އެމްޑީޕީ މެމްބަރުން ކޮންގްރެސްގައި ބައިވެރިވާން އަންނަނީ އަމިއްލަ ޖީބުން ހަރަދުކޮށްގެން: ޝިފާޒު
ދިވެހިރާއްޖޭގެ ޑިމޮކްރެޓިކް ޕާޓީ (އެމްޑީޕީ) އިން މާދަމާ ފަށާ ކޮންގްރެސްގައި ބައިވެރިވުމަށް އަތޮޅޫތެރެއިން މާލެ އަންނަނީ އެ މެމްބަރުން އަމިއްލަ ޖީބުން ހަރަދުކޮށްގެންކަމަށް އެ ޕާޓީގެ ޑެޕިއުޓީ ޗެއާޕާސަން މުޙައްމަދު ޝިފާޒު ވިދާޅުވެއްޖެއެވެ..
ކޮންގްރެސްގެ ކަންކަން ކުރިއަށްދާގޮތާ ބެހޭގޮތުން ނޫސްވެރި މައުލޫމާތު ހިއްސާކުރަމުން ޝިފާޒް ވިދާޅުވީ، މެންބަރުން މާލެ އައުމަށް ދަތުރު ޓިކެޓާއި ހުރުމާއި ކެއުމާއި ޔުނިފޯމް ހިމެނޭ ގޮތަށް އެންމެހައި ޚަރަދެއް ކުރަނީ މެންބަރުން އަމިއްލައަށްކަމަށެވެ.
ޝިފާޒު ވިދާޅުވީ، މި ކޮންގްރެސް ކުރިއަށް ގެންދަނީ ފައިސާގެ ބާރުގައި ނޫން ކަމަށާއި ޕާޓީގެ ރޫޙުގައި ހިލޭ ސާބަހަށް މަސައްކަތްކުރާ މެންބަރުންގެ ހިތްވަރާ އެކު ކަމަށެވެ. ކޮންގްރެސް ބާއްވާނެ ތަނެއް ހޯދުމަށް ސޯޝަލް ސެންޓަރާއި ސްކޫލް ހޯލުތަކާއި ސެންޓްރަލް ޕާކު ފަދަ ތަންތަން ހޯދުމަށް ވަރަށް ބޮޑަށް މަސައްކަތް ކޮށްފައިވާ ކަމަށާއި އެއިން އެއްވެސް ތަނެއް ނުލިބުނުކަން ޝިފާޒް ފާހަގަކުރެއްވިއެވެ. އެގޮތުން ޖާގައިގެ ދަތިކަން ކުރިމަތިވިނަމަވެސް، މާލޭ ސިޓީ ހޯލުގައި ކޮންގްރެސް ކުރިއަށް ގެންދަން ނިންމީ އެނޫންގޮތެއް ނެތިގެންކަމަށް އޭނާ ވިދާޅުވިއެވެ.
އެބޭފުޅުން ކޮންގްރެސްއަށް ވަޑައިގަންނަވާނީ އަމިއްލަ ޚަރަދުގައި. އެބޭފުޅުން ތިއްބަވާނީ އަމިއްލަ ޚަރަދުގައި. އެބޭފުޅުން ކެއިންބުއިމުގެ ކަންކަން އަމިއްލަ ޚަރަދުގައި. އެބޭފުޅުންގެ ޔުނިފޯމަކީ އެބޭފުޅުންގެ އަމިއްލަ ޚަރަދު. އަޅުގަނޑުމެން ޓައިއެއް ގަނެނުދެން ބޮލުގައި އަޅާނޭ ބުރުގާއެއް ގަނެއެއް ނުދެން
އޭނާ ވިދާޅުވިއެވެ.
އެމްޑީޕީއަކީ ވަރުގަދަ ޢަޒުމެއްގައި ހަރަކާތްތެރިވާ ކެރޭ މެންބަރުންތަކެއް ހިމެނޭ ޕާޓީއެއް ކަމަށާއި ޕާޓީގެ މިފަދަ ކޮންމެ ހަރަކާތެއްގައި ވެސް މެންބަރުން ޕާޓީވަންތަކަމުގެ ނަމޫނާ ދައްކަމުން ގެންދާ ކަމަށް އޭނާ ވިދާޅުވިއެވެ. މި ކޮންގްރެސް ވެސް ކުރިއަށް ގެންދެވެނީ ހަމަ އެ ރޫޙާއި ޢަޒުމުގެ ތެރެއިން ކަމަށް އޭނާ ފާހަގަކުރެއްވިއެވެ.
އެމްޑީޕީގެ ކޮންގްރެސް ކުރިއަށްދާނީ މާދަމައިން ފެށިގެން ތިންވަނަ ދުވަހުގެ ނިޔަލަށެވެ. އެމްޑީޕީން ބުނީ މިހާރު ކުރިއަށްދަނީ ކޮންގްރެސްގެ އެންމެ ފަހުގެ ތައްޔާރީތައް ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
