ކުރީގެ ނާއިބު ރައީސް ފައިސަލް އެމްޑީޕީއަށް ސޮއި ކުރައްވައިފި

ކުރީގެ ނައިބު ރައީސް ފައިސަލް ނަސީމް އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް މިއަދު ސޮއިކުރައްވައިފި އެވެ.

ފައިސަލް އެމްޑީޕީއަށް ސޮއިކުރެއްވި ފޯމު ހަވާލު ކުރެއްވީ ކުރީގެ ރައީސް އިބްރާހިމް މުހައްމަދު ޞާލިހާއެވެ. އެތަނުގައި އެމްޑީޕީގެ ޗެއާޕާސަން ފައްޔާޒު އިސްމާއީލް އަދި އެ ޕާޓީގެ އައު ރައީސް އަބްދުالله ޝާހިދުވެސް ހުންނެވިއެވެ.

ޖުމްހޫރީ ޕާޓީ ވުޖޫދަށް އައީއްސުރެ ޕާޓީގައި ދެމިހުންނެވި ފައިސަލް ވަނީ 2004 ވަނަ އަހަރު ފުވައްމުލަކު މެންބަރެއްގެ ގޮތުގައި ހާއްސަ މަޖިލީސް ތަމްސީލް ކުރައްވާފައެވެ. އަދި އެމްޑީޕީ އުފެދިގެން އައި އިރު އެ ޕާޓީގައި ވެސް އޭރު ހުންނެވުމަށްފަހު، ޖެޕީ އުފެދުމާއި އެކު 2008 ވަނަ އަހަރު ވަނީ އެޕާޓީއާ ގުޅިވަޑައިގެންފައެވެ.

އެއަށްފަހު މިފަހާ ޖެހެންދެންވެސް ޖޭޕީ މެންބަރެއްގެ ގޮތުގައި ފައިސަލް ހުންނެވިއިރު، އެމާނިކުފާނަށް ނާއިބް ރައީސްގެ މަގާމުވެސް ލިބި ވަޑައިގެންނެވީވެސް 2018 ވަނަ އަހަރު ރިޔާސީ އިންތިހާބުގައި އެމްޑީޕީ އާއެކު ޖޭޕީން ކޯލިޝަން ހަދައި، ޖޭޕީން ނާއިބް ރައީސްއަކު ނެރުމަށް ކޯލިޝަނުން އެއްބަސްވި އެއްބަސްވުމާއި އެކު، ޖެޕީ މެންބަރުންގެ ތާއީދާއެކުއެވެ.

ނާއިބު ރައީސް ކަމުގެ މަގާމުގައި ހުންނެވި އިރު، ފަައިސަލް ފާހަގަކުރެއްވެނީ ކުރީގެ ރައީސް އިބްރާހިމް މުހައްމަދު ޞާލިހަށް ވަފާތެރި ބޭފުޅެއްގެ ގޮތުގައެވެ. އެމަނިކުފާނަކީ އާ ގާނޫނު އަސާސީ އުފެދުނު ފަހުން ދައުރެއް ހަމަކުރި ހަމައެކަނި ނައިބު ރައީސެވެ.

އަދި ޖުމްހޫރީ ޕާޓީން ވަކިވެ ވަޑައިގަންނަވަން ފައިސަލް ނިންމެވި އިރު، އެމަނިކުފާނު އަންނަނީ އެމްޑީޕީގެ ސިޔާސީ ހަރަކާތްތަކުގައި ސޯލިހުއާ އެކީ ބައިވެރިވެ ވަޑައިގަންނަވަމުންނެވެ. އަދި ނިމިދިޔަ ރިޔާސީ އިންތިޚާބުގައި ޖޭޕީން ކެންޑިޑޭޓެއް ނެރެފައިވާއިރުވެސް ފައިސަލް ހުންނެވީ ސޯލިހް އާއެކުކަން ފާހަގަކޮށްލަންޖެހެއެވެ.

ފައިސަލް ވަނީ 2014 ވަނަ އަހަރުގައި މަޖިލީހުގެ ކާށިދޫ ދާއިރާ ތަމްސީލުވެސް ކުރައްވާފައެވެ.