ހޮރްމޯޒް ކަނޑުއަޮޅި ބަންދުކުރަން ޓްރަމްޕް އަމުރުކޮށްފި

ޕާކިސްތާނުގައި އެމެރިކާ އާއި އީރާނާ ދެމެދު ކުރިއަށްދިޔަ ސުލްޙައިގެ ވާހަކަތައް އެއްބަސްވުމަކާ ނުލައި ނިމުމާ ގުޅިގެން، ހޮރްމުޒް ކަނޑުއޮޅި "ވަގުތުން" ބަންދުކުރުމަށް އެމެރިކާގެ ރައީސް ޑޮނަލްޑް ޓްރަމްޕް އެމެރިކާގެ ކަނޑުގެ ސިފައިންނަށް އަމުރުކޮށްފިއެވެ.

މި ނިންމުން ޓްރަމްޕް އިޢުލާނު ކުރީ ސޯޝަލް މީޑިއާ މެދުވެރިކޮށް ކުރި ޕޯސްޓެއްގައެވެ.

މި ޕޯސްޓްގައި ޓްރަމްޕް ވަނީ އީރާނުން "ބްލެކްމެއިލް" ކުރަމުންދާ ކަމަށް ތުހުމަތުކޮށް، ހޮރްމުޒް ކަނޑުއޮޅިން ދަތުރުކުރުމަށް އީރާނަށް ފައިސާ ދައްކާ ހުރިހާ ބައިނަލްއަޤްވާމީ އުޅަނދުތަކެއް ހިފަހައްޓާނެ ކަމުގެ އިންޒާރު ދީފައެވެ.

އަދި އީރާނުން ކަނޑުއޮޅީގައި އަތުރާފައިވާ ކަމަށް ބުނާ މައިންތައް ނައްތާލުމުގެ މަސައްކަތްވެސް އެމެރިކާ ސިފައިން ފަށާނެ ކަމަށް ބުންޏެވެ. ސުލްޙައިގެ ވާހަކަތަކާ ގުޅޭގޮތުން ޓްރަމްޕް ބުނީ، ގިނަ ކަންތައްތަކަކަށް އެއްބަސްވުމަކަށް އާދެވުނު ނަމަވެސް، އެންމެ މުހިންމު ނިއުކްލިއަރ މައްސަލާގައި އެއްބަސްވުމަކަށް ނާދެވުނު ކަމަށެވެ.

ފެބްރުއަރީ 28 ގައި އެމެރިކާ އާއި އިސްރާއީލުން އީރާނާ ދެކޮޅަށް ހަނގުރާމަ ފެށި ފަހުން، ދުނިޔޭގެ ހަކަތައިގެ ބާޒާރަށް މުހިންމު މި ކަނޑުއޮޅީގެ ކޮންޓްރޯލް އޮތީ އީރާނުގެ އަތްދަށުގައެވެ.

މިކަމާ ގުޅިގެން އީރާނުގެ ރިވޮލިއުޝަނަރީ ގާޑްސް އިން ބުނެފައިވަނީ، ވަކި ޤަވާޢިދުތަކަކާ އެއްގޮތަށް މަދަނީ އުޅަނދުތަކަށް ދަތުރުކުރެވޭނެ ކަމަށާއި، ނަމަވެސް ހަނގުރާމަވެރި އުޅަނދުތައް ކައިރިވެއްޖެނަމަ ހަރުކަށި ފިޔަވަޅު އަޅާނެ ކަމަށެވެ. މި ހަމަނުޖެހުންތަކުގެ ސަބަބުން ދުނިޔޭގެ ތެލާއި ގޭހުގެ ވިޔަފާރީގެ ފަސްބައިކުޅަ އެއްބައި ހުއްޓުމަކަށް އައިސް، ދުނިޔޭގެ އިޤްތިޞާދަށް ބޮޑެތި ލޮޅުންތަކެއް ވަނީ އަރާފައެވެ.

މި ނިންމުމާ ގުޅިގެން މެދުއިރުމަތީގެ ޤައުމުތަކުންނާއި، ޚާއްޞަކޮށް އޮމާނުން ވަނީ ކަންބޮޑުވުން ފާޅުކޮށް، ސުލްޙައިގެ ވާހަކަތައް ކުރިއަށް ގެންދިއުމަށް ގޮވާލާފައެވެ. އެމެރިކާގެ ޑިމޮކްރެޓިކް ޕާޓީގެ މެންބަރުންވެސް ވަނީ ޓްރަމްޕްގެ މި ނިންމުމަށް ފާޑުކިޔާފައެވެ.

އީރާނުން ވަނީ އެމެރިކާގެ އެއްވެސް އަސްކަރީ އުޅަނދަކުން ކަނޑުއޮޅިއަށް ވަންނަން އުޅެފިނަމަ ވަރުގަދަ ރައްދު ހަމަލާއެއް ދޭނެ ކަމުގެ އިންޒާރު ދީފައެވެ.