ރިޔާސީ ކޮމިޝަނުން އެދުމުން ވެސް ޔުމްނުގެ ބަޔާން ނަގަން އާއިލާއިން ފުރުސަތެއް ނުދިން

މިދިޔަ އޭޕްރީލް 18 ވަނަ ދުވަހު ހެންވޭރު ގެއަކުން ގުދަނެއްގެ ފުރާޅު މައްޗަށް ވެއްޓިފައި އޮއްވާ ފެނުނު ހައްވާ ޔުމްނު ރަޝީދު، ވެއްޓުނު މައްސަލަ ތަހުގީގު ކުރަން ރައީސް ޑރ. މުޙައްމަދު މުޢިއްޒު އުފެއްދެވި ރިޔާސީ ކޮމިޝަނަށްވެސް ޔުމްނުގެ ބަޔާން ދިނުމަށް އާއިލާއިން އިންކާރު ކުރިކަމަށް އެ ކޮމިޝަނުން ބުނެފިއެވެ.

މި މައްސަލައިގެ ތަހުގީގު ރިޕޯޓް ނިންމައި، އިންކުއަރީ ކޮމިޝަނުން މިއަދު ވަނީ ރައީސް މުޢިއްޒުއަށް އަރުއްވާފައެވެ. އަދި އެ ރިޕޯޓް އާއްމު ކުރުމަށް ރައީސް މުޢިއްޒު ވަނީ އަންގަވާފައެވެ.

މި ރިޕޯޓާއި ގުޅިގެން "އަދަދު“ ނޫހުން ކޮމިޝަންގެ ރައީސް ޑރ. މުޙައްމަދު މުނައްވަރު އާ ސުވާލު ކުރުމުން، ރިޕޯޓްގައި ޔުމްނުގެ ބަޔާން ނުހިމެނޭކަން ވަނީ ހާމަވެފައެވެ. އެގޮތުން، ޑރ. މުނައްވަރުވެސް ޔުމްނުގެ ބަޔާން ނެންގެވުމަށް އާއިލާއަށް ގުޅައިގެން މަސައްކަތް ކުރެއްވި ނަމަވެސް، އާއިލާއިން އެއްބާރުލުން ލިބިފައި ނުވާކަން މުނައްވަރު ފާހަގަކުރެއްވި ކަމަށް އެ ނޫހުގައި ބުނެފައިވެއެވެ.

އެހެންކަމުން ރިޕޯޓް އެކުލަވާލަން ޖެހުނީ އޭނާގެ ބަޔާން ނުހިމަނައިކަން މުނައްވަރު ވިދާޅުވި ކަމަށް ރިޕޯޓްކޮށްފައިވެއެވެ.

ޔުމްނު ވެއްޓުނު މައްސަލާގައި ފުލުހުންނަށްވެސް ޔުމްނުގެ އާއިލާގެ ފަރާތުން އެއްބާރުލުން ނުލިބޭ ކަމަށް އެ އިދާރާއިން މީގެ ކުރިން ވަނީ ބުނެފައެވެ. އެގޮތުން އޭނާގެ ބަޔާން ނަގަން ފުލުހުން މަސައްކަތްކޮށް އެކަން ކާމިޔާބު ނުވުމުން، މެލޭޝިޔާގެ ފުލުހުންނާއި ގުޅިގެން ބަޔާން ނަގަން މަސައްކަތް ކުރާ ކަމަށް ފުލުހުން ބުނެފައިވެއެވެ.

ޔުމްނު ވެއްޓުނު މައްސަލަ ބަލައި، އެ މައްސަލައާ ގުޅިގެން މިނިވަން، މުސްތަގިއްލު އަދި އިތުބާރު ހިފޭ ތަހުގީގެއްކުރުމަށް ކުރުމަށް ރައީސުލްޖުމްހޫރިއްޔާ މި ކޮމިޝަނު އެކުލަވާލާފައިވަނީ، އޭޕްރިލްމަހުގެ 27 ވަނަ ދުވަހުއެވެ.

އެ ކޮމިޝަނުންވަނީ މި މައްސަލާގައި ހިމެނޭ ރައުދު އަހުމަދު ޒިލާލް އާވެސް ވަނީ ސުވާލު ކޮށްފައެވެ. ރައުދު އަކީ ޔުމްނު ވެއްޓުމާ ޖެހެންދެން ފަހުވަގުތާ ހަމައަށް އޭނާއާއެކު އުޅުނު މީހާއެވެ.

މީގެ އިތުރުން، އެ ކޮމިޝަނުން ވަނީ މި މައްސަލައާއި ގުޅުން ހުރި ތަންތަނަށްވެސް ޒިޔާރަތް ކޮށްފައެވެ.

އަދި، އެ ކޮމިޝަނުން ވަނީ، ޔުމްނު ވެއްޓުނު ހާދިސާއާ ގުޅޭގޮތުން، މަޢުލޫމާތާއި، ފޮޓޯ/ވީޑިއޯ ނުވަތަ އެނޫންވެސް ލިޔުންތައް އެ ކޮމިޝަނާ ޙިއްސާކުރުމަށާ، އެ ކޮމިޝަނުގެ މަސައްކަތާ ގުޅޭގޮތުން ސުވާލު ކުރަން ޚާއްސަ ޕޯޓަލެއްވެސް ޤާއިމް ކޮށްގެން މައުލޫމާތު އެއްކޮށްފައެވެ.