ބޭރަށް ދިޔުމަށް ޑޮކްޓަރުގެ ރިފަރަލްއާއެކު އެހީއަށް އެދިއްޖެނަމަ، އުސޫލުގެ ދަށުން އެހީދެވޭނެ: އާސަންދަ

އާސަންދަ ސްކީމްގެ ދަށުން ރާއްޖެއިން ބޭރަށް ފަރުވާ ހޯދުމަށް ޑޮކްޓަރ ރެފަރެލްއާއި ހުށައަޅައިފިނަމަ އޮންނަ އުސޫލުގެ ތެރެއިން އާސަންދައިގެ ދަށުން އެހީތެރިކަން ލިބޭނެ ކަމަށް އެ ކުންފުނިން ބުނެފިއެވެ.

އާސަންދައިން މިފަދައިން ބުނެފައިވަނީ މިދިޔަ ނޮވެންބަރުމަހު 11 ގައި ހިނގި އެކްސިޑެންޓެއްގައި އަނިޔާވި ޒުވާނެއްގެ އޮޕަރޭޝަނަށް ރާއްޖެއިން ބޭރަށް ދިޔުމަށް އާސަންދަ ނުލިބުނު ކަމަށް ބުނެ އާއިލާގެ ފަރާތުން އެހީއަށް އެދި ކޮށްފައިވާ ޕޯސްޓާ ގުޅިގެންނެވެ.

މި އެކްސިޑެންޓެއްގައި މީހަކު މަރުވެ ދެމީހަކި ޒަޚަމްވެފައިވާއިރު، އެތަނުން އެކަކު ކަމުގައިވާ މޫސާ މުޒްދާން ޝަރީފްގެ އާއިލާގެ ފަރާތުން ވަނީ މުޒްދާންގެ ލޮލުގެ އޮޕަރޭޝަނެއް ކުރުމަށް ބޭނުންވާ ފައިސާ ހޯދަން އާއްމުންގެ އެހީއަށް އެދިފައެވެ.

އެގޮތުން އާއިލާއިން ބުނެފައިވަނީ، ދެން ކުރާ އޮޕަރޭޝަނަކުން ފެނުން އިއާދަވާނެ ކަމަށް ޑޮކްޓަރުން ކުޑަކުޑަ އުއްމީދެއް އޮތް ކަމަށާ، އަދި އެއީ ރާއްޖޭން ކުރެވޭނެ އޮޕަރޭޝަނެއް ކަމަށް ވުމުން ބޭރަށްދާން އާސަންދަ ނުލިބުނު ކަމަށެވެ.

މިކަމާ ގުޅިގެން އާސަންދައިން ބުނީ، އާސަންދަ ސްކީމްގެ ދަށުން ރާއްޖެއިން ބޭރަށް ފަރުވާ ހޯދުމަށް ޑޮކްޓަރ ރެފަރެލްއާއި ފުރިހަމަ ލިޔުންތަކާއެކު ހުށައަޅައިފިނަމަ ކަނޑައެޅިފައިވާ އުސޫލުގެ ތެރެއިން ފަރުވާއަށް ރާއްޖެއިން ބޭރަށް ދިއުމަށް އާސަންދައިގެ ދަށުން އެހީތެރިކަން ލިބޭނެ ކަމަށެވެ.

އާސަންދައިގެ އުސޫލުތައް އޮންނަ ގޮތުން، ރާއްޖެއިން ކުރެވޭ އޮޕަރޭޝަންތައް ރާއްޖެއިން ބޭރުގައި ކުރުމަށް އާސަންދަ އެހީއެއް ނުލިބެއެވެ.