ރާއްޖެ ބަނގުރޫޓުވާނޭކަމަށް ދެކޭދެކުން މިއަދު ބަދަލުވެއްޖެ: ޒަމީރު

ދިވެހިރާއްޖެ ބަނގުރޫޓްވެދާނޭކަމަށް ދެކޭދެކުން މިއަދު ބަދަލުވެފައިވާކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.

ސަރުކާރުގެ މަޝްރޫޢުތައް އަމިއްލަ ފަރާތްތަކާ ހަވާލުކުރުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަމުން މާލީ ވަޒީރު، މޫސާ ޒަމީރު ވިދާޅުވީ މި ސަރުކާރު ވެރިކަމާ ހަވާލުވިއިރު ރާއްޖޭގެ އިގްތިސާދީ ހާލަތު އޮފީ ނާޒުކު ފައްތަރެއްގައިކަމަށެވެ. އެގޮތުން ޤައުމު ބަނގުރޫޓް ވެދާނޭކަމަށް ބެލެވުނުނަމަވެސް މިހާރު ރާއްޖެއަކީ ބަނގުރޫޓްވުމުގެ ތުންފަތްމަތީ އޮތްގައުމެއްކަމަށް ބޭރުގެ ފަރާތްތަކުން ނުދެކޭކަމަށް ވަޒީރު ފާހަގަކުރެއްވިއެވެ.

އެގޮތުން ރާއްޖޭގެ މާލީ ހާލަތު ރަނގަޅުކުރުމަށް ސަރުކާރުން އެޅި ފިޔަވަޅުތަކާއެކު ބައިނަލްއަޤްވާމީ ފަރާތްތަކުގެ އިތުބާރު މިހިނދަށް ލިބިފައި އޮތުމަކީ ސަރުކާރަށް ލިބިފައިވާ ވަރަށްބޮޑު ހިތްހަމަ ޖެހުމެއްކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ އެކުވެރި ޤައުމުތަކުގެ ކިބައިން ދަރަނި ދެއްކުމުގެ ލުއިތައް ރާއްޖެއަށް މިހާރު ލިބިފައިވާއިރު، އެޤައުމުތަކުން މިހާރު ރާއްޖެއާމެދު ދެކެނީ އިތުބާރު އޮތް ޤައުމެއްގެ ގޮތުގައިކަން ވަޒީރު ފާަހގަކުރެއްވިއެވެ. ވަޒީރު ވިދާޅުވީ ރާއްޖެ މިހާރު އޮތީ ދަރަނި އަދާކުރެވޭ ހާލަތުގައި ކަމަށާއި، އެކަމަށް ބޭނުންވާ ފަންޑުވެސް އެބައޮތްކަމަށެވެ.

ދަރަނި ދައްކާ ފަންޑުގައި ސަތޭކަ މިލިއަން ޑޮލަރަށް ވުރެ ގިނަ ނަގުދު ފައިސާ މި ވަގުތު އެބަ ހުރި. މި ހިނގާ އަހަރުގެ ދައުލަތުގެ އާމްދަނީއަށް ބަލާއިރު ޖީޑީޕީގެ ނިސްބަތުން ދައުލަތުގެ އާމްދަނީ ބައްތިރީސް ޕަސެންޓަށް އުފުލިގެންދާނެ

މާލީ ވަޒީރު މޫސާ ޒަމީރު ވިދާޅުވިއެވެ

ވަޒީރު ވިދާޅުވީ މި ސަރުކާރުން މަޝްރޫޢުތައް ހަވާލުކުރަނީ އެކަން ކުރެވޭނެ ގާބިލުކަން ހުންނަ ކުންފުނިތަކާ ކަމަށާއި، މި މަޝްރޫޢުތަކުގެ ތެރެއިން ސަރުކާރުން 4 އަމާޒެއް ހާސިލްކުރަން ބޭނުންވާަކަމަށެވެ. އޭގެ ތެރޭގައި ކުންފުނިތަކަށް ފައިސާ ދިނުމުގައި ހަރުދަނާ ނިޒާމެއް އެކުލަވާލެވިފައި އޮތުމާއި، މެއިންޓަނަންސްްގެ ޒިންމާތައް ޔަގީންކުރުމާއި، މަޝްރޫޢުތައް ހިންގުން ވަޒަން ކުރުމުގެ އިތުރުން ޕްރައިވެޓް ސެކްޓަރ ތެރެއިން ދިވެހިންގެ ފުދުންތެރިކަން އިތުރުވެގެންދޭތޯ ބެލުމަކީވެސް އަމާޒެއްކަމަށެވެ.

މި ރަސްމިއްޔާތުގައި ފައިނޭންސް މިނިސްޓަރު މޫސާ ޒަމީރުވެސް ވަނީ މަޝްރޫޢުތައް ހިންގާ ކުންފުނިތަކަށް ސަރުކާރުން ދޭންޖެހޭ ފައިސާ ގަވާއިދުން ދޭނޭކަމުގެ ޔަގީންކަން ދެއްވާފައެވެ.

ސަރުކާރުން މިއަދު ވަނީ ގެދޮރުވެރިކަމާއި ތައުލީމީ ދާއިރާގެ އިތުރުްނ ސިއްހީ ދާއިރާއިން ގިނަ އަދަދެއްގެ މަޝްރޫޢުތައް އަމިއްލަ ފަރާތްތަކާ ހަވާލުކޮށްފައެވެ.