އޭޝިއާގެ ޝޫޓިން މުބާރާތުން 4 ލޯ މެޑަލާއެކު ރާއްޖެ ޓީމުން ތާރީޚީ ކާމިޔާބީއެއް ހޯދައިފި

މިމަހުގެ 2 އިން 14 އަށް ކުރިއަށްދާ އޭޝިއަން ރައިފަލް އެންޑް ޕިސްޓަލް ޗެމްޕިއަންޝިޕުގައި ރާއްޖޭގެ ޖޫނިއާ ޝޫޓިން ޓީމުން ބޮޑު ކާމިޔާބީއެއް ހޯދައި، ރާއްޖޭގެ ކުޅިވަރުގެ ތާރީޚުން ޖާގަ ހޯދައިފިއެވެ.

މި މުބާރާތުގެ އެކި ކެޓަގަރީތަކުން، ރާއްޖެއިން ވަނީ ޖުމްލަ ހަތަރު ލޯ މެޑަލް ހާސިލުކޮށްފައެވެ.

މިއީ ރާއްޖޭގައި ޖޫނިއާ އުމުރުފުރާއަށް ހުޅުވާލައިގެން ޝޫޓިންގެ ހަރަކާތްތައް ފެށިފަހުން ބައިނަލްއަޤްވާމީ މައިދާނެއްގައި މިހާތަނަށް ހޯދި އެންމެ ބޮޑު ކާމިޔާބީއެވެ. ރާއްޖޭގައި އެކަށީގެންވާ ޝޫޓިން ރޭންޖެއް ފަދަ ވަސީލަތްތައް ނެތް ނަމަވެސް، ދިވެހި ޒުވާން އެތުލީޓުން ވަނީ ބޭރުގެ ބޮޑެތި ގައުމުތަކާ ވާދަކޮށް އާދަޔާޚިލާފު ހުނަރެއް ދައްކުވައިދީފައެވެ.

މި މުބާރާތުގެ 10 މީޓަރު އެއާ ރައިފަލް މެންސް ޔޫތު ޓީމު އިވެންޓުން ރާއްޖެއަށް ލޯ މެޑަލް ހޯދައިދިނީ ޖަމާލުއްދީން ސުކޫލުގެ މުޙައްމަދު ޝާއިލް ހަސަން އާއި، އަރަބިއްޔާ ސުކޫލުގެ އުމަރު މުޙައްމަދު ނަޝީދު އަދި ހިރިޔާ ސުކޫލުގެ ރަޔާން މުޙައްމަދު ރާމިޒް އެވެ. މީގެއިތުރުން 10 މީޓަރު އެއާ ރައިފަލް މިކްސް ޓީމް ޖޫނިއާ އިވެންޓުން ލޯ މެޑަލް ހާސިލުކުރީ އައިޝަތު އީޝާ ޝާހިދު އާއި އަޙްމަދު މާއިދު މުޙައްމަދު އެވެ.

މުބާރާތުގެ ކުރީކޮޅު ރާއްޖެއިން ވަނީ އިތުރު ދެ ލޯ މެޑަލްވެސް ހޯދާފައެވެ. އެއީ 10 މީޓަރު އެއަރ ޕިސްޓަލް ވިމެންސް ޔޫތު އިވެންޓުންނާއި ފިރިހެން ޖޫނިއާ ޓީމު އިވެންޓުންނެވެ. މި އަންހެން ޓީމުގައި ހިމެނެނީ ތާޖުއްދީން ސުކޫލުގެ މަރިޔަމް ޒޯހާ އަސްބާހް އާއި،ސީއެޗްއެސްސީގެ ފާތިމަތު ފައިހާ ފަޒީލް އަދި ޖަމާލުއްދީން ސުކޫލުގެ ފާތިމަތު ޝައިމާ މޫސާއެވެ.

ލޯ މެޑަލް ހޯދި ފިރިހެން ޓީމުގައި ހިމެނެނީ އަޙްމަދިއްޔާ އިންޓަނޭޝަނަލް ސުކޫލުގެ އަލީ ޒަކްނޫން އަޙްމަދާއި، ރެހެންދި ސުކުލުގެ މުޙައްމަދު އަޝްހަމް ބިން ޝާހިދު އަދި ސީއެޗްއެސްސީގެ ހާދު އަލީ ނަސީފްއެވެ.

މި ކާމިޔާބީއަކީ ރާއްޖޭގައި ޝޫޓިން ކުރިއެރުވުމަށް އެކަށީގެންވާ ފުރުސަތެއް ނެތް ހާލަތެއްގައި ވެސް ހޯދި ތާރީޚީ ނަތީޖާއެކެވެ. މިއީ ރާއްޖޭގައި މި ކުޅިވަރުގެ އުޖާލާ މުސްތަގްބަލެއް އޮތްކަން މުޅި ދުނިޔެއަށް ހާމަވެގެންދިޔަ މުހިންމު ކުރިއެރުމެކެވެ.