އިހްސާންއަށް ސީރިއަސް ތުހުމަތުތަކެއް ކުރެވޭއިރު ރުހުންދޭން އެމްޑީޕީ މެންބަރުން ވޯޓުދިނުން ދެކޮޅެއް ނުޖެހޭ: އީވާ

ހޯމް މިނިސްޓަރު ޢަލީ އިޙްސާނަށް ރުހުން ދިނުމަށް ރައްޔިތުންގެ މަޖިލީހުގެ އިދިކޮޅު އެމްޑީޕީގެ އިސް މެންބަރުންތަކެއް ވޯޓު ދެއްވުމާ ގުޅިގެން، މަޖިލީހުގެ ކުރީގެ ނާއިބު ރައީސް އީވާ ޢަބްދުالله ފާޑުވިދާޅުވެއްޖެއެވެ.

އީވާގެ އެކްސް ޕޯސްޓެއްގައި ވިދާޅުވެފައިވަނީ، ސަރުކާރުގެ ވަޒީރުންނަށް، ހާއްސަކޮށް "އަދަދު" ނޫހަށް ފިޔަވަޅު އެޅުމާއި ޑީއެންއާރުގެ ޑޭޓާބޭސް ބޭނުންކޮށްގެން މީހުންގެ ޕާޓީ ބަދަލުކުރުން ފަދަ ސީރިއަސް ތުހުމަތުތަކެއް ކުރެވޭ މިނިސްޓަރު އިހްސާނަށް ރުހުން ދިނުމަކީ ގަބޫލުކުރެވޭނެ ކަމެއް ނޫން ކަމަށެވެ.

އަދި އެމްޑީޕީގެ ލީޑަޝިޕްގެ މި ނިންމުމަކީ ސުވާލު އުފެދޭ ކަމެއްގެ ގޮތުގައި އޭނާ ސިފަކުރެއްވިއެވެ.

މިނިސްޓަރު އިޙްސާނަށް ރުހުން ދިނުމަށް ވޯޓު ދެއްވި އެމްޑީޕީގެ މެންބަރުންގެ ތެރޭގައި އެ ޕާޓީގެ ވަގުތީ ޗެއާޕާސަން އަދި ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާގެ އިތުރުން، މެންބަރު ޝަމްހީދު، މުޙައްމަދު އިބްރާހީމް (ކުޑޫ)، މައުރޫފް ޒާކިރު، ޙުސައިން ސަމީރު، މުޙައްމަދު ނިޢުޝާދު، އަޙްމަދު ޝާކިރު، އަދި އަޙްމަދު ދީދީ ހިމެނިވަޑައިގަންނަވައެވެ.

މިނިސްޓަރު އިޙްސާނަށް ކުރެވޭ ތުހުމަތުތަކުގެ ތެރޭގައި ޑީއެންއާރުގެ ޑޭޓާބޭސް ނަހަމަ ގޮތުގައި ބޭނުންކޮށްގެން ޕީއެންސީއަށް ވަގު ފޯމު ހެދި ކަމުގެ ތުހުމަތާއި، ފުލުހުންގެ ތަޙުޤީޤުތަކަށް ސިޔާސީ ނުފޫޒު ފޯރުވުމާއި، ސުލްޙަވެރި މުޒާހަރާތައް ރޫޅައިލުމުގެ ތުހުމަތު ހިމެނެއެވެ.

މީގެ އިތުރުން، ނޫސްވެރީންނާ ދެކޮޅަށް ތަޙުޤީޤު ހިންގުމާއި، ފުލުހުންގެ ބެލުމުގެ ދަށުގައި ތިބި މީހުން މަރުވުމުގެ މައްސަލަތަކާއި، ކުށުގެ ޝިކާރައަކަށްވީ ފަރާތްތަކުގެ ޒާތީ މަޢުލޫމާތު ލީކުކުރުން ފަދަ ސީރިއަސް މައްސަލަތައްވެސް ވަނީ ފާހަގަކުރެވިފައެވެ. ޚާއްޞަކޮށް "އަދަދު" ނޫސް ރެއިޑްކުރުމާ ގުޅިގެން މިނިސްޓަރު އިޙްސާނަށް އޮތް ފާޑުކިޔުން ވަނީ އިތުރަށް ބޮޑުވެފައެވެ.

އެތަނުން ބައެއް މައްސަލަތަކާ ގުޅިގެން މީގެ ކުރިން އެމްޑީޕީން ވަނީ އިހްސާންގެ އިތުބާރު ނެތް ކަމުގެ މައްސަލައެއްވެސް މަޖިލީހަށް ހުށަހަޅާފައެވެ.

މި މައްސަލައިގައި އެމްޑީޕީގެ އާންމު މެންބަރުންނާއި ސިޔާސީ އެކްޓިވިސްޓުން ދަނީ އެ ޕާޓީގެ މެންބަރުންގެ މި އަމަލަކީ ޕާޓީގެ އުސޫލުތަކާ ޚިލާފު ކަމެއްގެ ގޮތުގައި ސިފަކުރަމުންނެވެ.