މަގޫދޫ އެއަރޕޯޓުގެ އިމާރާތެއްގައި ރޯކޮށްލަން ބަޔަކު މަސައްކަތްކޮށްފި
ފ. މަގޫދޫގައި ތަރައްޤީކުރަމުން އަންނަ އެއަރޕޯޓަށް ބަޔަކު ބޮޑެތި ގެއްލުންތަކެއް ދީފި އެވެ.
މަގޫދޫ ކައުންސިލްގެ ނައިބު ރައީސް އަބްދުލްހަމީދު މޫސާ، "ވޮއިސް އެމްވީ" އަށް މައުލޫމާތު ދެއްވަމުން ވިދާޅުވި ގޮތުގައި ރޭގެ ވަގުތެއްގައި ބަޔަކު ވަނީ އެ އެއަރޕޯޓްގެ ފަޔާ ސްޓޭޝަން އިމާރާތަށް ބޮޑެތި ގެއްލުންތަކެއް ދީފަ އެވެ. އެ ގޮތުން އެ އިމާރާތުގެ ކުޑަ ދޮރުތަކުގެ ބިއްލޫރިގަނޑުތައް ތަޅާލާފައިވާ ކަމަށާއި، އަދި ސީލިންގ ވެސް ފަޅާލާފައިވާ ކަމަށް އަބްދުލްހަމީދު މޫސާ ވިދާޅުވި އެވެ.
މަގޫދޫ އެއަރޕޯޓަށް ގެއްލުން ދީފައިވަނީ އަދި ކޮންބައެއްކަން ހޯދިފައިނުވާ ކަމަށާއި އެއަރޕޯޓަށް ގެއްލުން ދިން ކަމަށް ޝައްކުވާ ބަޔަކު މިވަގުތު ނެތް ކަމަށް އަބްދުލްހަމީދު މޫސާ ވިދާޅުވި އެވެ. އެއަރޕޯޓުގެ މަސައްކަތްކުރާ ސަރަހައްދުގައި އެމްޓީސީސީގެ ދެ މުވައްޒަފަކު ފިޔަވައި އިތުރުބަޔަކު ނޫޅޭ ކަމަށާއި އެހެންކަމުން އެތަނުގެ ސެކިއުރިޓީ ބަލަހައްޓަން ވަކި ހާއްސަ ބަޔަކު ނުތިބޭ ކަމަށް ވެސް އޭނާ ވިދާޅުވި އެވެ.
މިކަމާ ގުޅޭގޮތުން ފުލުހުން ބުނެފައިވަނީ ފ.މަގޫދޫގައި ތަރައްގީ ކުރަމުންދާ އެއަރޕޯޓްގައި އިމާރާތް ކޮށްފައިވާ އެއަރޕޯޓް ފަޔަރ އިމާރާތުގެ ވަށައިގެންވާ ބިއްލޫރިތައް އިއްޔެގެ ވަގުތެއްގައި ތަޅާލި މައްސަލަ މިއަދު ހެނދުނު ފުލުހުންނަށް ރިޕޯޓްކޮށްފައިވާކަމަށެވެ. މި މައްސަލަ ފުލުހުންނަށް ހުށަހަޅާފައިވަނީ އެމްޓީސީ މަގޫދޫ ސައިޓުގެ ފަރާތުންނެވެ. މިހާތަނަށް ބެލި ބެލުމުން، އިމާރާތުގެ ބިއްލަޫރިތަށް ތަޅާލުމާއި އަލިފާން ރޯކޮށްލުމަށް މަސައްކަތް ކޮށްފައިވާކަމަށް ފާހަގަކުރެވިފައިވާކަމަށް ފުލުހުންބުންޏެވެ. އަދި މި މައްސަލަ ފުލުހުން ތަހުގީގުކުރަމުންދާކަމަށްވެސް އެ މުއައްސަސާއިން ވަނީ ބުނެފައެވެ.
މަގޫދޫ އެއަރޕޯޓްގެ އަމަލީ މަސައްކަތް ފަށާފައިވަނީ 2023 ވަނަ އަހަރުގެ މާރިޗު މަހުގެ 2 ވަނަ ދުވަހު އެވެ. މި މަޝްރޫއު އަކީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އާއި ހަވާލުކޮށްގެން ކުރިއަށް ގެންދާ މަޝްރޫއު އެކެވެ. މި މަޝްރޫއަށް 450 މިލިޔަން ރުފިޔާ ހަރަދުވާނެ ކަމަށް އެކުންފުނިން މީގެ ކުރިން ވަނީ ބުނެފަ އެވެ.
މަގޫދޫ އެއާޕޯޓުގެ މަސައްކަތް މިވަގުތު މަޑުޖެހިފައި އޮތް ނަމަވެސް އެއާޕޯޓުގެ އަމަލީ މަސައްކަތް އެއްކޮށް ނިންމުމަށްފަހު ހުޅުވާނެ ކަމަށް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބް މިދިޔަ މެއި މަހު ވަނީ ވިދާޅުވެފަ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
