމަށް ޕީޕީއެމް/ޕީއެންސީ ކޯލިޝަނުން ހުށަހެޅި މައްސަލަ އެ ކޯލިޝަނުން ނަގައިފި އެވެ.

ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި ފޮނަދޫ ދާއިރާގެ މެމްބަރު މޫސާ ސިރާޖު މިއަދު އެކްސް ގައި ކުރެއްވި ޕޯސްޓެއްގައި ވިދާޅުވީ މި ވަގުތަށް މި މައްސަލަ ކުރިއަށް ގެންދަން ބޭނުންނުވާތީ، އެކަން މަޖިލީހަށް ދަންނަވާފައިވާ ކަމަށެވެ.

"ރައްޔތުންގެ މަޖިލީހުގެ ރައީސްއާއި ނައިބު ރައީސްގެ އިތުބާރުނެތްކަމުގެ މައްސަލަ މިވަގުތު ކުރިޔަށް ގެންދަން ބޭނުންނުވާތީ، އެކަން ރައްޔިތުންގެ މަޖިލީހަށް މިހާރުވާނީ ދަންނަވާފައި."

ސިރާޖު ވިދާޅުވިއެވެ.

މިފަދައިން މަޖިލީހަށް އަންގާފައިވާއިރު މި މައްސަލައިގެ ނޯޓިސް މި ދޭބެފުޅުންނަށް މަޖިލީހުން ވަނީ ފޮނުވާފައެވެ.

އަސްލަމާއި ސަލީމް ގެ އިތުބާރު ނެތް ކަމަށް ބުނެ މައްސަލަ ހުށައެޅީ މިދިޔަ މަހުގެ 28 ވަނަ ދުވަހު ސަރުކާރު ހިންގާ ޕީޕީއެމް/ޕީއެންސީ ކޯލިޝަން ގެ ޕާލިމެންޓަރީ ގްރޫޕުންނެވެ.

އެ ކޯލިޝަނުން މި ދެބޭފުޅުންގެ އިތުބާރު ނެތް ކަމަށް ހުށައެޅީ އަސްލަމް ވަކި ޕާޓީއެއްގެ މަސްލަހަތު ކުރިއެރުވުމަށާއި، ދުސްތޫރުން މަތިކޮށްފައިވާ ޒިންމާތަކާއި ޚިލާފުވާ ގޮތަށް އަމަލު ކުރައްވާކަމަށް ބުނެ، 23 މެމްބަރުންގެ ސޮޔާއި އެކު އެވެ.  މި ގަރާރުގައި ސޮއި ކުރެއްވި ބޭފުޅުންގެ ތެރޭގައި ޕީޕީއެމް/ޕީއެންސީގެ މެންބަރުންގެ އިތުރުން، އެމްޑީއޭއާއި އެމްއެންޕީގެ މެންބަރުން އަދި އަމިއްލަ މެންބަރު މުހައްމަދު ނަޝީދު އަބްދުالله ވެސް ހިމެނިވަޑައިގަންނަވައެވެ.

އިދިކޮޅުން ރައީސް ޑރ.މުއިއްޒުގެ ކެބިނެޓްގެ ބައެއް ވަޒީރުންނަށް ރުހުން ނުދޭން ނިންމުމާއި ގުޅިގެން މަޖިލިސް ތެރޭ އުފެދުނު ހަމަނުޖެހުންތަކުގެ ތެރެއިން ޕީޕީއެމް/ޕީއެންސީ ކޯލިޝަންގެ ޕީޖީ ގްރޫޕުން ހުށައެޅި ގަރާރުގައި ބުނެފައިވަނީ ވަޒީރުންނަށް ރުހުންދޭން ސަރުކާރުގެ މަސްއޫލިއްޔަތު އަދާ ކުރާ ކޮމިޓީން، އެ ބައްދަލުވުމަށް ހާޒިރުވި ހުރިހާ މެމްބަރުންގެ އިއްތިފާގުން ނިންމައި، އެ ރިޕޯޓް މަޖިލީހަށް ހުށައެޅި ކަމަށެވެ. ނަމަވެސް އަސްލަމް އެ މައްސަލަ އަށް ބަހުސް ކުރުމަށް ފުރުސަތު ނުދީ، އެ މައްސަލަ އާއި ގުޅޭ ގޮތުން މެމްބަރުންގެ ވޯޓަކަށް ވެސް ނާއްސަވާ، އެ ރިޕޯޓް އަނބުރާ ކޮމިޓީ އަށް ފޮނުވާލި ކަމަށް ވެސް އެ ގަރާރުގައި ވެއެވެ.

މި މައްސަލަ މިވަގުތަށް ކުރިއަށް ގެންދަން ބޭނުންނުވާކަމަށް ސިރާޖު ވިދާޅުވި ނަމަވެސް،  މައްސަލަ އަނބުރާ ގެންދިޔަ ސަބަބު ހާމަކުރައްވާފައެއް ނުވެއެވެ.