އެސްޓީއޯގެ މިދިޔަ އަހަރުގެ ވިޔަފާރީގެ ފައިދާއިން ހިއްސާއަކަށް 85 ރުފިޔާ ބެހުމަށް ފާސްކޮށްފި

ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) ގެ މިދިޔަ އަހަރުގެ ވިޔަފާރީގެ ފައިދާއިން ހިއްސާއަކަށް 85 ރުފިޔާ ބެހުމަށް ނިންމައިފިއެވެ.

މިގޮތަށް ނިންމާފައިވަނީ ދޫސިތު ޑީ ޓޫ ފޭދޫ މޯލްޑިވްސްގައި އެސްޓީއޯއިން މިރޭ ބޭއްވި އެކުންފުނީގެ 2025 ވަނަ އަހަރުގެ އަހަރީ އާއްމު ޖަލްސާގައެވެ. ހިއްސާގެ ފައިދާގެ ގޮތުގައި 85 ރުފިޔާ ބެހުމަށް ނިންމީ ޑިރެކްޓަރުންގެ ބޯޑުން ހުށަހެޅި ގޮތަށެވެ. ހިއްސާގެ ފައިދާ ބެހުމަށް ނިންމީ ޖަލްސާއަށް ހާޒިރުވި ހިއްސާދާރުންގެ ވޯޓުންނެވެ.

ހިއްސާގެ ފައިދާ ބެހުމަށް ފާސްވީ ޖަލްސާގައި ބައިވެރިވި ހިއްސާދާރުންގެ 99 އިންސައްތަ ވޯޓުންނެވެ. ޖަލްސާގައި 263 ހިއްސާދާރުން ބައިވެރިވިއެވެ. އެސްޓީއޯއިން ހިއްސާގެ ފައިދާގެ ގޮތުގައި 85 ރުފިޔާ ބެހުމަށް ނިންމިއިރު، މިއީ މިދިޔަ އަހަރު ބަހަން ނިންމި އަދަދަށްވުރެ 5 ރުފިޔާ އިތުރުވުމެކެވެ.

2024 ވަނަ އަހަރު ވިޔަފާރީގެ ފައިދާއިން ހިއްސާއަކަށް ބެހުމަށް ފާސްކުރީ 80 ރުފިޔާއެވެ.

އެސްޓީއޯ ގްރޫޕަށް 2025 ވަނަ އަހަރު ސާފު ފައިދާގެ ގޮތުގައި 785 މިލިއަން ރުފިޔާ ވަނީ ލިބިފައެވެ. މިއީ އޭގެ ކުރީ އަހަރާ އަޅާބަލާއިރު، ދޭއް އިންސައްތަ ކުރިއެރުމެކެވެ. އެސްޓީއޯ ގްރޫޕަށް ޖުމްލަ އާމްދަނީގެ ގޮތުގައި މިދިޔަ އަހަރު 16.68 ބިލިއަން ރުފިޔާ ލިބުނެވެ.

އެސްޓީއޯގެ ބޯޑުގައި ކުރިއަށްއޮތް އަހަރު އާއްމު ހިއްސާދާރުންގެ ފަރާތުން ތަމްސީލްކުރާނޭ ޑިރެކްތަރަކަށް ހޮވުނީ މުހައްމަދު އަހުސަން ސަލީމެވެ. ކުންފުނީގެ އެކްސްޓަރނަލް އޮޑިޓަރަކަށް އައްޔަނުކުރީ 1،009،800 ގެ އަގަކަށް އަރނެސްޓް އެންޑް ޔަންގެވެ.