ކްލައިމެޓް ރެފިއުޖީންނަކަށް ވާކަށް ދިވެހިން ބޭނުމެއް ނޫން: އަސްލަމް

ކްލައިމެޓް ރެފިއުޖީންނަކަށް ވާކަށް ދިވެހިން ބޭނުމެއް ނުވާ ކަމަށާއި ދިވެހިން ބޭނުންވަނީ މި ހިތްގައިމު ރާއްޖޭގައި އަބަދު ވެސް އުޅެން ކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެއެވެ.

އަސްލަމް މިފަދައިން ވިދާޅުވީ، އިންޓަރ ޕާލިމެންޓްރީ ޔޫނިއަންގެ 148 ވަނަ އެސެމްބްލީގައި ބައިވެރިވެވަޑައިގެން ދެއްވި ތަގްރީރުގައެވެ.

އެގޮތުން އަސްލަމް ވިދާޅުވީ، ބިންތިރި ޖަޒީރާ ގައުމެއްގެ ހައިސިއްޔަތުން މޫސުމީ ބަދަލުތަކަށް މަގުފަހިވާ ނޭދެވޭ ޢަމަލުތަކުގައި ރާއްޖޭން ހިއްސާކުރާ މިންވަރުކުޑައިރު، މޫސުމީ ބަދަލުތަކުގެ ނުރައްކާ އިންތިހާއަށް ކުރިމަތިވެފައިވާ އަދި އެކަމުގެ އަގު އަދާކުރަންޖެހޭ ޤައުމުތަކުގެ ތެރޭގައި ރާއްޖެ ހިމެނޭކަމަށެވެ.

ދިވެހީންނަށް ސުލްޙައާއި އަމާންކަން ފުރިހަމަ ވާން އޮތީ މޫސުމީގޮތުންވެސް ރައްކާތެރިކަން ލިބިގެންކަން ފާހަގަކުރައްވަމުން އަސްލަމް ވިދާޅުވީ، މޫސުމީ ބަދަލުތަކުގެ ނުރައްކާ ދުވަހެއް ދުވަހަކަށް އިތުރުވަމުންދާއިރު، މޫސުމީ ބަދަލު ތަކުގެ ސަބަބުން ގެދޮރު ގެއްލިގެން ދާން ބޭނުން ނުވާ ކަމަށެވެ.

"މިއީ 5 ލައްކައެއްހާ މީހުންގެ އާބާދީއެއް ދިރިއުޅެމުންދާ ޤައުމެއް. މޫސުމީ ބަދަލުތަކުގެ ސަބަބުން އަޅުގަނޑުމެންގެ ގެދޮރު ގެއްލިދާކަށް ބޭނުމެއްނޫން. ކްލައިމެޓް ރެފިއުޖީންނަކަށް ވާކަށް ދިވެހިން ބޭނުމެއްނޫން. އަހަރުމެންގެވެސް ސަޤާފަތަކާއި އާދަކާތަކެއް އެބަހުރި. އަމިއްލަ ބަހަކާއި އަމިއްލަވަންތަކަމެއް އެބަހުރި. މި ހިތްގައިމު ރާއްޖޭގައި އަބަދުމެ އުޅެން އަހަރުމެން ބޭނުން."

އަސްލަމް ވިދާޅުވިއެވެ.

އަސްލަމް އިތުރަށް ވިދާޅުވީ ޑިމޮކްރަސީގެ ހަމަތައް ޤާއިމުކޮށް ޤާނޫނު ހަދާ މަޖިލީހެއްގެ ދައުރު އޭގެ އެންމެ ފުރިހަމަގޮތުގައި އަދާކުރުމަށް ދެ ޖިންސުގެ މެދުގައި ހަމަހަމަ ފުރުޞަތަކީ މުހިންމު އެއްޗެއްކަމަށެވެ. އަސްލަމް ވަނީ ރާއްޖޭގެ އާބާދީގެ ގާތްގަނޑަކަށް %49 އަންހެނުން ހިއްސާކުރާއިރު، ރާއްޖޭގެ ޤާނޫނު ހަދާ މަޖިލީހުގައި އަންހެން މެންބަރުން ހިމެނޭ ނިސްބަތަކީ އެންމެ %5 ކަން ވިދާޅުވެ ކަންބޮޑުވުން ފާޅުކުރައްވާފައެވެ. އެހެންކަމުން، ސިޔާސީ ޕާޓީތަކުގެ އިސް ސަފުގައި ހަރަކާތްތެރިވުމަށް އަންހެނުންނަށް މިހާރަށްވުރެއް ބޮޑަށް ހިތްވަރުދީ، ފުރުޞަތު ފަހިކޮށްދިނުން މުހިންމުކަމަށް އަސްލަމް ވިދާޅުވިއެވެ.

މީގެ އިތުރުންވެސް އަސްލަމް ވަނީ ފަލަސްޠީނުގެ މުސްލިމުން ދިރިއުޅެމުންދާ ނިކަމެތި ޙާލަތު ހިނދުކޮޅަކަށްވެސް ހަނދާން ނައްތާލައިގެން ނުވާނެކަން ފާހަގަކުރައްވާ، މިފަދަ ލާއިންސާނީ ޢަމަލުތަކަކީ ހަމައެކަނި ފަލަސްޠީނުގެ ރައްޔިތުންނަށް އެކަނި ދެވޭ އަނިޔާތަކެއްނޫންކަމަށާއި، މިއީ މުޅި ދުނިޔޭގެ ސުލްޙައާއި ހަމަޖެހުމަށްވެސް ސީދާގޮތުންނާއި ނުސީދާގޮތުން އަސަރުކުރުވާނެކަމެއްކަމަށް ވިދާޅުވެފައެވެ. އަދި ހައްދުފަހަނަ އަޅާފައިވާ ޔަހޫދީން ޣައްޒާގެ ރައްޔިތުންނަށް ދެމުންގެންދާ ލާއިންސާނީ ހަމަލާތައް ހުއްޓާލުމަށް ވެސް އަސްލަމް ގޮވާލެއްވިއެވެ.