މަސްވެރިންނަށް އައިސް ލިބުމުގެ ދަތިކަން ޙައްލުކުރުމަށް 15 ރަށެއްގައި އައިސްޕްލާންޓް ޤާއިމްކުރަނީ

ފަސް ރަށެއްގައި އައިސްޕްލާންޓް ޤާއިމްކޮށް އޮޕަރޭޝަނަށް ގެނެސްފައިވާ ކަމަށާއި އިތުރު 15 ރަށެއްގައި އައިސްޕްލާންޓުގެ ޚިދުމަތް ޤާއިމްކުރުމަށް ހަމަޖެހިފައިވާ ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް މިއަދު ވިދާޅުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ މަސް ޕްރޮސެސްކުރުމާއި މަހުގެ ސްޓޯރޭޖު މަދުވުމަކީ މި ސަރުކާރު ވެރިކަމާ ޙަވާލުވީއިރު މަސްވެރިންނަށް ކުރިމަތިވެފައި ހުރި ގޮންޖެހުންތައް ކަމަށެވެ. އެ ގޮންޖެހުންތައް ޙައްލުކުރުމަށް ސަރުކާރުން މަސައްކަތްތަކެއް ކޮށްފައިވާ ކަމަށް ވިދާޅުވިއެވެ.

އެގޮތުން ގއ. ދެއްވަދޫގައި 25 ޓަނުގެ އައިސްޕްލާންޓެއް ޤާއިމްކޮށްފައިވާއިރު ށ. ފުނަދޫ ދ. މީދޫ ދ. ބަނޑިދޫ އަދި ގއ. ގެމަނަފުށީގައި 30 ޓަނުގެ އައިސްޕްލާންޓް ވަނީ ޤާއިމްކޮށްފައެވެ. މީގެ އިތުރުން މި އަހަރު ނިމުމުގެ ކުރިން މ. ވޭވަށުގައި 60 ޓަނު އަދި ލ. މާބައިދޫގައި 25 ޓަނުގެ ކޯލްޑް ސްޓޯރޭޖު ޚިދުމަތް ދޭން ފަށާނެ ކަމަށް ވަޒީރު ވިދާޅުވިއެވެ.

ކޮންޓްރެކްޓަރ ފައިނޭންސް އުސޫލުން ޤާއިމްކުރާ 15 އައިސްޕްލާންޓުގެ މަސައްކަތް މިހާރު އޮތީ ބަޔަކާ ޙަވާލުކުރުމުގެ މަރުޙަލާގައެވެ. އެގޮތުން ބ. ކުޑަރިކިލުގައި 5 ޓަނު ލ. ހިތަދޫއާއި ލ. މާވަށުގައި 10 ޓަނު ގއ. ނިލަންދޫ ށ. ކޮމަންޑޫ ގއ. ވިލިގިލި ގއ. ދާންދޫ މ. މުލައް ދ. ހުޅުދެލި ހދ. ކުޅުދުއްފުށި ކ. ގާފަރު ހއ. ދިއްދޫ އއ. ރަސްދޫ އަދި ގދ. ރަތަފަންދޫގައި 30 ޓަނުގެ އައިސްޕްލާންޓް ޤާއިމްކުރުމަށް ހަމަޖެހިފައިވާއިރު ޅ. ނައިފަރުގައި 40 ޓަނުގެ އައިސްޕްލާންޓެއް ޤާއިމްކުރުމަށް ވަނީ ނިންމައިފައެވެ.

"އިތުރު 15 ރަށުގެ އައިސްޕްލާންޓުގެ ޚިދުމަތް ޤާއިމްކުރުމަށް ވަނީ ހަމަޖެހިފައި. އެކި ސައިޒުގެ އައިސްޕްލާންޓް ޤާއިމްކުރަނީ ރައީސް ވެވައިޑައިގެންފައިވާ ވައުދުތަކާއި ކޮމިއުނިޓީތަކުގެ އެދުމާއި އެއްގޮތަށް." ވަޒީރު ވިދާޅުވިއެވެ.

މީގެ އިތުރުން ފެލިވަރުގައި ހުރި 50 ޓަނުގެ ކޯލްޑް ސްޓޯރޭޖު ކެޕޭސިޓީ 100 ޓަނަށް އިތުރުކުރުމުގެ މަސައްކަތް ކުރިއަށްދާ ކަމަށް ވަޒީރު ފާހަގަކުރެއްވިއެވެ. އަދި ގދ. ފިޔޯރީގައި ޤާއިމްކުރާ 100 ޓަނުގެ ކޯލްޑް ސްޓޯރޭޖު ފެސިލިޓީއަށް ބޭނުންވާ ބިން ހިއްކުމުގެ މަސައްކަތް މިހާރު ކުރިއަށްދާ ކަމަށާއި ފ. ނިލަންދޫގައި ޤާއިމްކުރާ މަސް ފެކްޓްރީގެ 50 ޓަނުގެ ކޯލްޑް ސްޓޯރޭޖާއި ބަނދަރުގެ މަސައްކަތްވެސް ކުރިއަށްދާ ކަމަށް ވަޒީރު ވިދާޅުވިއެވެ.

ހަމައެއާ އެކު 100 ޓަނުގެ މަސް ޕްރޮސެސްކުރެވޭ ފެސިލިޓީއެއް ހުޅުމާލޭގައި ޤާއިމްކުރުމަށް ނިންމައި އެ މަޝްރޫޢުގައި އަންނަ ހަފުތާގައި ސޮއިކުރައްވާނެ ކަމަށްވެސް ވަޒީރު ވިދާޅުވިއެވެ.