އުތުރުގެ ތިން އަތޮޅަށް 19 ހާހަށްވުރެ ގިނަ ފަތުރުވެރިން ޒިޔާރަތްކޮށްފި

މިއަހަރުގެ މިހާތަނަށް ރާއްޖެއަށް އެއް މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު އުތުރުގެ ތިން އަތޮޅަށް 19،135 ފަތުރުވެރިން ޒިޔާރަތް ކޮށްފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

މިނިސްޓްރީ އޮފް ޓުއަރިޒަމްގެ ތަފާސްހިސާބުތަކުން ދައްކާ ގޮތުގައި، މި ހިނގާ ޖޫން މަހުގެ 11 ވަނަ ދުވަހުގެ ނިޔަލަށް ރާއްޖެ ޒިޔާރަތްކުރި 1،016،377 ފަތުރުވެރިންގެ ތެރެއިން އުތުރުގެ ތިން އަތޮޅުގައި ޗުއްޓީ ހޭދަކޮށްފައިވަނީ އެންމެ 19،135 ފަތުރުވެރިންނެވެ. މިއީ ނިސްބަތުން ވަރަށް މަދު އަދަދެއްކަން ފާހަގަކޮށްލަންޖެހެއެވެ. މިއީ މި މުއްދަތުގައި ރާއްޖެއަށް ޒިޔާރަތްކުރި ޖުމްލަ ފަތުރުވެރިންގެ 1.8 ޕަސެންޓެވެ.

މިވަގުތު ރާއްޖޭގައި ފަތުރުވެރިކަމަށް ހާއްސަކޮށް 175 ރިސޯޓާއި، 853 ގެސްޓްހައުސް އާއި، 159 ސަފާރީގެ އިތުރުން 16 ހޮޓެލް ދަނީ ހިންގަމުންނެވެ. ރާއްޖޭގައި ފަތުރުވެރިކަމުގެ ޖުމްލަ ބެޑް ކެޕޭސިޓީއަކީ 64،033 އެވެ.

އެހެން އަހަރުތަކެކޭ އެއްފަދައިން މިއަހަރުވެސް ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިންއެވެ. އެގޮތުން މިއަހަރުގެ މިހާތަނަށް ޖުމުލަ 115,802 ޗައިނާ ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.

ރާއްޖެއިން އަންނަނީ ފަތުރުވެރިކަން އިޝްތިހާރުކުރުމަށް އެތަކެއް މަސައްކަތްތަކެއް ކުރަމުންނެވެ. އެގޮތުން ކުރިއަށްއޮތް ހޫނު މޫސުމުގައި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުކުރުމުގެ ގޮތުން މޯލްޑިވްސް މާކެޓިން ޕީއާރު ކޯޕަރޭޝަން (އެމްއެމްޕީއާރުސީ)އިން އަންނަނީ ބައިނަލްއަޤްވާމީ މާކެޓްތަކަށް އަމާޒުކޮށްގެން ވެސް ކެމްޕެއިންތަކެއް ހިންގަމުންނެވެ. ސަރުކާރުގެ އަމާޒު ހިފާފައިވަނީ މިއަހަރު ނިމުމުގެ ކުރިން 2.3 މިލިޔަން ފަތުރުވެރިން ރާއްޖެ ގެނައުމަށްކަން ފާހަގަކޮށްލަން ޖެހެއެވެ.