ރާވާލާނަން، ރާވާލާނަން؛ 2028 އަށް އެމްޑީޕީ ރާވާލަން ނުކުމެ މިހުރީ: މީކާއީލް

ޗެއާޕާސަން ކަމަށް ވާދަކުރައްވަން ނުކުމެ ހުންނެވީ 2028 ވަނަ އަހަރަށް އެމްޑީޕީ ރާވާލައްވަން ކަމަށް އެ މަގާމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެެވެ.

ރޭ އޮތް ”އިތުބާރު“ ކެމްޕެއިން ޖަލްސާގައި މީކާޢީލް ވިދާޅުވީ، އޭނާ އެމްޑީޕީގެ ޗެއާޕާސަން ކަމުގެ މަގާމަށް ނުކުމެ ހުންނެވީ، ”އެމްޑީޕީގެ ޗެއާޕާސަންކަން“ ކުރައްވަން ކަމަށެވެ.

އަޅުގަނޑު ނުކުމެ މިހުރީކީއެއް، އެމްޑީޕީގެ ޗެއާޕާސަން ކަމުގެ އިންތިޚާބަކީ އަޅުގަނޑު ބޭނުންވާ އިތުރު އެހެން މަގާމެއް ހޯދަން އޮތް މަރުހަލާއެއްގެ ގޮތުގައި މި އިންތިޚާބެއް ދެކިގެނެއްނޫން. އަޅުގަނޑެއް ނުދެކެން މި އިންތިޚާބަކީ ހަމައެކަނި މަގާމެއް ހޯދަން އޮތް އިންތިޚާބަކަށް. އަދި އަޅުގަނޑު އިންތިޚާބު ކާމިޔާބު ކުރަން ބޭނުމީ 16 އަހަރު ވަންދެން އަޅުގަނޑު އެބަޔަކާ އެކު އުޅުނު އާއްމު މެމްބަރުންގެ ވޯޓަކުން. އަޅުގަނޑު ގައުމީ މަޖިލީހުގެ ވޯޓަކުން އައްޔަން ކުރާ ވަގުތީ ޗެއާޕާސަން ކަމެއް ބޭނުމެއް ނޫން.

މީކާއީލް

މީކާއިލް އިތުރަށް ވިދާޅުވީ، ޕާޓީ ތެރެއިން މަޝްވަރާކޮށްގެން ކަންކަން ހައްލު ކުރެވެން އޮއްވައި، އިންތިޚާބާ ގުޅޭ ކަންކަމާއިގެން ކޯޓަށްދާ މީހެއް ކަމުގައި އޭނާ ނުވާނެ ކަމަށެވެ.

އަދި އޭނާ  އެ އިންތިޚާބު ކާމިޔާބު ކުރައްވާނީ އެމްޑީޕީގެ އާއްމު މެންބަރުންގެ ވޯޓާއެކު “ބޮޑުކޮށް، ބޮޑުކޮށް“ ކަމަށްވެސް ވިދާޅުވިއެވެ.

މީކާއިލް އިތުރަށް ވިދާޅުވީ، އޭނާ ޗެއާޕާސަން ކަމަށް ވަޑައިގަންނަވަން ބޭނުންވަނީ ތެދުހައްދަވަން ކަމަށާ، ދެރަވެ، ނާކާމިޔާބުވާ ކޮންމެ ފަހަރަކު އާއްމު މެންބަރުންގެ ޖަޒުބާތާއި ކުޅެ ދޮގުހަދާ މީހެއް ކަމުގައި އޭނާ ނުވާނެ ކަމަށެެވެ.

އަޅުގަނޑެއް ނުވާނަން، އެއްދުވަހު އެމްޑީޕީގެ 39000 މެންބަރުން ކަނޑާލީ ފައްޔާޒު އޭ ބުނުމަށްފަހު އަނެއް ދުވަހު ފައްޔާޒު އިސްމާޢީލް ވެރިކަމަށް ގެންނަން ބުނާނެ މީހަކަށް.

މީކާއީލް

މީކާޢީލް އިތުރަށް ވިދާޅުވީ، އެމްޑީޕީ ”ރޫޅާލުމަށް ފަހު ރޭވި އިރު ބައެއް ލީކުތައް“ ހުރި ކަމަށާ އޭނާ ނުކުންނަވައި ހުންނެވީ އެ ލީކުތައް ނައްތާލައްވަން ކަމަށެވެ.

”އަޅުގަނޑު މި އިންތިޚާބަށް ނުކުމެ މި ހުންނެވީ މި ޕާޓީ ރާވާލަދޭން. ރާވާލާނަން. ރާވާލާނަން. ބޮޑުކޮށް ބޮޑުކޮށް ރާވާލާނަން. 2028 އަށް މި ޕާޓީ ރާވާލަދޭނަން.“ މީކާއީލް ވިދާޅުވިއެވެ.