ބުޅާތަކަށް ޚާއްޞަ ރަށެއް ތަރައްޤީކުރަނީ؛ ޝައުގުވެރިވާ ފަރާތްތަކުގެ ޕްރޮޕޯސަލް ލިބިއްޖެ: ޝިޔާމް
ބުޅާ ގެންގުޅުމަށް ވަކި ރަށެއް ތަރައްޤީކުރުމުގެ މަޝްރޫޢަށް ޝައުގުވެރިކަން ފާޅުކޮށް ބައިނަލްއަޤުވާމީ ފަރާތެއް ހިމެނޭ ގޮތަށް ޕްރޮޕޯސަލް ލިބިފައިވާ ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް މިއަދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވަޒީރު ވިދާޅުވީ، މިފަދަ ރަށެއް ޤާއިމުކުރުމަކީ ބޮޑު ޚަރަދެއް ހިނގާ ކަމެއް ކަމުން އެ ކަމަށް ތައްޔާރަށް ތިބި ފަރާތްތައް ހޯދާފައިވާ ކަމަށެވެ. ލިބިފައިވާ ޕްރޮޕޯސަލްތައް އިވެލުއޭޓު ކުރުމުގެ މަރުޙަލާ މިހާރު ކުރިއަށްދާ ކަމަށް ވެސް ޝިޔާމް ވިދާޅުވިއެވެ.
"އިންޓަރނޭޝަނަލް ޕާރޓީއަކުން ޕްރޮޕޯސްކޮށްފައި އޮތް ޕްރޮޕޯސަލްއެއް. އަޅުގަނޑުމެން މި އުންމީދުކުރަނީ ބުޅާ ނުަވަތަ ޕެޓް ކޮމިއުނިޓީއަށް ވަރަށް އުފާވެރި ހަބަރެއްގެ ގޮތުގައި އެ މަޝްރުއު ވަރަށް ކާމިޔާބު މަޝްރޫއަކަށް ވާނީނަމަ ޔަގީނުން ވެގެން ދާނެ. ކޭގްކޮށްފައި ޕެޓް ބެހެއްޓުމަށްވުރެއް އަޅުގަނޑުމެން އެންމެންވެސް ލޯބިކުރަން ކެޓްއަށް. ދުނިޔޭގައި އެބައޮތް ވަރަށް ބޮޑު ކޮމިއުނިޓީއެއް، ރާއްޖޭ ފަދަ ޤައުމެއްގައި މި ފަދަ އައިލެންޑެއް ޒަމާނީ ފެސިލިޓީތަކާއެކު ހިންގިއްޖެނަމަ މިއީ އިންޓަރނޭޝަނަލް ކޮމިއުނިޓީއަށް ވެސް ވަރަށް ބޮޑު ޝައުގުވެރިކަމަކަށް ވާނެ".
ޝިޔާމް
މީގެ އިތުރުން ޝިޔާމް ވަނީ ހުޅުމާލޭ ދެވަނަ ފިޔަވަހީގައި ހުންނަ "އޮޅުހިޔާ" ގެ ޖާގަ އިތުރުކުރުމުގެ މަސައްކަތް ވެސް ބާރު ސްޕީޑުގައި ހިނގަމުންދާ ކަން ފާހަގަކުރައްވައި، ތަން ފުޅާ ކުރުމުން 500 އެއްހާ ބުޅާ ގެންގުޅެވޭނެ ކަމަށް ވިދާޅުވެފައެވެ. މިވަގުތު އެތަނުގައި 280 ބުޅާ އެބަ ތިއްބެވެ.
ކަރަންޓީނު ސަރަޙައްދަކާއި ކްލިނިކަކާއި ލެބޯޓްރީއަކާއި ފާމަސީއެއް ހިމެނޭ ގޮތަށް ތަރައްޤީކުރި އޮޅުހިޔާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުޅުއްވައިދެއްވީ 2024 ވަނަ އަހަރުގެ ނޮވެމްބަރު ދޭއްގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
