ދުވާލެއްގެ މައްޗަށް ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދެބައިކުޅަ އެއްބަޔަށް ދަށަށް

މެދުއިރުމަތީގެ ހަނގުރާމައާ ގުޅިގެން ރާއްޖެ އަންނަ ބޮޑެތި އެއާލައިންތަކުގެ ދަތުރުތައް މެދުކަނޑާލުމާއެކު ދުވާލެއްގެ މައްޗަށް ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ވަރަށްބޮޑަށް ދަށަށްދާން ފަށައިފިއެވެ.

ޓޫރިޒަމް މިނިސްޓްރީން ނެރެމުން އަންނަ ޑެއިލީ ޓޫރިސްޓް އެރައިވަލް އަޕްޑޭޓަށް ބަލާއިރު، މިދިަ ފެބްރުއަރީމަސް ނިމުނުއިރު ޖުމްލަ ގޮތެއްގައި ދުވާލެއްގެ މައްޗަށް ރާއްޖެއަށް 8،049 ފަތުރުވެރިން ޒިޔާރަތްކުރިއެވެ. ނަމަވެސް މެދުއިރުމަތީގެ ހަނގުރާމަ ފެށުމާއެކު މިހާރު ދުވާލެއްގެ މައްޗަށް ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ވަނީ 5 ހާހުން ދަށުގައެވެ.

ޓޫރިޒަމް މިނިސްޓްރީން ނެރެފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މިމަހުގެ އެއްވަނަ ދުވަހު 6,440 ފަތުރުވެރިން ޒިޔާރަތްކުރިއިރު، ދެވަނަ ދުވަހު 4,107 ފަތުރުވެރިން ޒިޔާރަތްކުރިއެވެ. އަދި މިމަހުގެ ތިންވަނަ ދުވަހު 4,988 ފަތުރުވެރިން ޒިޔާރަތްކުރިއެވެ.

މެދުއިރުމަތިން ރާއްޖެއަށް އުދުހުންތައް ބާއްވަމުން އަންނަ ޤަތަރު އެއާވޭސް، އިއްތިހާދު އެއާވޭސް އަދި އެމިރޭޓްސް އެއާލައިނުން ރާއްޖެއަށް ކުރަމުން އައި ޝެޑިއުލް ދަތުރުތައް މެދުކަނޑިފައިވާއިރު، އެ އެއާލައިންތަކުގެ އިތުރުން ފްލައި ދުބާއީ، ގަލްފް އެއާ އަދި އެއާ އަރަބިއާ ގެ ދަތުރުތައްވެސް ވަނީ މެދުކެނޑިފައެވެ. މި އެއާލައިންތަކަކީ، ޔޫރަޕުންވެސް އެންމެ ގިނަ އަދަދަކަށް ރާއްޖެއަށް ފަތުރުވެރިން ގެންނަ އެއާލައިންތަކެވެ.

އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ވިދާޅުވެފައިވަނީ، އިއްޔެ އެކަނިވެސް ރާއްޖެ އައުމަށް ޝެޑިއުލްކޮށްފައި އޮތް 53 ފްލައިޓްގެ ތެރެއިން 18 ފްލައިޓެއް ކެންސަލް ކޮށްފައިވާ ކަމަށެވެ. އެ އަދަދަށް ފްލައިޓް ކެންސަލްވެގެން ދިއުމަކީ އެކަމުގެ ނޭދެވޭ އަސަރު ރާއްޖޭގެ ޓޫރިޒަމަށްވެސް ކުރާނޭ ކަމެއްކަމަށް މިނިސްޓަރު ވަނީ ފާހަގަކުރައްވާފައެވެ.

އެމެރިކާ އަދި އިސްރާއީލް އިސްވެ އީރާނާ ދެކޮޅަށް ފެށި ހަނގުރާމައިގެ ހާލަތު އަދިވެސް ދަނީ ގޯސްވަމުންނެވެ. މެދުއިރުމަތީގެ ހަނގުރާމަ ނުހުއްޓި ދިގުލައިގެން ގޮސްފިނަމަ، އެކަމުގެ ސަބަބުން ރާއްޖޭގެ އިގްތިސާދުގެ ޓޫރިޒަމް އަދި ހަކަތައިގެ ދާއިރާއަށް ގޮންޖެހުންތަކާ ކުރިމަތިލާން ޖެހޭނޭކަމަށް ދިރާސާކުރާ ފަރާތްތަކުން ފާހަގަކުރެއެވެ.