ސިއްހީ ހިދުމަތްދޭ ތަންތަނާއި އާސަންދަ ގުޅުވާލަދޭ ވިނަވި ޕޯޓަލްގެ އިތުބާރާމެދު ކަންބޮޑުވުންތަކެއް

އާސަންދަ ސްކީމްގެ ދަށުން ޚިދުމަތްދޭ ސިއްހީ ހިދުމަތްދޭ ތަންތަނާއި އާސަންދަ ކުންފުންޏާ ގުޅުވާލަދިނުމަށް ބޭނުންކުރާ "ވިނަވި ޕޯޓަލް" އާމެދު ބޮޑެތި ކަންބޮޑުވުންތައް އެބަހުރިކަމަށް ދައުލަތުގެ އޮޑިޓަރ ޖެނެރަލްގެ އޮފީހުން ހާމަކޮށްފިއެވެ.

ވިނަވި ޕޯޓަލްގެ އިންފޮމޭޝަން ސިސްޓަމް އާ ގުޅޭގޮތުން އޮޑިޓް އޮފީހުން ނެރެފައިވާ އޮޑިޓް އޮފީހުގައި ވަނީ، ވިނަވި ޕޯޓަލްއާ ގުޅޭގޮތުން ހުރި ކަންބޮޑުވުންތައް ބަޔާންކޮށްފައެވެ. 'ވިނަވި ޕޯޓަލް' އަކީ އާސަންދަ ސްކީމްގެ ދަށުން ޚިދުމަތްދޭ ރާއްޖޭގެ ހުރިހާ ސިއްހީ މަރުކަޒުތަކަކާއި އާސަންދަ ކުންފުންޏާ ގުޅުވައިދިނުމަށް 2017 ވަނަ އަހަރު ގާއިމްކުރި ނިޒާމެކެވެ. މި ނިޒާމަކީ މެމޯ ހެއްދުމުން ފެށިގެން ފަރުވާ ނިމެންދެން ބަލިމީހާގެ މައުލޫމާތުތައް އެއްވެސް ދަތިކަމެއް ނެތި ބެލެހެއްޓުމުގެ މަގު ތަނަވަސްކޮށްދީފައިވާ ނިޒާމެކެވެ.

ވިނަވި ޕޯޓަލް އާ ގުޅޭގޮތުން އޮޑިޓަރ ޖެނެރަލް ނެރުއްވި ރިޕޯޓްގައި މައިގަނޑު ގޮތެއްގައި ބަލާލާފައިވަނީ އައި.ޓީ ޖެނެރަލް ކޮންޓްރޯލްތަކާއި، އާސަންދައިގެ "ވިނަވި" ޕޯޓަލްއާ ގުޅުންހުރި އެޕްލިކޭޝަން ކޮންޓްރޯލްތަކަށެވެ. އޮޑިޓްގައި ބުނެފައިވަނީ ވިނަވި ޕޯޓަލް ސިސްޓަމް ކޮންފިގަރޭޝަންގެ މައްސަލަތައް ހުރިކަން ފާހަގަކޮށްފައެވެ. އެއާއެކު ހުރި މައްސަލަތަކުގެ ސަބަބުން ކްލިނިކްތަކުންނާއި ބޭސްފިހާރަތަކުން ބޭސްސިޓީތަކަށް އާދަޔާހިލާފަށް ބޮޑެތި އަދަދުތަކަކުން ހަރަދުކޮށްފައިވާކަން ވަނީ ފާހަގަކޮށްފައެވެ.

ވިނަވި ޕޯޓަލްގައި ހުރި މައްސަލަތަކާއެކު ފާމަސީން ބޭސް ދޫކުރުމުގައި، ބޭހުގެ އަދަދު އަތުން ބަދަލުކުރެވޭ ގޮތަށް އޮތުމުން، ހަގީގީ އަދަދަށްވުރެ އިތުރަށް ބޭސް ދޫކުރިކަމަށް ދެއްކުމުގެ ފުރުސަތު އޮތްކަމަށް ރިޕޯޓްގައި ވަނީ ފާހަގަކޮށްފައެވެ. މީގެ އިތުރުން އަލަށް އުފަންވާކުދިން މަންމަގެ އުފަންދުވަހަށްވުރެ ކުރީގެ ތާރީހުތައް ޖެހޭގޮތަށް ފަހިވެފައި އޮތުމަކީ ޑޭޓާތަކުގެ އިތުބާރު ގެއްލޭކަމެއްކަމަށް ވަނީ ފާހަގަކޮށްފައެވެ.

އޮޑިޓް ރިޕޯޓްގައި ވަނީ ވިނަވި ޕޯޓަލްގެ އެޕްލިކޭޝަން ކޮންޓްރޯލްތައް މުރާޖައާކުރިއިރު، މުއާމަލާތްތަކުގެ ސައްހަކަމާއި، ޑޭޓާގެ ސައްހަކަން ގެއްލި، ނިޒާމު ނަހަމަ ގޮތުގައި ބޭނުންކުރުމުގެ ފުރުސަތު އޮތްކަމަށް ފާހަގަކޮށްފައެވެ.