މަޖިލިސް އިންތިހާބުގެ ވާދަވެރިކަން ބޮޑު ވެއްޖެ

އަންނަ އަހަރު ބޭއްވުމަށް ހަމަ ޖެހިފައިވާ ރައްޔިތުންގެ މަޖިލީހުގެ އިންތިހާބުގެ ވާދަވެރިކަން ބޮޑުވެއްޖެއެވެ.

މަޖިލިސް އިންތިހާބަށް ހަތަރު މަހަށް ވެފައިވާއިރު މިހާރު ދަނީ ގިނަ ފަރާތްތަކަކުން މަޖިލިސް އިންތިހާބުގައި ވާދަކުރައްވާނެކަން އިއުލާން ކުރައްވަމުންނެވެ. އެގޮތުން ރައީސް ނަޝީދުގެ ލޯޔަރުންގެ ޓީމުގެ ގިނަ އަދަދެއްގެ ލޯޔަރުންނާއި، މީޑިއާތަކާއި، އެހެނިހެން ދާއިރާތަކުން ފާހަގަކޮށްެލެވޭ ބޭފުޅުން މިހާރު ވަނީ ކުރިމަތިލުމުގެ ޝައުގު ފާޅުކުރައްވާފައެވެ.

ބައެއް ޕާޓީތަކުން ވަނީ އެތެރޭގެ ޕްރައިމެރީ ބާއްވާ ވަރަށް އެކި ދާއިރާތަކަށް ކެނޑިޑޭޓުން ކުރިމަތިލައްވާފައެެވެ. އެގޮތުން މިހާރު މެންބަރު ކަމުގައި ތިއްބެވި ބޭފުޅުންނާއި ވާދަކުރުމަށް އެދާއިރާތަކަށް ނިސްބަތް ވެވަޑައިގަންނަވާ އައު މޫނު ތައް ދަނީ އެބޭފުޅުންނާއި ވާދަކުރުމަށް ތައްޔާރު ވަމުންނެވެ.

ރާއްޖޭގައި އަށް މަލްޓި ޕާޓީ ޑިމޮކްރަސީ ތައާރަފްވިފަހުން މިހާތަނަށް ވަނީ ތިން މަޖިލިސް އިންތިހާބު ބޭއްވިފައެވެ. ދާއިރާތަކަށް މިހާތަނަށް ޕާޓީތަކުން ޓިކެޓް ދެމުން އަންނަނީ އޭރުވެސް ޓިކެޓް ދެމުން އައި ފަރާތްތަކަށް ކަން ފާހަގަކޮށްލަން ޖެހެއެވެ.

ޕާޓީ ލައިންގައި ވާދަކުރައްވައި ބަލި ވި ކަމުގައި ވިއަސް ވިދި ވިދިގެން ޕާޓީ ޓިކެޓްގައި ވާދަކުރައްވާ ކެނޑިޑޭޓުން މަދު ނޫންކަން ފާހަގަކޮށްލަން ޖެހެއެވެ.

އެއާއި ހިލާފަށް މިފަހަރު މިހާތަނަށް ދާއިރާތަކަށް ކުރިމަތިލެއްވި ފަރާތްތަކަށް ބަލާއިރު ދުވަސްވީ މޫނު ތަކާ ވާދަކުރުމަށް އައު ސިޔާސީ ޖީލެއް މިވަނީ ނިކުމެފައެވެ. މިއީ ރާއްޖޭގެ ސިޔާސީ ދާއިރާއަށް ވެސް ތަފާތު ގެނުވާނެކަމަށް ވުމަކީ ވަރަށް އެކަށީގެންވާކެމެކެވެ.

އަދި އެކި ދާއިރާތަކަށް ނިސްބަތް ވެވަޑައިގަންނަވާ އިލްމީ ގޮތުން ޤާބިލް އަދި ތަޖުރިބާގެ ގޮތުން ވެސް ކުރިއަރާފައިވާ ފަރާތްތަކެއް މިވަނީ މިފަހަރު އިންތިހާބުގައި ވާދަކުރައްވާނެކަން އިއުލާން ކުރައްވާފައެވެ.