ނަޝީދުއާއި ފައްޔާޒުއަށްވެސް ވާހަކަދައްކަން ފުރުސަތު ހޯދައިދޭން މަސައްކަތްކުރިން: ޣަފޫރު

‏ނިމިދިޔަ ލޯކަލްކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުން އިދިކޮޅު އެމްޑީޕީއަށް ލިބުނު ކާމިޔާބީ ފާހަގަކުރަން ރޭ ބޭއްވި ޖަލްސާގައި، ކުރީގެ ރައީސް އަދި އެމްޑީޕީގެ ކުރީގެ ރައީސް މުޙައްމަދު ނަޝީދުއާއި، އެޕާޓީގެ ކުރީގެ ޗެއާޕާސަން ފައްޔާޒު އިސްމާޢީލްއަށް ވާހަކަދައްކަވަން ފުރުސަތު ނުދެއްވި ކަމަށް ބުނެ ދެކެވޭ ވާހަކަތަކަށް ޕާޓީގެ ޗެއާޕާސަން އަބްދުލްޣަފޫރު މޫސާ (ގަޕޯ) ރައްދުދެއްވައިފިއެވެ.

ރޭ ބޭއްވި ޖަލްސާގައި ވާހަކަދެއްކެވުމުގެ ފުރުސަތު ފައްޔާޒަށާ ރައީސް ނަޝީދަށް ވެސް ދޭން ނިންމުމަށްފަހު، ފަހު ވަގުތު، އެ ދެބޭފުޅުންނަށްވެސް ފުރުސަތު ނުދޭން ގަޕޯ ނިންމެވި ކަމަށް ފައްޔާޒު ވަނީ ވިދާޅުވެފައެވެ. އަދި އާެނާއަށް ފުރުސަތު ނުދެއްވި ނަމަވެސް ނަޝީދަށް ފުރުސަތުދޭންޖެހޭނެ ކަމަށްވެސް ވިދާޅުވިއެވެ.

އެ ނިންމުމާ ގުޅިގެން އެމަނިކުފާނަށް ތާއީދުކުރާ ފަރާތްތަކުން ވަނީ ޖަލްސާގެ ތެރޭގައި އަޑުގަދަކޮށް އިހުތިޖާޖުކޮށްފައެވެ. މީގެ ސަބަބުން ޖަލްސާގެ ހަރަކާތްތައް ކުރިއަށް ނުގެންދެވި، ވަގުތުގެ ކުރިން ނިންމާލަން މަޖުބޫރުވިއެވެ.

އެކަމާގުޅިގެން ގަޕޯ ރޭ އެކްސްގައި ކުރެއްވި ޕޯސްޓެއްގައި ވިދާޅުވީ، ރޭގެ ޖަލްސާގެ އެޖެންޑާގައި ހަމަޖެހިފައި އޮތީ ޕާޓީގެ ރައީސް އާއި ޕާޓީގެ ޗެއަރޕާސަން އާއި ސިޓީތަކުގެ މޭޔަރުންނާއި ޑަބްލިއުޑީސީގެ ރައީސުންނާއި ކެމްޕެއިން ކޮމިޓީގެ މެނޭޖަރާއި ރިފަރަންޑަމް ކޮމިޓީގެ ޗެއަރ ވާހަކަ ދައްކާ ގޮތަށް ކަމަށެވެ.

‏އެފަދައިން ނިންމާފައި އޮއްވާ، އެ ޖަލްސާގައި ވާހަކަ ދައްކަވަން ކުރީގެ ޗެއަރ ފަޔާ އާއި ރައީސް ނަޝީދު އެދިވަޑައިގެންނެވިކަމަށް އޭނާ ވިދާޅުވިއެވެ.

އެބޭފުޅުންނަށް އެ ފުރުސަތު ހަމަޖެއްސުމަށް އަޅުގަނޑު މަސައްކަތް ކުރަމުންދަނިކޮށް، މަސްލަހަތު ގެއްލޭ ގޮތަށް ތި ފެތުރުއްވި ވާހަކަތަކާ ގުޅިގެން އަޅުގަނޑު ހިތާމަ ކުރަން.

އަބްދުލްޣަފޫރު

ގަޕޯވަނީ އެ އިންތިޚާބުތަކުގައި ލިބުނު ކާމިޔާބީއާ އެކު، އެ ޕާޓީ ބަދަހިކޮށް ބޭއްވުމަށް އެންމެހާ މެންބަރުން އެއްބާރުލުން ދޭނެކަމަށް އުއްމީދުކުރައްވާ ކަމަށް ވިދާޅުވެފައެވެ.

ގަޕޯ މިހެން ވިދާޅުވި ނަމަވެސް، އޭނާގެ އެ ޕޯސްޓަށް ރައްދު ދެއްވަމުން އާރުޑީސީގެ ކުރީގެ އެމްޑީ މޫސާ ޢަލީ މަނިކު (މޫކޭ) ވަނީ އެއީ ދޮގެއް ކަމަށް ވިދާޅުފައެވެ.